ബോളിവുഡ് നടി മഹിമ ചൗധരിയുടെ പുതിയൊരു ഫോട്ടോ വൈറലാവുകയാണ്. ഒരു വധുവിന്റെ വേഷത്തിൽ അണിഞ്ഞൊരുങ്ങിയ, നടൻ സഞ്ജയ് മിശ്രയ്‌ക്കൊപ്പമുള്ള മഹിമയുടെ ചിത്രമാണ് ആരാധകരെ ആകർഷിക്കുന്നത്. അതോടെ 52-ാം വയസ്സിൽ മഹിമ വിവാഹിതയായോ എന്നാണ് സോഷ്യൽമീഡിയ ചോദിക്കുന്നത്.

കാഞ്ചീപുരം സാരി ധരിച്ചാണ് മഹിമയെത്തിയത്. അതിനൊപ്പം ഹെവി ആഭരണങ്ങളും ധരിച്ചിട്ടുണ്ട്. സഞ്ജയ് കുർത്ത-പൈജാമയും സ്ലീവ്‌ലെസ് ജാക്കറ്റുമാണ് അണിഞ്ഞത്. പുറത്തേക്കുവന്ന അവർ ക്യാമറകൾക്ക് മുന്നിൽ പോസ് ചെയ്തു. അതിനൊപ്പം മാധ്യമപ്രവർത്തകർക്ക് മധുരവും നൽകി.

''രണ്ടുപേർക്കും ഒരുപാട് ആശംസകൾ'' എന്ന് മാധ്യമപ്രവർത്തകർ പറഞ്ഞപ്പോൾ അതിനോട് മഹിമ പ്രതികരിച്ചതിങ്ങനെ, ''നിങ്ങൾ വിവാഹത്തിന് വന്നില്ലല്ലോ, പകരം ഈ മധുരം കഴിക്കൂ''. എന്നാൽ അതുകഴിഞ്ഞാണ് ഇത് യഥാർഥവിവാഹമല്ലെന്ന് മനസ്സിലാവുന്നത്. ദുർലഭ് പ്രസാദ് കി ദൂസ്രി ശാദി' എന്ന സിനിമയുടെ പ്രൊമോഷൻ ക്യാമ്പയിന്റെ ഭാഗമായിട്ടാണ് മഹിമയും സഞ്ജയും വിവാഹവേഷത്തിലെത്തിയത്. സിനിമയിൽ സഞ്ജയ് മിശ്രയുടെ രണ്ടാം ഭാര്യയായിട്ടാണ് മഹിമ അഭിനയിക്കുന്നത്. സിദ്ധാന്ത് രാജാണ് ഈ റൊമാന്റിക് കോമഡി സംവിധാനം ചെയ്യുന്നത്. ഒക്ടോബർ 16-നാണ് സിനിമയുടെ പോസ്റ്റർ അണിയറപ്രവർത്തകർ പുറത്തുവിട്ടത്.

പർദേസ്, ധട്കൻ, ഖിലാഡി 420, ലജ്ജ, തേരെ നാം, ദൊബാര തുടങ്ങിയവയിലൂടെ പ്രേക്ഷകമനസ്സിലിടം പിടിച്ച താരമാണ് മഹിമ ചൗധരി. ഇന്ത്യൻ അടിയന്തരാവസ്ഥയെ ആസ്പദമാക്കിയുള്ള 'എമർജൻസി', 'നദാനിയാൻ' തുടങ്ങിയവയാണ് മഹിമയുടെ ഏറ്റവും ഒടുവിലത്തെ റിലീസുകൾ. 2006-ലാണ് മഹിമ വിവാഹിതയാകുന്നത്. ഏഴുവർഷത്തെ ദാമ്പത്യത്തിനുശേഷം വിവാഹമോചിതയാവുകയും ചെയ്തു. ഒരു പെൺകുട്ടിയുടെ സിംഗിൾ പേരന്റ് കൂടിയാണവർ.

1999-ൽ മഹിമയ്‌ക്കൊരു അപകടമുണ്ടായി. ബംഗളൂരുവിൽ വെച്ചുണ്ടായ അപകടത്തിൽ അവർക്ക് സാരമായി പരിക്കേറ്റു. കുറേ ഗ്ലാസ് കഷണങ്ങൾ അവരുടെ മുഖത്ത് തറച്ചുകയറുകയും ചെയ്തു. അന്ന് 67 ഗ്ലാസ് കഷണങ്ങളാണ് ശസ്ത്രക്രിയ ചെയ്ത് പുറത്തെടുത്തത്.

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbiurl.in/grihalakshmi