അമ്മയുടെ മരണശേഷം, അമ്മയുടെ ആഗ്രഹം നിറവേറ്റുന്നതിനുവേണ്ടി മാത്രമാണ് ഞാൻ സിനിമയിലെത്തിയത്; ഷാരൂഖ് ഖാൻ

ഇന്ന് ലോകമെമ്പാടും ആരാധകരുള്ള ബോളിവുഡ് സൂപ്പർതാരമാണ് ഷാരൂഖ് ഖാൻ. എന്നാൽ സിനിമയിലെത്തുന്നതിനു മുൻപ് അഭിനയലോകത്തോട് വലിയ താൽപര്യമൊന്നും തോന്നിയിരുന്നില്ല അദ്ദേഹത്തിന്. ടെലിവിഷൻ രംഗത്ത് ശ്രദ്ധ നേടിയിരുന്ന കാലത്തുപോലും സിനിമയിലേക്ക് ചുവടുവയ്ക്കുന്നതിനെക്കുറിച്ച് അദ്ദേഹം ആശങ്കപ്പെട്ടിരുന്നു. 1991ൽ നൽകിയ ഒരു അഭിമുഖത്തിൽ, സിനിമയിലെത്താൻ വൈകിപ്പോയോ എന്ന സംശയം പോലും ഷാരൂഖ് പങ്കുവച്ചിരുന്നു. എന്നാൽ അമ്മയുടെ ആഗ്രഹം നിറവേറ്റണമെന്ന ചിന്തയാണ് ഒടുവിൽ അദ്ദേഹത്തെ സിനിമയിലേക്ക് അടുപ്പിച്ചത്.

സിനിമയിൽ വലിയ താരമാകുന്നതിനു മുൻപ് ടെലിവിഷൻ പരമ്പരകളിലൂടെയാണ് ഷാരൂഖ് ഖാൻ ശ്രദ്ധ നേടിയത്. 1991 ആയപ്പോഴേക്കും 'ചമത്കാർ', 'ദിൽ ആശ്‌നാ ഹൈ', 'കിങ് അങ്കിൾ' തുടങ്ങിയ ചിത്രങ്ങളിൽ അഭിനയിക്കാൻ അദ്ദേഹം കരാറൊപ്പിട്ടിരുന്നു. എന്നാൽ 1992ൽ പുറത്തിറങ്ങിയ 'ദീവാന' ആയിരുന്നു അദ്ദേഹത്തിന്റെ ആദ്യ തിയറ്റർ റിലീസ്.

സിനിമാലോകത്തോടുള്ള തന്റെ അകൽച്ചയെക്കുറിച്ച് അന്നത്തെ അഭിമുഖത്തിൽ ഷാരൂഖ് തുറന്നുപറഞ്ഞിരുന്നു. സിനിമകളോട് ഒരിക്കലും വലിയ ആകർഷണം തോന്നിയിട്ടില്ലെന്നും സിനിമാമേഖലയുടെ രീതികളെക്കുറിച്ച് കേൾക്കുമ്പോൾ പോലും അസ്വസ്ഥത തോന്നിയിരുന്നെന്നും അദ്ദേഹം പറഞ്ഞു. എന്നാൽ 1991ൽ അമ്മ ലതീഫ് ഫാത്തിമ ഖാൻ മരിച്ചതോടെ തന്റെ തീരുമാനത്തിൽ മാറ്റമുണ്ടായി. അമ്മയുടെ ആഗ്രഹം നിറവേറ്റുന്നതിനായി സിനിമയിൽ അഭിനയിക്കാൻ തീരുമാനിക്കുകയായിരുന്നു അദ്ദേഹം.

“സിനിമകളോട് എനിക്ക് ഒരിക്കലും വലിയ താൽപര്യം തോന്നിയിട്ടില്ല. സത്യത്തിൽ, സിനിമാമേഖലയെക്കുറിച്ചും അവിടത്തെ രീതികളെക്കുറിച്ചും കേൾക്കുമ്പോൾ എനിക്ക് അസ്വസ്ഥത തോന്നിയിരുന്നു. ആ ലോകത്തിന്റെ ഭാഗമാകുക എന്നത് അവസാനമായി മാത്രം ആഗ്രഹിച്ചിരുന്ന കാര്യമായിരുന്നു. എന്നാൽ അമ്മ മരിച്ചതോടെ എന്റെ തീരുമാനം മാറി. എനിക്ക് അമ്മയെ അത്രയേറെ ഇഷ്ടമായിരുന്നു. ഒരുനാൾ എന്നെ വെള്ളിത്തിരയിൽ കാണണമെന്ന് അമ്മ എപ്പോഴും ആഗ്രഹിച്ചിരുന്നു. ഒരുപക്ഷേ, സിനിമയിലെത്താൻ വൈകിപ്പോയിരിക്കാം. എങ്കിലും അമ്മയ്ക്കുവേണ്ടിയാണ് ഞാൻ ഇതു ചെയ്യുന്നത്” എന്നായിരുന്നു ഷാരൂഖിന്റെ വാക്കുകൾ.

ഡൽഹിയിലെ വീട്ടിൽ തുടരുന്നതും അദ്ദേഹത്തിന് പ്രയാസമായിരുന്നു. അവിടെയുള്ള ഓരോ കാര്യവും അമ്മയുടെ ഓർമകളിലേക്ക് നയിച്ചു. അതിനാൽ മുംബൈയിലേക്ക് താമസം മാറി, ജോലിയിൽ മുഴുകി പുതിയൊരു ജീവിതം തുടങ്ങാനായിരുന്നു അദ്ദേഹത്തിന്റെ തീരുമാനം.

അഭിനയം പഠിക്കുന്നതിനെക്കുറിച്ചും ഷാരൂഖിന് അന്ന് വ്യത്യസ്തമായ കാഴ്ചപ്പാടുണ്ടായിരുന്നു. അഭിനയിക്കാൻ പ്രത്യേക പരിശീലനക്ലാസുകൾ അനിവാര്യമല്ലെന്നായിരുന്നു അദ്ദേഹത്തിന്റെ നിലപാട്. മറ്റുള്ളവരുടെ പ്രകടനങ്ങൾ നിരീക്ഷിക്കുന്നതിലൂടെയും സ്വന്തം തെറ്റുകളിൽനിന്ന് പഠിക്കുന്നതിലൂടെയും അഭിനയമികവ് മെച്ചപ്പെടുത്താമെന്ന് അദ്ദേഹം വിശ്വസിച്ചു.

“മോശമായി അഭിനയിക്കുന്നവരെ കണ്ടും അവർ എവിടെയാണ് തെറ്റുകൾ വരുത്തുന്നതെന്ന് മനസ്സിലാക്കിയുമാണ് ഞാൻ അഭിനയം പഠിച്ചത്. ആഷാ ചന്ദ്രയുടെയോ റോഷൻ തനേജയുടെയോ അഭിനയപരിശീലന ക്ലാസുകളിൽ പോകുന്നതിനെക്കുറിച്ച് ഞാൻ ചിന്തിക്കുകപോലുമില്ല. അഭിനയിക്കാൻ ആരെയും പഠിപ്പിക്കാനാകുമെന്ന് ഞാൻ വിശ്വസിക്കുന്നില്ല. ആ കഴിവ് ഉള്ളിൽനിന്ന് വരേണ്ടതാണ്. തീർച്ചയായും, മറ്റെല്ലാ കാര്യങ്ങളെയും പോലെ പരിശീലനത്തിലൂടെ അഭിനയവും മെച്ചപ്പെടും. തെറ്റുകൾ വരുത്തുകയും അവയിൽനിന്ന് പഠിക്കുകയും ചെയ്യുകയാണ് വേണ്ടത്”, അദ്ദേഹം അഭിമുഖത്തിൽ പറഞ്ഞു.

മൂന്നു പതിറ്റാണ്ടിലേറെ നീണ്ട കരിയറിൽ, ഇന്ത്യൻ സിനിമയിലെ ഏറ്റവും ശ്രദ്ധേയരായ താരങ്ങളിലൊരാളായി ഇന്ന് ഷാരൂഖ് ഖാൻ മാറി. വൈവിധ്യമാർന്ന കഥാപാത്രങ്ങളിലൂടെ, ബോക്സ്ഓഫീസ് ഹിറ്റുകളിലൂടെ അദ്ദേഹം ആഗോളതലത്തിൽ ശ്രദ്ധനേടി. ഇപ്പോൾ സിദ്ധാർഥ് ആനന്ദ് സംവിധാനം ചെയ്യുന്ന 'കിങ്' ആണ് ഷാരൂഖിന്റെ വരാനിരിക്കുന്ന പുതിയ ചിത്രം. ഡിസംബർ 24ന് ചിത്രം പ്രദർശനത്തിനെത്തുമെന്ന പ്രതീക്ഷയിലാണ് ആരാധകർ.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi