ഏറെ ട്രോൾ ചെയ്യപ്പെട്ട താരമാണ് രശ്മിക മന്ദാന. ഓവർ ആക്ടിങ് ആണെന്നും അഭിനയിക്കാനറിയില്ലെന്നുമെല്ലാം അവരെക്കുറിച്ച് പലരും പറഞ്ഞു. 'റണബാലി' എന്ന സിനിമയുടെ പ്രൊമോഷനുമായി ബന്ധപ്പെട്ടുള്ള അഭിമുഖത്തിൽ ഇതിനെക്കുറിച്ച് സംസാരിക്കുകയാണ് രശ്മികയും വിജയ് ദേവരകൊണ്ടയും.

തന്റെ സൗഹൃദപരമായ പെരുമാറ്റത്തെയും സ്‌നേഹപ്രകടനങ്ങളെയും ചിലർ 'അമിതാഭിനയം' എന്ന് വിശേഷിപ്പിക്കുന്നുണ്ടെങ്കിലും, അതിൽ മാറ്റം വരുത്താൻ തനിക്ക് ഉദ്ദേശ്യമില്ലെന്നും താരം പറയുന്നു. താൻ എപ്പോഴും തന്റേതായ രീതിയിൽ തന്നെ തുടരാനാണ് ആഗ്രഹിക്കുന്നതെന്ന് രശ്മിക മറുപടി നൽകി. സോഷ്യൽ മീഡിയയിൽ താരങ്ങൾക്കും രാഷ്ട്രീയക്കാർക്കുമെതിരെ നടക്കുന്ന പല ട്രോളുകളും കൃത്രിമമായി സൃഷ്ടിക്കപ്പെടുന്നവയാകാമെന്ന് വിജയ് കൂട്ടിച്ചേർത്തു.

കീർത്തിക ഗോവിന്ദസാമിയുടെ യൂട്യൂബ് ചാനലിനുവേണ്ടിയുള്ള അഭിമുഖത്തിൽ സംസാരിക്കുകയായിരുന്നു ഇരുവരും. ആളുകളെ പ്രീതിപ്പെടുത്താനായി തന്റെ വ്യക്തിത്വം മാറ്റാൻ തയ്യാറല്ലെന്നും രശ്മിക വ്യക്തമാക്കി. താൻ സഹാനുഭൂതിയോടെ പെരുമാറുന്നതിന്റെ പേരിൽ ട്രോളുകൾ നേരിടേണ്ടി വരുന്നതിനെക്കുറിച്ചുള്ള ചോദ്യത്തിന് അവർ ഇങ്ങനെ മറുപടി നൽകി, ''വ്യക്തിപരമായി, ദയ എന്നത് ഒരു ബലഹീനതയാണെന്ന് എനിക്ക് തോന്നുന്നില്ല. ചുറ്റും ധാരാളം നെഗറ്റീവ് ചിന്തകൾ നിലനിൽക്കുന്നതുകൊണ്ട്, ദയയുള്ളവളായിരിക്കാനാണ് ഞാൻ ആഗ്രഹിക്കുന്നത്. ദയയിൽ വിശ്വസിക്കാനും പോസിറ്റീവായ എന്തെങ്കിലും കൊണ്ടുവരാനും ഞാൻ ആഗ്രഹിക്കുന്നു. ആളുകൾ അതിനെ 'ഓവർ ആക്ടിങ്' (അമിതപ്രകടനം) എന്ന് വിളിച്ചാലും കുഴപ്പമില്ല. എല്ലാവർക്കും എല്ലാവരെയും ഇഷ്ടപ്പെടണമെന്നില്ലല്ലോ. ഇങ്ങനെയൊരാളായിരിക്കാനാണ് ഞാൻ തീരുമാനിച്ചത്, അങ്ങനെയായിരിക്കുന്നതിൽ എനിക്ക് വലിയ സന്തോഷവുമുണ്ട്; കാരണം ഇതാണ് ഞാൻ. ഇതിനായി ഞാൻ ഒന്നും അഭിനയിക്കേണ്ടതില്ല, ഇത് തികച്ചും സ്വാഭാവികമാണ്. മറ്റൊരാളെ സന്തോഷിപ്പിക്കാൻ വേണ്ടി എനിക്ക് കൃത്രിമമായി പെരുമാറാനാവില്ല. ഈ രീതി എന്നെയും എന്റെ കുടുംബത്തെയും സുഹൃത്തുക്കളെയും അഭ്യുദയകാംക്ഷികളെയും സന്തോഷിപ്പിക്കുന്നുണ്ടെന്ന് എനിക്ക് തോന്നുന്നു''.

വിജയ് ഇക്കാര്യത്തിൽ ഇടപെട്ടുകൊണ്ട് പറഞ്ഞു, ''രാഷ്ട്രീയക്കാർക്കും അഭിനേതാക്കൾക്കുമെതിരായ ട്രോളിങ്ങുകളിൽ പലതും കൃത്രിമമായി സൃഷ്ടിക്കപ്പെടുന്നവയാണ്. ഒരാളെ നേരിൽ കാണുമ്പോഴോ അവരോടൊപ്പം കുറച്ചു സമയം ചെലവഴിക്കുമ്പോഴോ മാത്രമേ നമുക്ക് അവരോട് എന്തെങ്കിലും വികാരം തോന്നുകയുള്ളൂ. ഒരാളെ നേരിൽ കണ്ടിട്ടുപോലുമില്ലാത്തപ്പോൾ, അവരുടെ വ്യക്തിത്വത്തെക്കുറിച്ച് എങ്ങനെയാണ് ഇത്ര ശക്തമായൊരു അഭിപ്രായം രൂപീകരിക്കാനാവുക? ഒരു പ്രത്യേക വിഭാഗം ആളുകളെക്കുറിച്ച് ഒരു അഭിപ്രായം സൃഷ്ടിക്കാൻ തീരുമാനിക്കുമ്പോഴാണ് ഇത്തരം കാര്യങ്ങൾ കൃത്രിമമായി ഉണ്ടാക്കിയെടുക്കുന്നത്. സോഷ്യൽ മീഡിയയുടെ കാലഘട്ടത്തിൽ, ഒരാൾക്ക് തന്നെ 15 അക്കൗണ്ടുകൾ കൈകാര്യം ചെയ്യുക എന്നത് വളരെ എളുപ്പമാണ്. അതിനാൽ, ഒരാൾ അത്തരമൊരു അഭിപ്രായം കൃത്രിമമായി സൃഷ്ടിക്കുമ്പോൾ, ആ 'ആഖ്യാനം' പ്രചരിപ്പിക്കാനായി ഒരു സംവിധാനം തന്നെ പ്രവർത്തിക്കുന്നുണ്ട്''. ഇത്തരം ട്രോളിങ്ങുകൾ കാരണം ആളുകൾ തങ്ങളുടെ പെരുമാറ്റം മാറ്റാൻ മുതിരരുതെന്നും അദ്ദേഹം കൂട്ടിച്ചേർത്തു.

തങ്ങളുടെ ബന്ധത്തെക്കുറിച്ചും ഇരുവരും മറ്റൊരു അഭിമുഖത്തിൽ തുറന്നുസംസാരിച്ചു.

''വിവാഹശേഷം വളരെ പെട്ടെന്നുതന്നെ ഗുഡ് മോർണിങ്, സുഖമാണോ?, ദിവസം എങ്ങനെ പോകുന്നു? തുടങ്ങിയ അടിസ്ഥാനപരമായ കാര്യങ്ങൾ പോലും പരസ്പരം പറയാതെയാകുന്നത് ഞാൻ പലപ്പോഴും ചിന്തിക്കാറുണ്ട്. 'എന്റെ പങ്കാളിക്ക് അതൊക്കെ അറിയാമല്ലോ, പിന്നെ എന്തിനാണ് പറയുന്നത്?' എന്ന ചിന്തയിലേക്ക് അത് മാറുന്നു. പിന്നീട്, 'എന്തുകൊണ്ടാണ് ഇത്രയും കാലമായി എന്നോടിത് ചോദിക്കാത്തത്?' എന്ന തോന്നലിലേക്കും അത് നയിച്ചേക്കാം. ജീവിതത്തിന്റെ തിരക്കുകൾ നമ്മളെ പല വഴികളിലേക്ക് കൊണ്ടുപോകുകയും ചെയ്യും'', രശ്മിക വിവാഹശേഷമുള്ള പ്രണയത്തെക്കുറിച്ച് വിശദീകരിച്ചു.

''അതുകൊണ്ട് എനിക്ക് തോന്നുന്നത്, ബന്ധത്തിലോ വിവാഹജീവിതത്തിലോ എത്രത്തോളം ആഴത്തിൽ നിങ്ങൾ ഉൾപ്പെട്ടിട്ടുണ്ടെങ്കിലും, അല്ലെങ്കിൽ കുട്ടികളുണ്ടെങ്കിൽ പോലും, പരസ്പരം ചെറിയ ചെറിയ കാര്യങ്ങൾക്കായുള്ള ശ്രമങ്ങൾ നടത്തേണ്ടതുണ്ട് എന്നാണ്. അതാണ് പ്രണയം. കാര്യങ്ങൾ സ്വാഭാവികമായി സംഭവിക്കുന്നതാകാം, എങ്കിലും അവ ചെയ്യണമെന്ന് ആഗ്രഹിക്കുന്നത് കൊണ്ടാണ് നിങ്ങൾ അത് ചെയ്യുന്നത്. പ്രണയത്തെക്കുറിച്ച് എനിക്കുള്ള വിശ്വാസവും അതാണ്''.

ഇതിന് വിജയ് നൽകിയ മറുപടിയിങ്ങനെ, ''ഇക്കാര്യത്തിൽ അവൾക്ക് വളരെ വ്യക്തമായ ധാരണയുണ്ട്. ബന്ധങ്ങളുടെ കാര്യത്തിൽ ഞങ്ങളെല്ലാവരിലും വെച്ച് ഏറ്റവും പക്വതയുള്ളത് അവൾക്കാണ്. അവൾ സംസാരിക്കുന്ന രീതി നോക്കൂ. ദിവസവും കുറഞ്ഞത് 10-15 തവണയെങ്കിലും അവൾ എന്നോട് 'ഐ ലവ് യു' എന്ന് പറയാറുണ്ട്. എന്റെ വികാരങ്ങൾ തുറന്നുപറയേണ്ടത് പ്രധാനമാണെന്ന് അവളെന്നെ ഓർമ്മിപ്പിക്കാറുണ്ട്. എനിക്ക് ഉള്ളിൽ അത്തരം വികാരങ്ങൾ എപ്പോഴും ഉണ്ടാകാറുണ്ട്; പക്ഷേ, 'പങ്കാളിക്ക് അതറിയാം, അതുകൊണ്ട് പറയേണ്ടതില്ലല്ലോ' എന്ന് കരുതി മിണ്ടാതിരിക്കാൻ പാടില്ലെന്ന് അവൾ പറയാറുണ്ട്. ജീവിതത്തിരക്കുകൾക്കിടയിൽ ഇത്തരം ചെറുതും എന്നാൽ പ്രധാനപ്പെട്ടതുമായ കാര്യങ്ങൾ പലപ്പോഴും നമ്മൾ മറന്നുപോകാറുണ്ട്. എന്നെ ഇക്കാര്യങ്ങൾ ഓർമ്മിപ്പിക്കുന്നത് അവളാണ്. അല്ലെങ്കിൽ, ചിലപ്പോൾ ഞാൻ അത്തരം കാര്യങ്ങൾ ശ്രദ്ധിക്കാതെ വിട്ടുപോയേനെ''. ഒക്ടോബർ 16-നാണ് 'റണബാലി' തിയേറ്ററുകളിലെത്തുന്നത്. 'ഡിയർ കോമ്രേഡ്' എന്ന ചിത്രത്തിനുശേഷം ഇരുവരും ഒരുമിക്കുന്ന സിനിമ കൂടിയാണിത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi