പ്രിയങ്ക ചോപ്ര വീണ്ടും സംഗീതലോകത്തേക്ക് തിരിച്ചെത്തുന്നു; മനോഹരമായ ക്രിസ്മസ് ഗാനത്തിന്റെ പൂർണ്ണരൂപം ഉടനെത്തും

ബോളിവുഡ് നടി പ്രിയങ്ക ചോപ്ര  വീണ്ടും

സംഗീതലോകത്തേക്ക് തിരിച്ചെത്തുന്നു. എക്കാലത്തെയും  പ്രശസ്തമായ വാം ക്ലാസിക് ഗാനം 'ലാസ്റ്റ് ക്രിസ്മസി'ന്റെ പുനരാവിഷ്കരിച്ച പതിപ്പുമായി തിരിച്ചുവരവ് നടത്തുകയാണ് താരം. 

പ്രശസ്ത ചലച്ചിത്രകാരി ഗുരീന്ദർ ഛദ്ദയുടെ വരാനിരിക്കുന്ന ഫാമിലി മ്യൂസിക്കൽ ചിത്രമായ 'ക്രിസ്മസ് കർമ്മ'യുടെ ഭാഗമാണ് ഈ ഗാനം. ചിത്രം നവംബർ 14-ന് യുകെ, അയർലൻഡ്, യുഎസ് എന്നിവിടങ്ങളിൽ റിലീസ് ചെയ്യും. പരമ്പരാഗത ഇന്ത്യൻ സംഗീതത്തെ ക്രിസ്മസ് ഗീതത്തിന്റെ സന്തോഷകരമായ ഭാവവുമായി കൂട്ടിക്കലർത്തുന്നതാണ് പ്രിയങ്കയുടെ ആലാപനം.

ഗാരി ബാർലോ, ബില്ലി പോർട്ടർ, നിതിൻ സോഹ്നി, ഷാസ്നേ ലൂയിസ്, പിക്സി ലോട്ട്, ബോയ് ജോർജ്ജ് എന്നിവരുൾപ്പെടെയുള്ള കലാകാരന്മാരുടെ സംഭാവനകളും ഈ സൗണ്ട്ട്രാക്കിലുണ്ട്. സിനിമയ്‌ക്കൊപ്പം മുഴുവൻ ആൽബവും പുറത്തിറങ്ങും.

പ്രിയങ്ക ചോപ്രയുടെ സംഗീത ജീവിതം
2012-ൽ വിൽഐആമിനൊപ്പം 'ഇൻ മൈ സിറ്റി' എന്ന ഗാനത്തിലൂടെയാണ് പ്രിയങ്ക ആദ്യമായി അന്താരാഷ്ട്ര സംഗീതലോകത്തേക്ക് ചുവടുവെച്ചത്. തുടർന്ന് 2013-ൽ പിറ്റ്ബുള്ളിനൊപ്പം 'എക്സോട്ടിക്' എന്ന ഗാനവും പുറത്തിറങ്ങി. എങ്കിലും ഗായിക എന്ന നിലയിലുള്ള പ്രിയങ്കയുടെ തുടക്കം  2002-ലെ തമിഴ് ചിത്രമായ 'തമിഴനി'ലെ 'ഉള്ളത്തൈ കിള്ളാതെ' എന്ന ഗാനത്തിലൂടെയായിരുന്നു. 'ബർസാത്തി'ലെ 'സാജൻ സാജൻ', 'മേരി കോമി'ലെ 'ചോറോ', 'ദിൽ ധഡക്നേ ദോ' തുടങ്ങിയ ബോളിവുഡ് ഗാനങ്ങൾക്കും പ്രിയങ്കയുടെ ശബ്ദമായിരുന്നു.

പ്രിയങ്കയ്ക്ക് സംഗീതം, എപ്പോഴും മരിച്ചുപോയ തന്റെ അച്ഛൻ ഡോ. അശോക് ചോപ്രയെ ആദരിക്കാനുള്ള ഒരു മാർഗ്ഗമായിരുന്നു. 'ഇൻ മൈ സിറ്റി' എന്ന ഗാനത്തിന്റെ പ്രചാരണത്തിനിടെ ഒരു പരിപാടിയിൽ സംസാരിക്കവെ അതേക്കുറിച്ചവർ പറഞ്ഞിരുന്നു. “ഇത് എന്റെ അച്ഛന്റെ സ്വപ്നമായിരുന്നു. എന്റെ പാട്ട് കേട്ടപ്പോൾ മാതാപിതാക്കൾ ഒരുപാട് വികാരാധീനരായി. എന്റെ അച്ഛൻ ഒരു മികച്ച ഗായകനാണ്, അദ്ദേഹത്തിന്റെ സ്വപ്നം സാക്ഷാത്കരിക്കാൻ കഴിഞ്ഞതിൽ എനിക്ക് സന്തോഷമുണ്ട്.”
അതേസമയം,പ്രിയങ്കയുടെ പുതിയ ട്രാക്കിനെ അനുകൂലിച്ചും പ്രതികൂലിച്ചും നിരവധി കമന്റുകൾ പുറത്തുവരുന്നുണ്ട്.
കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbiurl.in/grihalakshmi