ചാര്‍ളി ചാപ്ലിന്റെ കല്ലറ മോഷ്ടിച്ചവര്‍ ആവശ്യപ്പെട്ടത് 600000 ഡോളര്‍, പോലീസിനെ വട്ടംകറക്കിയ പ്രതികള്‍

ചാര്‍ളി ചാപ്ലിന്‍/Getty Images

ചാപ്ലിന്റെ ശരീരം മോഷണം പോയ വാര്‍ത്ത തീ പോലെ പടര്‍ന്നു. ഹിറ്റ്ലറെ ആക്ഷേപിക്കുന്ന ഗ്രേറ്റ് ഡിക്ടേറ്റര്‍ എന്ന സിനിമയ്ക്ക് ശേഷം ചാപ്ലിന്‍ ജൂതനാണ് എന്നൊരു വാര്‍ത്ത പ്രചരിക്കപ്പെട്ടിരുന്നു. ഒരു മതത്തോടുംചാപ്ലിനു താത്പര്യമില്ലായിരുന്നു. പക്ഷേ തന്നെ ജൂതനാക്കി ചിത്രീകരിക്കുന്ന വാര്‍ത്തകളെ അദ്ദേഹം ഒരിക്കലും തള്ളിപ്പറഞ്ഞിരുന്നില്ല. അദ്ദേഹം ജൂതനായതുകൊണ്ട് ആരെങ്കിലും അദ്ദേഹത്തിന്റെ ശരീരം ജൂത സെമിത്തേരിയിലേക്ക് മാറ്റിയതാകുമെന്ന് ചിലര്‍ വിശ്വസിച്ചു. ജന്മനാടായ ബ്രിട്ടനില്‍ അടക്കം ചെയ്യപ്പെടണമെന്ന് മുന്‍പ് ചാപ്ലിന്‍ ആഗ്രഹിച്ചിരുന്നു. അതുകൊണ്ട് ആരെങ്കിലും അദ്ദേഹത്തെ ഇംഗ്ലീഷ് മണ്ണിലേക്ക് കൊണ്ടുപോയതാകാം എന്നായി മറ്റുചിലര്‍. ആരാധന മൂത്ത ആരെങ്കിലും സ്വന്തമാക്കിയതാകും എന്നൊരു ആശങ്കയും പടര്‍ന്നു. 

ദിവസങ്ങള്‍ക്കുള്ളില്‍ ചാപ്ലിന്റെ ഭാര്യ ഊനയ്ക്ക് ഒരു അജ്ഞാത ഫോണ്‍ വന്നു. ചാപ്ലിന്റെ ശരീരം കൈവശമുണ്ടെന്നും 600000 ഡോളര്‍ തന്നാല്‍ അത് മടക്കാമെന്നും വിളിച്ചയാള്‍ പറഞ്ഞു. പോലീസ് അന്വേഷണം നടക്കുന്നതിനാല്‍ ഊന വിസമ്മതിച്ചു. തുടര്‍ന്നങ്ങോട്ട് ചാപ്ലിന്റെ കുടുംബാംഗങ്ങള്‍ക്ക് നിരന്തരം ഫോണ്‍ വന്നു. ചാപ്ലിന്റെ കല്ലറ കയ്യിലുണ്ടെന്ന് അവകാശപ്പെട്ട നിരവധിപേര്‍ പണം ചോദിച്ചു. 

ചാപ്ലിൻ ഭാര്യ ഊനയ്‌ക്കൊപ്പം/Getty Images

ഏതാണ് യഥാര്‍ഥ അവകാശവാദം എന്നറിയാതെ പോലീസും ആശയക്കുഴപ്പത്തിലായി. കൂടുതല്‍ കുഴപ്പത്തിലായത് പ്രതികള്‍ തന്നെ. വേറെയും ഒരുപാട് പേര് വിലപേശുന്നുണ്ടെന്ന് മനസ്സിലാക്കിയ പ്രതികള്‍ ചാപ്ലിന്‍ തങ്ങളുടെ കൈവശമുണ്ടെന്ന് അദ്ദേഹത്തിന്റെ കുടുംബത്തെ വിശ്വസിപ്പിക്കാന്‍ ശ്രമിച്ചു. മോഷ്ടിച്ച ഓക്ക് പെട്ടി അവര്‍ ഒരു ചോളപ്പാടത്തിലാണ് ഒളിപ്പിച്ചിരുന്നത്. അവിടെ ചെന്ന് കുഴി തുറന്ന് കല്ലറയുടെ ഒരു ഫോട്ടോ എടുത്ത പ്രതികള്‍ അത് ചാപ്ലിന്റെ കുടുംബത്തിന് അയച്ചുകൊടുത്തു. അടുത്തവട്ടം അവര്‍ ഫോണ്‍ ചെയ്തപ്പോള്‍ മുതല്‍ പോലീസ് ട്രാക്ക് ചെയ്യാന്‍ തുടങ്ങി.

പോലീസിന്റെ നിര്‍ദേശമനുസരിച്ച്  ഊന അവരുമായുള്ള സംഭാഷണം തുടര്‍ന്നു. പണത്തിന്റെ കാര്യത്തിലും മറ്റും അഭിപ്രായവ്യത്യാസങ്ങള്‍ ഉണ്ടെന്ന് പറഞ്ഞ് പ്രതികളെക്കൊണ്ട് വീണ്ടും വീണ്ടും ഫോണ്‍ ചെയ്യിച്ചു. ഓരോ തവണയും വ്യത്യസ്ത ബൂത്തുകളില്‍ നിന്നാണ് പ്രതികള്‍ വിളിച്ചത്. അതുകൊണ്ട് 76 നാളുകള്‍ക്ക് ശേഷമാണ് പൊലീസിന് ഇരുവരെയും പിടികൂടാനായത്.

ചോളപ്പാടത്തിൽ നിന്ന് കണ്ടെടുത്ത ചാപ്ലിന്റെ ശരീരം/Getty Images

അപ്പോഴേക്കും ചോളപ്പാടത്തിന്റെ ഏതുഭാഗത്താണ് തങ്ങള്‍ ചാപ്ലിനെ കുഴിച്ചിട്ടതെന്ന് പ്രതികള്‍ മറന്നുപോയിരുന്നു. പാടം മുഴുവന്‍ തിരയേണ്ട ഗതികേടിലായി പോലീസ്. മരപ്പെട്ടിക്ക്  മുകളില്‍ പിടിപ്പിച്ചിരുന്ന ലോഹപ്പിടി മെറ്റല്‍ ഡിറ്റക്ടറുകള്‍ തിരിച്ചറിഞ്ഞതോടെയാണ് ചാപ്ലിന്റെ അവശിഷ്ടം കണ്ടെടുക്കാനായത്.

തിരിച്ചുകിട്ടിയ ചാപ്ലിന്റെ ഭൗതികാവശിഷ്ടം സെമിത്തേരിയില്‍ കൊണ്ടുവന്ന് ഒരിക്കല്‍ക്കൂടി സംസ്‌കരിച്ചു. ഇക്കുറി കോണ്‍ക്രീറ്റ് കല്ലറയിലായിരുന്നു എന്നുമാത്രം. മരപ്പെട്ടിക്ക് മുകളിലും ഒരു കോണ്‍ക്രീറ്റ് സ്‌ളാബ് സ്ഥാപിച്ചു. 2014-ല്‍ പുറത്തിരങ്ങിയ 'ദി പ്രൈസ് ഓഫ് ഫെയിം' എന്ന ഫ്രഞ്ച് സിനിമ ഈ സംഭവത്തെയാണ് ആധാരമാക്കിയത്.