'വിക്കിയുടെ ലുക്കിനെ ആരും കളിയാക്കില്ല, ട്രോളുകൾ ഭാര്യക്ക് മാത്രം!'; ഇരട്ടത്താപ്പെന്ന് വിമർശനം

താരദമ്പതികളായ കത്രീന കൈഫിന്റെയും വിക്കി കൗശലിന്റെയും ഏറ്റവും പുതിയ ചിത്രമാണ് സോഷ്യൽ മീഡിയയിലെ പുതിയ ചർച്ച. ലണ്ടനിൽ വച്ച് ആരാധകർ പകർത്തിയ ചിത്രം ഇൻസ്റ്റഗ്രാമിൽ പ്രത്യക്ഷപ്പെട്ടതിന് പിന്നാലെയാണിത്. 

ലണ്ടൻ തെരുവുകളിൽ ലളിതമായ വസ്ത്രധാരണത്തിൽ നടന്നുപോകുന്ന ദമ്പതികളുടെ ചിത്രമാണ് ആരാധകർ പകർത്തിയത്. തൊപ്പിയും സൺഗ്ലാസും താടിയുമായി കാഷ്വൽ ലുക്കിൽ വിക്കി എത്തിയപ്പോൾ, കറുപ്പ് നിറത്തിലുള്ള വസ്ത്രവും സൺഗ്ലാസുമായിരുന്നു കത്രീനയുടെ വേഷം.

എന്നാൽ ഈ ചിത്രത്തിന് താഴെ ഉയർന്നുവന്ന കമന്റുകൾ സോഷ്യൽ മീഡിയയിൽ ഇരുവരും നേരിടുന്ന വിമർശനങ്ങളെക്കുറിച്ചായിരുന്നു.

"ഇനി വിക്കിയുടെ ലുക്കിനെ ഓർത്ത് ആരും ട്രോളില്ലായിരിക്കും," എന്ന് ഒരു ഉപയോക്താവ് കുറിച്ചപ്പോൾ, "അധിക്ഷേപങ്ങളും ബോഡി ഷെയ്മിങ്ങും എന്നും അദ്ദേഹത്തിന്റെ ഭാര്യക്ക് മാത്രമായി നീക്കിവെച്ചിരിക്കുകയാണോ?" എന്നാണ് മറ്റൊരാൾ ചോദിച്ചത്. സോഷ്യൽ മീഡിയയുടെ ഈ സമീപനം കേവലം ഇരട്ടത്താപ്പാണെന്നും നിരവധി പേർ ചൂണ്ടിക്കാട്ടി.

അടുത്തിടെ നടന്ന ഗണേശോത്സവ ആഘോഷങ്ങളിൽ പങ്കെടുത്ത കത്രീന കൈഫിന്റെ ചിത്രങ്ങൾക്ക് താഴെ ബോഡി ഷെയ്മിങ് കമന്റുകൾ പ്രത്യക്ഷപ്പെട്ടിരുന്നു. പ്രസവാനന്തരമുള്ള കത്രീനയുടെ ശരീരപ്രകൃതിയെയും ലുക്കിനെയും പരിഹസിച്ച് നിരവധി പേരാണ് രംഗത്തെത്തിയത്. ഇതിന് ദിവസങ്ങൾക്ക് ശേഷമാണ് ലണ്ടനിൽ നിന്നുള്ള ചിത്രം വൈറലാകുന്നതും, നടിമാർ നേരിടുന്ന കടുത്ത സൈബർ അധിക്ഷേപങ്ങൾ വീണ്ടും ചർച്ചയാകുന്നതും.

തനിക്കെതിരെ ഉയർന്ന വിമർശനങ്ങളെയും ബോഡി ഷെയ്മിങ്ങിനെയും കുറിച്ച് മുൻപും കത്രീന തുറന്നു സംസാരിച്ചിട്ടുണ്ട്. തന്റെ ബ്യൂട്ടി ബ്രാൻഡിന്റെ വാർഷിക ചടങ്ങിൽ സംസാരിക്കവേ, ഇത്തരം വിമർശനങ്ങളെ നേരിടുന്നതിനെക്കുറിച്ച് കത്രീന പറഞ്ഞ വാക്കുകൾ ഏറെ ശ്രദ്ധ നേടിയിരുന്നു:

"സോഷ്യൽ മീഡിയയിലെ അഭിപ്രായങ്ങൾ നമ്മുടെ വ്യക്തിപരമായ മൂല്യത്തെ ബാധിക്കാൻ ഒരിക്കലും അനുവദിക്കരുത്. ചുറ്റുമുള്ള എല്ലാവരെയും തൃപ്തിപ്പെടുത്താൻ നിന്നാൽ, സ്വന്തം ജീവിതത്തിൽ ശരിയായ തീരുമാനങ്ങൾ എടുക്കാനുള്ള ശേഷി തന്നെ നമുക്ക് നഷ്ടമാകും. എനിക്കെതിരെ വരുന്ന വിമർശനങ്ങൾക്ക് അനുസരിച്ചാണ് ഞാൻ ജീവിച്ചിരുന്നതെങ്കിൽ, ഭയം കാരണം മുന്നോട്ട് പോകാനാകാതെ ഞാൻ തളർന്നുപോയേനെ". 

2021 ഡിസംബറിലായിരുന്നു ബോളിവുഡ് ഒന്നടങ്കം ആഘോഷിച്ച വിക്കി കൗശൽ - കത്രീന കൈഫ് വിവാഹം. 'വിഹാൻ' എന്ന മകനുമുണ്ട്. സൈബർ അധിക്ഷേപങ്ങൾക്കും വിമർശനങ്ങൾക്കുമിടയിലും പരസ്പര പിന്തുണയോടെയും സ്നേഹത്തോടെയും മുന്നോട്ടുപോകുന്ന ദമ്പതികൾക്ക് പിന്തുണയുമായെത്തുന്ന ആരാധകരുമുണ്ട്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi