പ്രശസ്തനടിയും സസെക്‌സ് രാജകുമാരിയുമായ മേഗൻ മാർക്കിൾ അവരുടെ പിതാവ് തോമസ് മാർക്കിളിൽനിന്ന് എത്രയോ നാളുകളായി അകന്നുകഴിയുകയാണ്. മേഗന് വെറും രണ്ടുവയസ്സുള്ളപ്പോഴാണ് അച്ഛനും അമ്മയും അകലുന്നത്. നാലുവർഷത്തിനുശേഷം വിവാഹമോചനവും നേടി. പിന്നാലെ അവർക്കിടയിലൊരു അകൽച്ചയുണ്ടായി. ഇടയ്ക്കിടെയുള്ള സൗഹൃദസന്ദർശനങ്ങളിൽ മാത്രം ആ ബന്ധമൊതുങ്ങി.

To advertise here,

ഇപ്പോഴിതാ തോമസ് വീണ്ടും വാർത്തകളിൽ നിറയുകയാണ്. കുട്ടികൾക്ക് നേരെയുള്ള ലൈംഗിക ചൂഷണവുമായി ബന്ധപ്പെട്ട ദൃശ്യങ്ങൾ കൈവശം വെച്ചെന്ന കുറ്റവുമായി യുഎസ് ഫെഡറൽ അധികൃതർ അദ്ദേഹത്തെ അറസ്റ്റ് ചെയ്തിരിക്കുകയാണ്.

പ്രായപൂർത്തിയാകാത്ത പെൺകുട്ടികൾക്കൊപ്പം നിൽക്കുന്ന ചിത്രങ്ങൾ ഉൾപ്പെടെ തോമസിൽനിന്ന് പോലീസ് കണ്ടെടുത്തു. 82 വയസ്സുകാരനായ ഇദ്ദേഹത്തെ എഫ്ബിഐ ഏജന്റുമാർ കസ്റ്റഡിയിലെടുക്കുകയും, അന്നുതന്നെ ഫെഡറൽ കോടതിയിൽ ഹാജരാക്കുകയും ചെയ്തു. തുടർന്ന്, വീട്ടുതടങ്കൽ, ഇലക്ട്രോണിക് നിരീക്ഷണം തുടങ്ങിയ ഉപാധികളോടെ, സ്വന്തം ജാമ്യത്തിൽ അദ്ദേഹത്തെ വിട്ടയച്ചു. അധികൃതർക്ക് വിവരം ലഭിച്ചതിനെത്തുടർന്ന് നടത്തിയ അന്വേഷണത്തിനൊടുവിലാണ് അറസ്റ്റ് നടന്നത്. തുടർന്ന്, അദ്ദേഹത്തിന്റെ കൈവശമുണ്ടായിരുന്ന ചിത്രങ്ങൾ ഉൾപ്പെടെയുള്ളവ കാലിഫോർണിയയിലെ സ്റ്റോറേജ് യൂണിറ്റുകളിൽ സൂക്ഷിച്ചിരുന്നതായി കണ്ടെത്തി. 2008 മുതൽ മേഗൻ ഈ സ്റ്റോറേജ് യൂണിറ്റുകൾ വാടകയ്ക്കെടുത്തിരുന്നുവെന്ന് അധികൃതർ കണ്ടെത്തിയിരുന്നു.

കുട്ടികൾക്കെതിരായ ലൈംഗിക ചൂഷണവുമായി ബന്ധപ്പെട്ട ഉള്ളടക്കമുള്ള സ്ലൈഡുകൾ, ഫോട്ടോഗ്രാഫുകൾ, 35 എംഎം ഫിലിം നെഗറ്റീവുകൾ, പുസ്തകങ്ങൾ എന്നിവയുൾപ്പെടെ ഏകദേശം 78 വസ്തുക്കളാണ് അന്വേഷണ ഉദ്യോഗസ്ഥർ പിടിച്ചെടുത്തത്. ഈ വസ്തുക്കൾ പരിശോധിച്ചുവരികയാണെന്ന് എഫ്ബിഐ അറിയിച്ചു. പ്രായപൂർത്തിയാവാത്ത കുട്ടികൾക്കൊപ്പം തോമസ് ഉള്ള ചിത്രങ്ങളും വീഡിയോകളും അതിലുണ്ടെന്ന് പറയപ്പെടുന്നു.

ഈ റിപ്പോർട്ട് പുറത്തുവന്നതോടെ മേഗൻ മാർക്കിളും പിതാവും തമ്മിൽ ദീർഘകാലമായി നിലനിൽക്കുന്ന അകൽച്ച വീണ്ടും ചർച്ചാവിഷയമാവുകയാണ്. എന്തുകൊണ്ടാണ് മേഗനും തോമസും തമ്മിലുള്ള ബന്ധം മോശമായതെന്ന് എല്ലാവർക്കും ഇപ്പോൾ മനസ്സിലായിട്ടുണ്ടാവുമെന്നും മേഗനോട് അടുത്തവർ പറഞ്ഞതായി റിപ്പോർട്ടുകൾ സൂചിപ്പിക്കുന്നു. 2018-ലാണ് മേഗനും തോമസും പൂർണമായും അകലുന്നത്.

ഹാരി രാജകുമാരനുമായുള്ള വിവാഹത്തിന് മുന്നോടിയായി, പപ്പരാസികളെ ഉപയോഗിച്ച് കൃത്രിമമായി ചിത്രങ്ങൾ എടുത്തതുമായി ബന്ധപ്പെട്ട വിവാദങ്ങൾ ഉയർന്നുവന്നതുമുതലാണ് മേഗനും പിതാവും തമ്മിൽ അകന്നതെന്ന് 'ന്യൂസ് നേഷൻ' നേരത്തെ റിപ്പോർട്ട് ചെയ്തിരുന്നു. തുടർന്ന് നടന്ന രാജകീയ വിവാഹച്ചടങ്ങിൽ തോമസ് പങ്കെടുത്തില്ല. ഏകദേശം അതേ സമയത്ത് തോമസിനെതിരെ ലൈംഗികാരോപണങ്ങളും പുറത്തുവന്നിരുന്നു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi