രണ്ടില്‍ കൂടുതല്‍ കറികള്‍ കൂട്ടി ഉണ്ണാന്‍ എന്തെങ്കിലും വിശേഷം വരാന്‍ കാത്തിരിക്കുന്നവര്‍ക്ക് ഇപ്പോഴും ഓണം ആനന്ദം തന്നെയാണ്

ഇപ്പോഴത്തെ ഓണം ഒന്നുമല്ല ഓണം, പണ്ടത്തെ ഓണമാണ് എന്ന് പറയുന്നത് പഴയ ദാരിദ്ര്യം നിങ്ങള്‍ മറന്നു പോയതുകൊണ്ടാണ്. ഇന്ന് ഒന്നിനും കുറവില്ലാത്തതു കൊണ്ടും. ഓണത്തിനും പിറന്നാളിനും മാത്രം ഓരോ പുതിയ ഉടുപ്പുകള്‍ കിട്ടുന്ന, രണ്ടില്‍ കൂടുതല്‍ കറികള്‍ കൂട്ടി ഉണ്ണാന്‍ എന്തെങ്കിലും വിശേഷം വരാന്‍ കാത്തിരിക്കുന്നവര്‍ക്ക് ഇപ്പോഴും ഓണം ആനന്ദം തന്നെയാണ്.

നിറങ്ങളോടും രുചികളോടും അടങ്ങാത്ത കൊതിയുള്ള പെണ്‍കുട്ടി കാത്തിരിക്കുന്ന ആഘോഷം ഓണമായിരുന്നു. പത്ത് പന്ത്രണ്ട് ദിവസങ്ങള്‍ പൂനിറങ്ങള്‍ മുറ്റത്ത് ഒരുക്കിവയ്ക്കുമ്പോള്‍ കിട്ടുന്ന നിര്‍വൃതി! പൂക്കള്‍ തേടിയലഞ്ഞ സന്ധ്യകളിലാണ് നമ്മുടെ കണ്ണില്‍ പെടാത്ത എത്രയോ കുഞ്ഞന്‍ പൂവുകള്‍ ചുറ്റുമുണ്ടെന്ന് മനസിലായത്. ആര്‍ക്കും വേണ്ടാതെ വേലി മൂടി വളര്‍ന്നു പടര്‍ന്നു പൂത്ത ചെമ്പരത്തിക്ക് രാജകീയ പരിഗണനയാണ് പൂക്കളത്തില്‍. മത്തന്‍ പൂവിനും കുമ്പളപ്പൂവിനും ചെറുതല്ലാത്ത സ്ഥാനമുണ്ട്. മുക്കുറ്റിയോ തുളസിക്കതിരോ അരിപ്പൂവോ ആവട്ടെ, എല്ലാത്തിനും ആവശ്യക്കാരുണ്ട്. ഒരു കൃഷ്ണകിരീടം ഓടിച്ചെടുത്താല്‍ വലിയ പൂക്കളം ഒരുക്കാന്‍ ധൈര്യമായി. വേനലിന് മുന്‍പ് വെട്ടിയൊതുക്കിയ പൂച്ചെടികള്‍ ഓണം കഴിയുന്നത് വരെ ആരും തൊടില്ല.

Content Highlights: A heartwarming journey back to childhood Onam celebrations filled with flowers, new clothes, delicious feasts, and cherished family moments