ഐശ്വര്യ റായ് ബച്ചനും അഭിഷേക് ബച്ചനും മകൾ ആരാധ്യക്കൊപ്പം 2026-നെ വരവേറ്റത് ന്യൂയോർക്ക് നഗരത്തിലാണ്. മുംബൈ വിമാനത്താവളത്തിൽ വെച്ച് ഇവരെ കണ്ടപ്പോൾ യാത്ര എവിടേക്കാണെന്ന് രഹസ്യമാക്കി വെച്ചിരുന്നെങ്കിലും, ഇപ്പോൾ സോഷ്യൽ മീഡിയയിൽ പ്രചരിക്കുന്ന ചിത്രങ്ങളും വീഡിയോകളും ദമ്പതികൾ ന്യൂയോർക്കിലുണ്ടെന്ന് സ്ഥിരീകരിച്ചിരിക്കുകയാണ്.

ന്യൂയോർക്കിലെ പുതുവത്സരാഘോഷത്തിനിടെ ആരാധകർക്കൊപ്പം നിൽക്കുന്ന ഐശ്വര്യയുടെയും അഭിഷേകിന്റെയും വീഡിയോകൾ ഇൻസ്റ്റഗ്രാമിൽ തരംഗമാവുകയാണ്. മനോഹരമായി അലങ്കരിച്ച ഒരു ക്രിസ്മസ് ട്രീക്ക് മുന്നിൽ ഇരുവരും ഒരു ആരാധകനോടൊപ്പം നിൽക്കുന്നത് കാണാം. തണുപ്പുള്ള കാലാവസ്ഥയിൽ കറുത്ത ശൈത്യകാല വസ്ത്രങ്ങൾ ധരിച്ച് സ്‌റ്റൈലിഷ് ലുക്കിലാണ് താരദമ്പതികൾ എത്തിയത്.

മറ്റൊരു വീഡിയോയിൽ ഐശ്വര്യ ആരാധകർക്ക് ഹൃദയസ്പർശിയായ പുതുവത്സരാശംസകൾ നേരുന്നുണ്ട്. 'നിങ്ങൾക്കേവർക്കും സന്തോഷകരമായ പുതുവത്സരം നേരുന്നു, ദൈവാനുഗ്രഹം ഉണ്ടാകട്ടെ, എപ്പോഴും എന്റെ സ്‌നേഹം,' എന്നാണ് ക്യാമറയെ നോക്കി താരം പറയുന്നത്. ഈ സമയത്ത് ദീപിക പദുകോണും രൺവീർ സിംങും ന്യൂയോർക്കിലുണ്ടായിരുന്നു എന്നതും ശ്രദ്ധേയമാണ്.

കഴിഞ്ഞ മാസങ്ങളിൽ ഐശ്വര്യയും അഭിഷേകും തമ്മിൽ വേർപിരിയുകയാണെന്ന തരത്തിൽ നിരവധി അഭ്യൂഹങ്ങൾ പ്രചരിച്ചിരുന്നു. എന്നാൽ ഈ കുടുംബയാത്രയും പൊതുവേദികളിലെ ഒന്നിച്ചുള്ള സാന്നിധ്യവും അത്തരം ഗോസിപ്പുകൾക്ക് വിരാമമിട്ടിരിക്കുകയാണ്. നേരത്തെ ഒരു അഭിമുഖത്തിൽ ഇത്തരം വാർത്തകളെക്കുറിച്ച് അഭിഷേക് പ്രതികരിച്ചിരുന്നു: 'നമ്മൾ പൊതുരംഗത്തുള്ളവരാകുമ്പോൾ ആളുകൾ എല്ലാ കാര്യങ്ങളെക്കുറിച്ചും ഊഹാപോഹങ്ങൾ നടത്തും. ഇപ്പോൾ പ്രചരിക്കുന്ന വാർത്തകൾ തീർത്തും തെറ്റാണ്. വസ്തുതകളുമായി അതിന് യാതൊരു ബന്ധവുമില്ല' എന്നായിരുന്നു അഭിഷേകിന്റെ പ്രതികരണം. തങ്ങൾക്കിടയിൽ യാതൊരു പ്രശ്‌നവുമില്ലെന്നും തനിക്ക് തന്റെ സത്യം അറിയാമെന്നും ഐശ്വര്യക്ക് അവളുടെ സത്യം അറിയാമെന്നും അഭിഷേക് വ്യക്തമാക്കി. ഇത്തരം കിംവദന്തികൾ തന്നെ ഒട്ടും അലട്ടുന്നില്ലെന്നും അദ്ദേഹം കൂട്ടിച്ചേർത്തു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi