70-കളിൽ ബോളിവുഡിലെ ഏറ്റവും മികച്ച താരങ്ങളിൽ ഒരാളായിരുന്ന മുംതാസ്. 'റോട്ടി', 'ദുഷ്മൻ', 'സച്ചാ ഝൂത', 'പ്രേം കഹാനി', 'ആപ് കി കസം', 'ബന്ധൻ' & രാജേഷ് ഖന്നയ്‌ക്കൊപ്പം 'ദോ രാസ്‌തെ' എന്നീ ചിത്രങ്ങളിലെ വേഷങ്ങളിലൂടെ മുംതാസ് പ്രേക്ഷകരുടെ ഇഷ്ടതാരമായി മാറുകയായിരുന്നു. 1974-ൽ മയൂർ മധ്വാനിയെ വിവാഹം കഴിച്ചതിനുശേഷം മുംതാസ് ബോളിവുഡ് ഉപേക്ഷിച്ച് ബ്രിട്ടനിലേക്ക് താമസം മാറുകയായിരുന്നു. തന്റെ മിശ്ര വിവാഹത്തെക്കുറിച്ചും ആത്മീയ വിശ്വാസങ്ങളെക്കുറിച്ചും ബഹുഭാര്യത്വത്തോടുള്ള നിലപാടിനെക്കുറിച്ചും മനസ്സ് തുറക്കുകയാണ് നടിയിപ്പോൾ.

മതപരമായ സമാധാനത്തിലും ഐക്യത്തിലും താൻ വിശ്വസിക്കുന്നുവെന്നും എല്ലാ മതങ്ങളെയും ബഹുമാനിക്കുന്നുവെന്നും മുംതാസ് പറഞ്ഞു. 'സിതാരോം കാ സഫർ' (Sitaron Ka Safar) എന്ന യൂട്യൂബ് ചാനലിന് നൽകിയ അഭിമുഖത്തിലാണ് ഇക്കാര്യങ്ങൾ പങ്കുവെച്ചത്.

Also Read

placeholder

‘അവൾക്ക് വിജയ്‌യെ പേടിയായിരുന്നു; ഇത്രയും വലിയ താരത്തോടൊപ്പം ഒരു കൊച്ചു പെൺകുട്ടി’

placeholder

‘കോമഡി സിനിമകൾ ചെയ്യുമ്പോൾ ഒരു കോമാളിയായി കാണുന്നു, മറ്റ് മാർഗ്ഗങ്ങളില്ല’

"ഞാൻ മുസ്ലിമാണ്. ഞാൻ വിവാഹം കഴിച്ചത് ഒരു ഹിന്ദുവിനെയാണ്, എന്റെ സഹോദരിയും ഒരു ഹിന്ദുവിനെയാണ് വിവാഹം കഴിച്ചത്. ഞങ്ങൾ രണ്ടുപേരും സന്തോഷവതികളാണ്. ഞാൻ രണ്ട് മതങ്ങളിലും വിശ്വസിക്കുന്നു. എന്റെ ഭർത്താവ് എന്നെ നന്നായി പരിപാലിക്കുന്നു. എന്തുകൊണ്ടാണ് ആളുകൾ എപ്പോഴും ഹിന്ദു-മുസ്ലിം വിഭജനത്തെക്കുറിച്ച് സംസാരിക്കുന്നത് എന്ന് എനിക്ക് മനസ്സിലാകുന്നില്ല, ഞാൻ അതിൽ വിശ്വസിക്കുന്നില്ല," അവർ പറഞ്ഞു.

ജന്മം കൊണ്ട് മുസ്ലിം ആണെങ്കിലും ഹിന്ദു ദൈവങ്ങളിലും തനിക്ക് അഗാധമായ വിശ്വാസമുണ്ടെന്ന് മുംതാസ് വെളിപ്പെടുത്തി. പരസ്പരം സ്നേഹിക്കുന്നവർക്കിടയിൽ മതം ഒരിക്കലും ഒരു തടസ്സമാകരുത് എന്നാണ് തന്റെ ജീവിതം പഠിപ്പിച്ചതെന്നും അവർ കൂട്ടിച്ചേർത്തു.

ചില പുരുഷന്മാർക്കിടയിലുള്ള ബഹുഭാര്യത്വ രീതിയെ മുംതാസ് വിമർശിച്ചിരുന്നു. "ഒരു പുരുഷൻ മൂന്നും നാലും തവണ വിവാഹം കഴിക്കരുത് എന്നാണ് ഞാൻ എപ്പോഴും പറയുന്നത്. ചില സമുദായങ്ങളിൽ പലരും മൂന്നോ നാലോ തവണ വിവാഹം കഴിക്കുകയും പിന്നീട് ഭാര്യമാരെ ഉപേക്ഷിക്കുകയും ചെയ്യുന്നു. അത് എങ്ങനെയാണ് അവരെ മറ്റുള്ളവരേക്കാൾ മികച്ചവരാക്കുന്നത്? ഞാൻ ഒരു മുസ്ലിം ആണ്, എന്നിട്ടും ഞാൻ പറയുന്നു ഇത് തെറ്റാണെന്ന്. ഒരാളെ ഉപേക്ഷിച്ച് മറ്റൊരാളെ വിവാഹം കഴിക്കുന്നത് പാപമല്ലേ? ബന്ധങ്ങളിൽ സ്ത്രീകൾ എത്രത്തോളം പൊസസീവ് (Possessive) ആണെന്ന് നിങ്ങൾ ചിന്തിച്ചിട്ടുണ്ടോ?"
വിവാഹബന്ധത്തിലെ വിശ്വസ്തതയ്ക്കും അർപ്പണബോധത്തിനുമാണ് മുൻഗണന നൽകേണ്ടതെന്നും, പങ്കാളികളെ മാറ്റുന്നത് സ്ത്രീകൾക്ക് നേരെയുള്ള അനീതിയാണെന്നും അവർ പറഞ്ഞു.

മയൂർ മധ്വാനിക്കും മുംതാസിനും നടാഷ മധ്വാനി, ടാനിയ മധ്വാനി എന്നിങ്ങനെ രണ്ട് മക്കളാണുള്ളത്. 

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi