'ഗുഡ്‌ബൈ ഇന്ത്യ...'16 വർഷങ്ങൾക്കുശേഷം ഇന്ത്യയോട് വിടപറഞ്ഞ് മന്ദന കരീമി; കാരണമിതെന്ന് താരം

മന്ദന കരീമി | IMDb
മന്ദന കരീമി | IMDb

ബോളിവുഡിൽ ഭാഗ്യം പരീക്ഷിക്കാനായി വിദേശത്തുനിന്ന് ഇങ്ങോട്ടേക്ക് എത്തിയ പല താരങ്ങളുമുണ്ട്. അവരിൽ പലരും പിന്നെ ഈ രാജ്യത്തെ സ്വന്തം സ്ഥലമായി നെഞ്ചോട് ചേർത്തവരുമാണ്. കത്രീന കൈഫ്, നർത്തകിയും നടിയുമായ നോറ ഫത്തേഹി, മോഡലും നടിയുമായ നതാഷ സ്റ്റാൻകോവിച്ച്, ഐറ്റംഡാൻസറായ യാനാ ഗുപ്ത തുടങ്ങിയവർ അവരിൽ ചിലരാണ്.

ആ ലിസ്റ്റിൽ ഉൾപ്പെടുത്താവുന്ന മറ്റൊരു താരമാണ് മന്ദന കരീമി. ഇറാനിൽനിന്നുള്ള നടിയും മോഡലുമാണവർ. ജനിച്ചത് ഇറാനിലെ ടെഹ്‌റാനിൽ. എയർഹോസ്റ്റസായിട്ടാണ് കരിയർ തുടങ്ങിയത്. മോഡലിങ്ങിൽ താത്പര്യം തോന്നിയപ്പോൾ, ആ ജോലി ഉപേക്ഷിച്ചു. മോഡലിങ്ങിൽ പലപ്പോഴായി ഭാഗ്യം പരീക്ഷിച്ച ശേഷമാണ് അവർ ഇന്ത്യയിലേക്കെത്തുന്നത്. 2010-ൽ മൂന്നുമാസത്തെ മോഡലിങ് കോൺട്രാക്ടുമായിട്ടാണ് മന്ദന മുംബൈയിലെത്തുന്നത്.

നാട്ടിലേക്ക് തിരിച്ചുപോയെങ്കിലും, ഇടയ്ക്കിടെ അവർ മുംബൈയിലേക്ക് വന്നുകൊണ്ടിരുന്നു. 2013-ൽ ഇവിടെ സ്ഥിരതാമസമാക്കി. ഷാരൂഖ് ഖാൻ, സെയ്ഫ് അലി ഖാൻ, കരീന കപൂർ, ഷാഹിദ് കപൂർ എന്നിവർക്കൊപ്പം പരസ്യങ്ങളിൽ അഭിനയിക്കാനുള്ള അവസരമുണ്ടായി. പിന്നാലെ ബോളിവുഡിലേക്കും. 2015-ൽ റിലീസായ 'ഭാഗ് ജോണി' എന്ന സിനിമയിൽ നായികയായി. അതേ വർഷം തന്നെ ഹിന്ദി റിയാലിറ്റി ഷോ ആയ 'ബിഗ് ബോസി'ൽ താരം പങ്കെടുത്തു, രണ്ടാം റണ്ണറപ്പ് ആവുകയും ചെയ്തു. മേം ഓർ ചാൾസ്, ക്യാ കൂൽ ഹേ ഹം 3 തുടങ്ങിയ ചിത്രങ്ങളിലും അഭിനയിച്ചു. ഇഷ്‌ക്ബാസ്, ദ കാസിനോ തുടങ്ങിയ പരമ്പരകളുടെയും ഭാഗമായി. 2022-ൽ പുറത്തിറങ്ങിയ 'താർ' എന്ന സിനിമയിലാണ് മന്ദന ഒടുവിലായി അഭിനയിച്ചത്.

ഇപ്പോഴിതാ നീണ്ട 16 വർഷങ്ങൾക്കുശേഷം ഇന്ത്യയിൽനിന്ന് മടങ്ങിപ്പോയിരിക്കുകയാണ് മന്ദന. 'Ask Me Anything'-ലൂടെ തന്റെ തീരുമാനം പ്രേക്ഷകരുമായി അവർ പങ്കുവെക്കുകയും ചെയ്തു. ആ തീരുമാനത്തിലുള്ള കാരണങ്ങളെക്കുറിച്ചും മന്ദന തുറന്നുപറഞ്ഞു.

വിമാനത്താവളത്തിൽനിന്നുള്ള ഒരു വീഡിയോയും മന്ദന പോസ്റ്റ് ചെയ്തിരുന്നു. ''എനിക്കൊരിക്കലും മുംബൈ വിട്ടുപോകുമെന്ന് സങ്കൽപ്പിക്കാനോ വിശ്വസിക്കാനോ കഴിയുന്നില്ല. പക്ഷേ ഇപ്പോൾ എനിക്ക് പറയാൻ കഴിയും, ഗുഡ്‌ബൈ ഇന്ത്യ''.

ഈ തീരുമാനം വളരെ വേദനാജനകമാണെന്നും താരം കൂട്ടിച്ചേർത്തു. ''ഇതേറെ ബുദ്ധിമുട്ടേറിയ തീരുമാനമാണ്. ഏകദേശം 16 വർഷമായി ഞങ്ങൾ ഇന്ത്യയിൽ. ഒടുവിലിപ്പോൾ എന്റെ രണ്ടാമത്തെ വീട് ഉപേക്ഷിക്കുകയാണ്. ഇതാ പുതിയ ചില തുടക്കങ്ങളിലേക്ക്. പുതിയ രാജ്യം, പുതിയ വീട്, എല്ലാം പുതിയത്''.

ഈ വർഷമാദ്യം, എൻഡിടിവിക്ക് നൽകിയ അഭിമുഖത്തിൽ, സുരക്ഷാ കാരണങ്ങളാൽ താൻ ഇന്ത്യ വിടാൻ ഒരുങ്ങുന്നതായി മന്ദന സ്ഥിരീകരിച്ചിരുന്നു. എന്നാൽ അതിന്റെ വിശദാംശങ്ങളൊന്നും അന്ന് മന്ദന നൽകിയിരുന്നില്ല.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Mandana Karimi leaves India after 16 years of residence. The actress confirmed her departure through an 'Ask Me Anything' session. She cited personal reasons and safety concerns for her decision to relocate.