ഈച്ചശല്യം കാരണം വലയുകയാണോ? കെമിക്കൽ സ്പ്രേ വേണ്ട, നട്ടുവളർത്താം ഈ ചെടികൾ!

വീട്ടിലും അടുക്കളയിലും വന്നിരിക്കുന്ന ഈച്ചകൾ എന്നും വലിയൊരു തലവേദന തന്നെയാണ്. ഇതിനായി രാസവസ്തുക്കൾ അടങ്ങിയ സ്പ്രേകളും മറ്റും ഉപയോഗിക്കുന്നത് ആരോഗ്യത്തിന് ദോഷം ചെയ്തേക്കാം. എന്നാൽ ഇതിന് പരിഹാരമായി പ്രകൃതിദത്തമായ ഒരു വഴിയുണ്ട്. ചില ചെടികൾ തോട്ടത്തിൽ നട്ടുവളർത്തുന്നതിലൂടെ ഈച്ചശല്യം ഒഴിവാക്കാനും ഒപ്പം വീടിന് സുഗന്ധവും അഴകും നൽകാനും സാധിക്കും.

ഈച്ചകളെയും മറ്റ് കീടങ്ങളെയും സ്വാഭാവികമായി അകറ്റിനിർത്താൻ സഹായിക്കുന്ന ഏഴ് ചെടികൾ ഇതാ.

ബേസിൽ
പാചകത്തിന് ഉപയോഗിക്കുന്ന ബേസിൽ (തുളസി വർഗ്ഗത്തിൽപ്പെട്ട ചെടി) ഈച്ചകളെ അകറ്റാൻ വളരെ മികച്ചതാണ്. ഇതിന്റെ ഇലകളിൽ നിന്നുള്ള ശക്തമായ സുഗന്ധം ഈച്ചകൾക്ക് ഇഷ്ടമല്ല. വീടിന്റെ മുൻവാതിലുകൾക്ക് സമീപത്തോ, ഉമ്മറത്തോ, അടുക്കളയിലെ ജനലരികിലോ ഇവ നട്ടുവളർത്തുന്നത് ഈച്ചകൾ അകത്തു കടക്കാതിരിക്കാൻ സഹായിക്കും.

ലാവെൻഡർ
ലാവെൻഡറിന്റെ ശാന്തവും സുഖകരവുമായ സുഗന്ധം എല്ലാവർക്കും ഇഷ്ടമാണ്. എന്നാൽ ഈച്ചകൾക്കും കൊതുകുകൾക്കും ഇത് അസഹനീയമാണ്. ലാവെൻഡറിലടങ്ങിയിരിക്കുന്ന എസെൻഷ്യൽ ഓയിലുകളാണ് കീടങ്ങളെ അകറ്റുന്നത്. നല്ല വെയിൽ ലഭിക്കുന്ന സ്ഥലങ്ങളിൽ ഇവ വളർത്തുന്നത് കാറ്റിലൂടെ സുഗന്ധം പടരാൻ സഹായിക്കും.

പുതീന
വളരെ പെട്ടെന്ന് പടർന്നുപന്തലിക്കുന്ന ഒരു സസ്യമാണ് പുതീന. ഇതിന്റെ രൂക്ഷമായ മണം ഈച്ചകൾക്ക് പുറമെ ഉറുമ്പ്, എലി എന്നിവയെയും അകറ്റിനിർത്തും. നിലത്ത് നട്ടാൽ വേഗത്തിൽ പടരുന്നതിനാൽ, ജനലുകൾക്കോ ഇരിപ്പിടങ്ങൾക്കോ സമീപം ചട്ടികളിൽ വളർത്തുന്നതാണ് കൂടുതൽ അനുയോജ്യം.

റോസ്മേരി
പ്രത്യേക തരം സുഗന്ധമുള്ള റോസ്മേരി, ഈച്ചകൾ തീരെ അടുക്കാത്ത ഒരു സസ്യമാണ്. ചൂടുള്ളതും വരണ്ടതുമായ കാലാവസ്ഥയിൽ ഇവ നന്നായി വളരും. കുറഞ്ഞ പരിചരണം മാത്രം ആവശ്യമുള്ള ഈ ചെടി മുറ്റത്തോ ചെടിച്ചട്ടികളിലോ വളർത്താവുന്നതാണ്.

ചെണ്ടുമല്ലി
മഞ്ഞയും ഓറഞ്ചും നിറത്തിലുള്ള പൂക്കളാൽ മനോഹരമായ ചെണ്ടുമല്ലിയിൽ (Marigolds) കീടനാശിനികളിൽ ഉപയോഗിക്കുന്ന പ്രകൃതിദത്ത സംയുക്തങ്ങൾ അടങ്ങിയിട്ടുണ്ട്. ഇതിന്റെ പ്രത്യേക മണം ഈച്ചകളെയും തോട്ടത്തിലെ മറ്റ് കീടങ്ങളെയും അകറ്റി നിർത്തുന്ന ഒരു കവചമായി പ്രവർത്തിക്കുന്നു.

സിട്രോനെല്ല പുല്ല്
നാരങ്ങയുടെ മണമുള്ള സിട്രോനെല്ല (Citronella Grass) കീടങ്ങളെ അകറ്റാൻ ഏറ്റവും നല്ലതാണ്. ഈച്ചകളെയും കൊതുകുകളെയും ആകർഷിക്കുന്ന മണം മറയ്ക്കാൻ ഈ ചെടിക്ക് സാധിക്കും. വീടിന് വെളിയിലെ ഇരിപ്പിടങ്ങൾക്ക് സമീപം വലിയ അലങ്കാരച്ചട്ടികളിൽ ഇവ വളർത്താം.

ലെമൺഗ്രാസ്
സിട്രോനെല്ലയിലുള്ളതുപോലെ തന്നെ കീടങ്ങളെ അകറ്റുന്ന എസെൻഷ്യൽ ഓയിലുകൾ ലെമൺഗ്രാസിലും (Lemongrass) അടങ്ങിയിട്ടുണ്ട്. ഉയരത്തിൽ പച്ചപ്പോടെ വളരുന്ന ഈ ചെടി തോട്ടത്തിന് ഭംഗി നൽകുന്നതോടൊപ്പം ഈച്ചകളെ അകറ്റി നിർത്തി സുഗന്ധപൂരിതമായ അന്തരീക്ഷം സൃഷ്ടിക്കുകയും ചെയ്യുന്നു.

രാസവസ്തുക്കളുടെ ഉപയോഗം കുറച്ച്, സ്വാഭാവികമായ രീതിയിൽ വീടും പരിസരവും ശുചിയായും സുഗന്ധപൂരിതമായും സൂക്ഷിക്കാൻ ഈ ചെടികൾ നിങ്ങളുടെ തോട്ടത്തിന്റെ ഭാഗമാക്കൂ.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi