‘ചുരുണ്ട മുടി വേണ്ടെന്ന് ഉപദേശിച്ചു’, ഒരു പാവയാവാൻ ഞാൻ തയ്യാറായില്ല’; സായാമിഖേർ

ബോളിവുഡിൽ ഒരു നടിയാകണമെങ്കിൽ എങ്ങനെയിരിക്കണം, എങ്ങനെ വസ്ത്രം ധരിക്കണം, എങ്ങനെയുള്ള വ്യക്തിത്വം അവതരിപ്പിക്കണം എന്നതിനെക്കുറിച്ച് പലപ്പോഴും കൃത്യമായ ചില മാനദണ്ഡങ്ങൾ മുന്നോട്ടുവയ്ക്കപ്പെടാറുണ്ട്. കരിയറിന്റെ തുടക്കകാലത്ത് തനിക്കും ഇത്തരം സമ്മർദങ്ങൾ നേരിടേണ്ടിവന്നിട്ടുണ്ടെന്ന് വെളിപ്പെടുത്തുകയാണ് നടി സായാമി ഖേർ. സ്വാഭാവികമായ ചുരുണ്ട മുടി പോലും മാറ്റണമെന്നായിരുന്നു ലഭിച്ച ഉപദേശങ്ങളിലൊന്ന്.

ഹിന്ദുസ്ഥാൻ ടൈംസിന് നൽകിയ അഭിമുഖത്തിലാണ് സായാമി തന്റെ അനുഭവം പങ്കുവച്ചത്. സിനിമയിൽ കൂടുതൽ കാലം നിലനിൽക്കണമെങ്കിൽ ഒരു പ്രത്യേക രീതിയിൽ വസ്ത്രം ധരിക്കുകയും ഒരു പ്രത്യേക രൂപത്തിലേക്ക് മാറുകയും വേണമെന്ന് കരിയറിന്റെ തുടക്കത്തിൽ പല മാനേജർമാരും ഉപദേശിച്ചിരുന്നുവെന്ന് താരം പറഞ്ഞു.

“ഒരു നടി എങ്ങനെയായിരിക്കണം എന്നതിന് ഒരു പ്രത്യേക രൂപമുണ്ടെന്ന് എന്നോട് പലരും പറഞ്ഞിരുന്നു. അത്തരത്തിൽ വസ്ത്രം ധരിക്കണമെന്നും ഉപദേശിച്ചു. എന്നാൽ ഞാൻ അതിനനുസരിച്ച് മാറിയില്ല. എനിക്ക് ഇഷ്ടമുള്ള രീതിയിൽ സ്‌പോർട്‌സിനെ പിന്തുടർന്നു. രാഷ്ട്രീയം, സ്‌പോർട്‌സ് തുടങ്ങിയ വിഷയങ്ങളെക്കുറിച്ച് സംസാരിച്ചു. ഞാൻ ആരാണോ അതിൽ തന്നെ ഉറച്ചുനിന്നു,” സായാമി പറഞ്ഞു.

സ്വന്തം വ്യക്തിത്വത്തിൽ ഉറച്ചുനിന്നത് സിനിമയിലെ അവസരങ്ങൾക്ക് തടസ്സമായില്ലെന്നും സായാമി തിരിച്ചറിഞ്ഞു. ആളുകൾ നമ്മളെ ഒരു പ്രത്യേക രീതിയിലേക്ക് മാറ്റാൻ ശ്രമിക്കുമെന്നും എന്നാൽ സ്വന്തം സ്വത്വം കാത്തുസൂക്ഷിക്കുന്നതാണ് മറ്റുള്ളവരിൽനിന്ന് വ്യത്യസ്തരാക്കുന്നതെന്നും താരം പറയുന്നു.

“പലരും നിങ്ങളെ ഒരു പ്രത്യേക രീതിയിൽ രൂപപ്പെടുത്താൻ ശ്രമിക്കും. എന്നാൽ നിങ്ങളുടെ തനിമയിൽ ഉറച്ചുനിൽക്കണം. അതാണ് നിങ്ങളെ വേറിട്ടുനിർത്തുന്നത്. അല്ലെങ്കിൽ നിങ്ങൾ ഫാക്ടറിനിർമിതമായ ഒരു ബാർബി പോലെയാകും. അങ്ങനെയാകാൻ എനിക്ക് താൽപര്യമില്ലായിരുന്നു,” സായാമി പറഞ്ഞു.

കരിയറിന്റെ തുടക്കത്തിൽ 'ഇങ്ങനെ വസ്ത്രം ധരിക്കണം, ഇങ്ങനെ കാണപ്പെടണം' എന്ന തരത്തിലുള്ള നിർദേശങ്ങൾ നിരന്തരം ലഭിച്ചിരുന്നുവെന്നും താരം ഓർത്തെടുത്തു. “ചുരുണ്ട മുടി വെക്കരുത്” എന്നുപോലും തന്നോട് പറഞ്ഞിരുന്നുവെന്നാണ് സായാമിയുടെ വെളിപ്പെടുത്തൽ. “എന്നാൽ അതൊന്നും എന്റെ സ്വാഭാവിക രൂപത്തിൽ മാറ്റം വരുത്താൻ കാരണമായില്ല. എന്റെ മാതാപിതാക്കൾ വളർത്തിയ രീതിയിലും സ്വന്തം വ്യക്തിത്വത്തിലും ഞാൻ സന്തുഷ്ടയായിരുന്നു. അതുകൊണ്ടുതന്നെ അതിൽ മാറ്റം വരുത്താതെ മുന്നോട്ടുപോയതിൽ സന്തോഷമുണ്ട്,” സായാമി വ്യക്തമാക്കി.

തെലുങ്ക് ചിത്രം 'റേ'യിലൂടെയാണ് സായാമി ഖേർ 2015ൽ അഭിനയരംഗത്തെത്തുന്നത്. 2016ൽ രാകേഷ് ഓംപ്രകാശ് മെഹ്‌റ സംവിധാനം ചെയ്ത 'മിർസ്യ'യിലൂടെ ബോളിവുഡിലും അരങ്ങേറ്റം കുറിച്ചു. ചിത്രം ബോക്‌സ് ഓഫീസിൽ വലിയ വിജയം നേടിയില്ലെങ്കിലും സായാമിയുടെ പ്രകടനം ശ്രദ്ധിക്കപ്പെട്ടു. പിന്നീട് വ്യത്യസ്തമായ കഥാപാത്രങ്ങളിലൂടെ ഹിന്ദി സിനിമയിൽ സ്വന്തമായൊരു ഇടം സായാമി സൃഷ്ടിക്കുകയായിരുന്നു. ഒരു പ്രത്യേക 'ഗ്ലാമർ ഇമേജിൽ' ഒതുങ്ങാതെ അഭിനയത്തിലും കായികരംഗത്തോടുള്ള താൽപര്യത്തിലും സ്വന്തം വ്യക്തിത്വത്തിലും ഉറച്ചുനിന്നതാണ് സായാമിയുടെ കരിയറിന്റെ ശ്രദ്ധേയമായ പ്രത്യേകത.

പ്രിയദർശൻ സംവിധാനം ചെയ്യുന്ന 'ഹൈവാൻ' ആണ് സായാമിയുടെ വരാനിരിക്കുന്ന പ്രധാന ചിത്രങ്ങളിലൊന്ന്. അക്ഷയ് കുമാറും സെയ്ഫ് അലി ഖാനും പ്രധാന വേഷങ്ങളിലെത്തുന്ന ചിത്രത്തിൽ സായാമിയും ശ്രദ്ധേയമായ കഥാപാത്രത്തെ അവതരിപ്പിക്കുന്നു. സെപ്റ്റംബർ 11നാണ് ചിത്രം തിയറ്ററുകളിൽ എത്തുന്നത്.

സ്വന്തം രൂപവും വ്യക്തിത്വവും മാറ്റി സിനിമയുടെ 'മോൾഡിൽ' ഒതുങ്ങുന്നതിന് പകരം തന്റേതായ വഴിയിലൂടെ മുന്നേറിയ സായാമി ഖേറിന്റെ വാക്കുകൾ, ബോളിവുഡിലെ സൗന്ദര്യ സങ്കൽപ്പങ്ങളെക്കുറിച്ചുള്ള മറ്റൊരു തുറന്ന ചർച്ചയ്ക്കാണ് വഴിയൊരുക്കുന്നത്.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi