ഓർമ്മകൾ ജീവിതത്തിന്റെ വിലപ്പെട്ട ഭാഗമാണ്. എന്നാൽ, പതിവായ മറവികൾ ക്രമേണ ദൈനംദിന ജീവിതത്തെ ബാധിക്കുന്ന തരത്തിലേക്ക് മാറുമ്പോൾ അത് പ്രായത്തിന്റെ സ്വാഭാവിക മാറ്റം മാത്രമായി കാണരുത്. അൽഷൈമേഴ്‌സ്‌ രോഗം ഉൾപ്പെടെയുള്ള ഡിമെൻഷ്യയുടെ തുടക്കലക്ഷണമാകാം ഇത്.

To advertise here,

ഒരേ കാര്യങ്ങൾ വീണ്ടും വീണ്ടും ചോദിക്കുക, അടുത്തിടെയുണ്ടായ കാര്യങ്ങൾ ഓർമ്മിക്കാനാകാതെ വരിക, പരിചിതമായ സ്ഥലങ്ങളിലും വഴിതെറ്റുക, ശരിയായ വാക്കുകൾ കണ്ടെത്താൻ ബുദ്ധിമുട്ടുക, പതിവായി ചെയ്യുന്ന കാര്യങ്ങൾ ചെയ്യുന്നതിൽ പ്രയാസം നേരിടുക തുടങ്ങിയവ ശ്രദ്ധിക്കേണ്ട പ്രധാന സൂചനകളാണ്. വ്യക്തിത്വത്തിലും പെരുമാറ്റത്തിലും ഉണ്ടാകുന്ന മാറ്റങ്ങളും അവഗണിക്കരുത്.

അൽഷൈമേഴ്‌സ്‌ എന്താണ്?
തലച്ചോറിലെ നാഡീകോശങ്ങളുടെ പ്രവർത്തനത്തെ ക്രമേണ ബാധിക്കുന്ന ഒരു രോഗമാണ് അൽഷൈമേഴ്‌സ്‌. ഓർമ്മ, ചിന്ത, ആശയവിനിമയം, തീരുമാനമെടുക്കൽ തുടങ്ങിയ കഴിവുകൾ ക്രമേണ കുറയാൻ ഇത് കാരണമാകാം. സാധാരണയായി പ്രായം കൂടുന്നതിനനുസരിച്ച് സാധ്യത വർധിക്കുമെങ്കിലും, അൽഷൈമേഴ്‌സ്‌ സാധാരണ വാർധക്യത്തിന്റെ ഭാഗമല്ല.

രോഗം ക്രമേണ പുരോഗമിക്കുന്നതിനാൽ തുടക്കത്തിലെ ചെറിയ മാറ്റങ്ങൾ പോലും ശ്രദ്ധിക്കേണ്ടതാണ്. ഒരിക്കൽ ഓർമ്മയിൽ ഉണ്ടായിരുന്ന കാര്യങ്ങൾ മറക്കുന്നതിന് പുറമെ, ദൈനംദിന ജീവിതത്തെ ബാധിക്കുന്ന തരത്തിലുള്ള മാറ്റങ്ങളാണ് കൂടുതൽ ശ്രദ്ധിക്കേണ്ടത്.

മറവിക്ക് പിന്നിൽ അൽഷൈമേഴ്‌സ്‌ മാത്രമാകണമെന്നില്ല
എല്ലാ മറവിയും അൽഷൈമേഴ്സിന്റെ ലക്ഷണമല്ല. ഉറക്കക്കുറവ്, ചില മരുന്നുകളുടെ ഉപയോഗം, വിഷാദം, പോഷകക്കുറവ്, തൈറോയ്ഡ് സംബന്ധമായ പ്രശ്‌നങ്ങൾ തുടങ്ങിയ മറ്റ് കാരണങ്ങളും ഓർമ്മക്കുറവിന് കാരണമാകാം.

അതുകൊണ്ട് തുടർച്ചയായോ ക്രമേണ വർധിച്ചുവരുന്നതോ ആയ ഓർമ്മക്കുറവ് അനുഭവപ്പെട്ടാൽ സ്വയം രോഗനിർണയം നടത്താതെ വിദഗ്ധ ഡോക്ടറുടെ സഹായം തേടുകയാണ് ഉചിതം.

രോഗത്തിന്റെ വിവിധ ഘട്ടങ്ങൾ
അൽഷൈമേഴ്‌സ്‌ സാധാരണയായി ക്രമേണ പുരോഗമിക്കുന്ന രോഗമാണ്. തുടക്കത്തിൽ ചെറിയ ഓർമ്മക്കുറവുകളായിരിക്കും ശ്രദ്ധയിൽപ്പെടുക. പിന്നീട് വ്യക്തിക്ക് ദൈനംദിന കാര്യങ്ങൾ സ്വതന്ത്രമായി ചെയ്യുന്നതിൽ ബുദ്ധിമുട്ട് അനുഭവപ്പെടാം.

രോഗം കൂടുതൽ പുരോഗമിക്കുമ്പോൾ കുടുംബാംഗങ്ങളെ തിരിച്ചറിയുന്നതിലും ആശയവിനിമയം നടത്തുന്നതിലും സ്വന്തം കാര്യങ്ങൾ ചെയ്യുന്നതിലും സഹായം ആവശ്യമായി വന്നേക്കാം. ഓരോ വ്യക്തിയിലും രോഗത്തിന്റെ പുരോഗതി വ്യത്യസ്തമായിരിക്കാം.

രോഗനിർണയം എങ്ങനെ?
അൽഷൈമേഴ്‌സ്‌ കണ്ടെത്തുന്നതിന് ഒരൊറ്റ പരിശോധന മാത്രം മതിയാകണമെന്നില്ല. രോഗിയുടെ ഓർമ്മയിലും ചിന്താശേഷിയിലും ഉണ്ടായ മാറ്റങ്ങൾ, ദൈനംദിന പ്രവർത്തനങ്ങളിലെ ബുദ്ധിമുട്ടുകൾ, ആരോഗ്യചരിത്രം, മരുന്നുകളുടെ ഉപയോഗം തുടങ്ങിയവ ഡോക്ടർ വിലയിരുത്തും.

ആവശ്യാനുസരണം ഓർമ്മശേഷിയും ചിന്താശേഷിയും വിലയിരുത്തുന്ന പരിശോധനകൾ, രക്തപരിശോധനകൾ, തലച്ചോറിന്റെ സ്‌കാനിംഗ് ഉൾപ്പെടെയുള്ള മറ്റ് പരിശോധനകളും നിർദേശിക്കാം. മറ്റ് കാരണങ്ങളാൽ ഉണ്ടാകുന്ന ഓർമ്മക്കുറവ് ഒഴിവാക്കാനും ഇത്തരം വിലയിരുത്തലുകൾ സഹായിക്കും.

നേരത്തെ തിരിച്ചറിയാം
അൽഷൈമേഴ്സിന് നിലവിൽ പൂർണ്ണമായ രോഗമുക്തി ഉറപ്പാക്കുന്ന ചികിത്സയില്ലെങ്കിലും, രോഗം നേരത്തെ തിരിച്ചറിയുന്നത് ഏറെ പ്രധാനമാണ്. കൃത്യമായ വിലയിരുത്തലും ആവശ്യമായ ചികിത്സയും ജീവിതശൈലിയിലെ മാറ്റങ്ങളും രോഗിയുടെ ജീവിതനിലവാരം മെച്ചപ്പെടുത്താനും രോഗത്തിന്റെ പുരോഗതിയെ നിയന്ത്രിക്കാനും സഹായിച്ചേക്കാം.

മരുന്നിനൊപ്പം പരിചരണവും
അൽഷൈമേഴ്‌സ്‌ ചികിത്സയിൽ മരുന്നുകൾക്ക് പുറമെ രോഗിയുടെ ദൈനംദിന ജീവിതവും മാനസിക ക്ഷേമവും പരിഗണിക്കേണ്ടതുണ്ട്. സ്ഥിരമായ ദിനചര്യ, ലളിതമായ മാനസിക പ്രവർത്തനങ്ങൾ, വായന, ഇഷ്ടപ്പെട്ട സംഗീതം കേൾക്കൽ, പഴയ ഓർമ്മകൾ പങ്കുവയ്ക്കൽ, കുടുംബാംഗങ്ങളുമായുള്ള ആശയവിനിമയം തുടങ്ങിയവ രോഗിക്ക് ആശ്വാസം നൽകാൻ സഹായിക്കും.

അൽഷൈമേഴ്‌സ്‌ ബാധിച്ച വ്യക്തിക്ക് പരിചിതമായ ദിനചര്യയും സുരക്ഷിതമായ അന്തരീക്ഷവും ഒരുക്കുന്നത് സഹായകരമാണ്. ക്ഷമയോടെ സംസാരിക്കുക, കാര്യങ്ങൾ ലളിതമായി വിശദീകരിക്കുക, ആവശ്യമായ കാര്യങ്ങൾ ഓർമ്മിപ്പിക്കുക, മരുന്നുകൾ കൃത്യമായി കഴിക്കുന്നുണ്ടെന്ന് ഉറപ്പാക്കുക എന്നിവ പരിചരണത്തിന്റെ പ്രധാന ഭാഗങ്ങളാണ്.

രോഗിയുടെ മറവി ചൂണ്ടിക്കാട്ടി കുറ്റപ്പെടുത്തുകയോ പരിഹസിക്കുകയോ ചെയ്യുന്നത് ഒഴിവാക്കണം. രോഗിയുടെ ആത്മാഭിമാനം സംരക്ഷിച്ചുകൊണ്ടുള്ള സമീപനമാണ് കുടുംബാംഗങ്ങൾ സ്വീകരിക്കേണ്ടത്.

തലച്ചോറിന്റെ ആരോഗ്യം ശ്രദ്ധിക്കാം

* ക്രമമായ ശാരീരിക പ്രവർത്തനങ്ങൾ, പോഷകസമൃദ്ധമായ ഭക്ഷണം, മതിയായ ഉറക്കം, സാമൂഹിക ഇടപെടലുകൾ, വായന പോലുള്ള മാനസിക പ്രവർത്തനങ്ങൾ എന്നിവ പൊതുവായ മസ്തിഷ്‌കാരോഗ്യത്തിന് ഗുണകരമാണ്.

* രക്തസമ്മർദ്ദം, പ്രമേഹം, കൊളസ്ട്രോൾ തുടങ്ങിയ ആരോഗ്യപ്രശ്‌നങ്ങൾ നിയന്ത്രിക്കുന്നതും പ്രധാനമാണ്.

(പാലക്കാട് കിംസ് അവൈറ്റിസ് ഹോസ്പിറ്റലിൽ ന്യൂറോളജി വിഭാഗത്തിൽ കൺസൾട്ടന്റാണ് ലേഖിക)

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi