കയറ്റുമതിയിൽ താരമായ മദ്ദൂർ വട; ഇന്ദിരാഗാന്ധിയുടെ ഇഷ്ടരുചി

മനഗരത്തിലെ കസേരക്കടകൾ, ചന്നപട്ടണയിലെ കളിപ്പാട്ടക്കടകൾ, മൈസൂരു കൊട്ടാരം, ശ്രീരംഗപട്ടണത്തിലെ ചരിത്രസ്മാരകങ്ങൾ എന്നിവ സന്ദർശിച്ചതിനുശേഷമാണ് മദ്ദൂരിലെത്തിയത്. മൈസൂരു-ബെംഗളൂരു ഹൈവേയിൽ സ്ഥിതിചെയ്യുന്ന, മാണ്ഡ്യ ജില്ലയിലെ പട്ടണമാണ് മദ്ദൂർ. ഒറ്റനോട്ടത്തിൽ, ഒരു സാധാരണയിടം. എന്നാൽ, ഐതിഹാസികമായ ഒരു പെരുമയുണ്ട് ഈ നാടിന്. പ്രസിദ്ധമായ മദ്ദൂർവടയുടെ ജന്മനാടെന്ന പ്രശസ്തി. മദ്ദൂരിന്റെ ഏറ്റവും പ്രശസ്തമായ കയറ്റുമതിയും വടതന്നെ. കർണാടകയുടെ പാചകനൈപുണിയെ ലോകപ്രശസ്തമാക്കിയ വട രുചിക്കാതെ കടന്നുപോകുന്നതെങ്ങനെ? മദ്ദൂരിൽ എത്തിയപ്പോൾതന്നെ അന്തരീക്ഷത്തിൽ വടയുടെ ഗന്ധം. ട്രാഫിക് സ്റ്റോപ്പുകളിൽ വട പാക്കറ്റുകൾ വിൽക്കുന്ന വഴിയോര കച്ചവടക്കാർ. ഭക്ഷണശാലകളിൽ ചൂടൻ വടയുടെ കൂമ്പാരങ്ങൾ. സംസ്ഥാനപാത 17-ലൂടെയുള്ള യാത്രയ്ക്കിടെ സാധാരണമായി നിർത്താറുള്ള മദ്ദൂർ ടിഫാനിസിൽനിന്ന് നല്ല സ്വാദുള്ള മദ്ദൂർ വട കഴിച്ചു.

ഐതിഹ്യപ്രകാരം, ഒരു ചെറിയ പാചകപ്പിഴവാണ് മദ്ദൂർ വടയുടെ പിറവിക്ക് കാരണമായത്. 1917-ൽ മദ്ദൂർ റെയിൽവേ സ്റ്റേഷനിൽ പക്കോടയും ഇഡ്ഡലിയും വിറ്റിരുന്ന കുന്ദാപുരത്തുകാരനായ രാമചന്ദ്ര ബുധിയ എന്ന സംരംഭകനാണ് വടയുടെ പിന്നിൽ. മദ്ദൂരിനടുത്ത് ഒഴുകുന്ന ഷിംഷാ നദി എല്ലാത്തിനും സാക്ഷി. 20-ാം നൂറ്റാണ്ടിന്റെ തുടക്കത്തിൽ, സ്റ്റീം എൻജിനുകളുള്ള തീവണ്ടികൾ ബെംഗളൂരുവിലേക്ക് പോകാനായി മീറ്റർ ഗെയ്ജ് ട്രാക്കുകളിലൂടെ ചീറിപ്പാഞ്ഞിരുന്ന കാലം. എല്ലാ തീവണ്ടികളും ഷിംഷാ നദിയിൽനിന്നായിരുന്നു വെള്ളം നിറച്ചിരുന്നത്. അതിനുവേണ്ടി 20 മുതൽ 30 വരെ മിനിറ്റ് മദ്ദൂരിൽ നിർത്തിയിട്ടിരുന്നു. തീവണ്ടികൾ മദ്ദൂരിൽ നിർത്തിയപ്പോൾ രാമചന്ദ്ര ബുധിയ വലിയ ലാഭമുണ്ടാക്കി.

Content Highlights: Origin of the legendary Maddur Vada at Maddur railway station in 1917., Unique ingredients including semolina, rice flour, onions, and curry leaves., Historical evolution from a railway station snack to a global culinary icon., Modern variations including Jain and gourmet versions like Pista and Sesame Vada.