എഐ നിര്‍മിത ചിത്രം
ഓമനപക്ഷികളുടെ തീറ്റക്രമത്തില്‍ എഗ് ഫുഡ് അഥവാ മൃദു തീറ്റയ്ക്ക് പ്രധാന സ്ഥാനമുണ്ട്. പ്രതിദിന ഭക്ഷണത്തിലും, പ്രജനനകാലത്തും, മഴക്കാലംപോലെ സമ്മര്‍ദ്ദവും രോഗസാധ്യതയും ഏറുന്ന കാലത്തും, പറന്നു തുടങ്ങുന്ന ഇളമുറക്കാര്‍ക്കുമൊക്കെ ഇത് പ്രയോജനപ്പെടുന്നു. വിലയല്‍പ്പം കൂടുതലാണെങ്കിലും വീട്ടില്‍ തന്നെ നിര്‍മ്മിച്ചാലും, പെറ്റ്‌ഷോപ്പുകളില്‍ നിന്ന് വാങ്ങിയാലും എഗ് ഫുഡ് തങ്ങളുടെ പക്ഷികളുടെ മെനുവിന്റെ ഭാഗമാക്കുന്നവരുടെ എണ്ണമിന്ന് കൂടിയിരിക്കുന്നു.
എഗ്ഫുഡിന്റെ പ്രധാന്യം
ഓമനപക്ഷികള്‍ക്ക് നല്‍കാവുന്ന ഏറെ രുചികരവും, പോഷകസമ്പന്നവുമായ ആഹാരമാണ് എഗ് ഫുഡ് അഥവാ മൃദു തീറ്റ. മൃഗജന്യവും, സസ്യജന്യവുമായ പ്രോട്ടീന്‍ പക്ഷികളുടെ ശരീരത്തിലെത്തിക്കാന്‍ എഗ്ഫുഡിന് കഴിയും. പലപ്പോഴും ജന്തുജന്യമായ പ്രോട്ടീന്‍ ഇല്ലാത്ത പക്ഷിതീറ്റകളില്‍ അവശ്യ അമിനോ അമ്ലങ്ങളായ ലൈസിന്‍, മെതിയോണിന്‍ എന്നിവയുടെ അപര്യാപ്തതയുണ്ടാവും.
കൂടാതെ പുഴുങ്ങിയ മുട്ട, റസ്‌ക്ക് അല്ലെങ്കില്‍ ബ്രഡ് പൊടി, തേന്‍ എന്നീ പ്രകൃതിദത്ത ചേരുവകളാണ് ഇവയില്‍ പ്രധാനം. ഒപ്പം വിറ്റമിനുകളും, മിനറലുകളും. രോഗപ്രതിരോധശേഷി കൂട്ടാനായി വിറ്റമിന്‍ എയും, കോശ വളര്‍ച്ചയ്ക്ക് വിറ്റമിന്‍ ബി12,ഇ എന്നിവയും, എല്ലിന്റെയും മാംസപേശികളുടേയും വളര്‍ച്ചയ്ക്ക് വിറ്റമിന്‍ ഡിയും, തൂവല്‍ വളര്‍ച്ചയ്ക്ക് ബയോട്ടിനും ചേര്‍ത്തവയാണ് മിക്ക റെഡിമെയ്ഡ് എഗ് ഫുഡുകളും. മൊത്തത്തിലുള്ള ആരോഗ്യ സംരക്ഷണത്തിനായി സസ്യജന്യ, സമീകൃത ഡിഎച്ച്എ ,ഒമേഗ-3,6 ഫാറ്റി ആസിഡുകളും ഇത്തരം തീറ്റയിലുണ്ടാകും.
മൃദു തീറ്റ - 1
(പൊതുവായ ഉപയോഗത്തിന് വീട്ടില്‍ തന്നെ തയ്യാറാക്കുന്നത്)
അവശ്യമായ സാധനങ്ങള്‍
നന്നായി പുഴുങ്ങിയ കോഴിമുട്ട - ഒന്ന്
റൊട്ടിപ്പൊടി (Bread crumbs) - 30 ഗ്രാം
മള്‍ട്ടി വിറ്റമിന്‍ ഡ്രോപ്‌സ് - 5 തുള്ളി
പ്രോബയോട്ടിക് (Bifilac) – ഒരു ക്യാപ്സൂൾ
(റൊട്ടിപ്പൊടി ബേക്കറികളിലാണ് ലഭിക്കാന്‍ സാധ്യത. ഇല്ലെങ്കില്‍ റസ്‌ക്കോ, മൊരിച്ച റൊട്ടിയോ മിക്‌സിയില്‍ അടിക്കുക.)
പുഴുങ്ങിയ മുട്ടയുടെ തോട് മിക്‌സിയില്‍ അടിച്ച് നല്ലവണ്ണം പൊടിഞ്ഞശേഷം മുട്ടയും റൊട്ടിപ്പൊടിയും ചേര്‍ത്ത് അടിക്കുക. മിനറല്‍ മിശ്രിതവും, ഒരു നുള്ള് പ്രോബയോട്ടിക്കും ചേര്‍ത്ത് നല്ലവണ്ണം ഇളക്കുക. നനവുണ്ടെങ്കിലും കുഴഞ്ഞുപോകാത്ത രീതിയില്‍ തയ്യാറാക്കുക.
മൃദു തീറ്റ - 2
റൊട്ടിപ്പൊടി - 30 ഗ്രാം
കോഴിമുട്ട തോടോടെ പുഴുങ്ങിയത് - ഒന്ന്
സോയ ഫ്‌ലളേക്ക്‌സ് - 15 ഗ്രാം
വെളുത്തുള്ളി അരച്ചത് - ഒരു ടീസ്പൂണ്‍
എള്ളെണ്ണ - രണ്ട് മില്ലി
കോഡ് ലിവര്‍ ഓയില്‍- രണ്ട് മില്ലി
ധാതുലവണ മിശ്രിതം - ഒരു ഗ്രാം
പ്രോബയോട്ടിക് - ഒരു കാപ്‌സ്യൂള്‍
ആദ്യം പുഴുങ്ങിയ മുട്ടയുടെ തോട് മിക്‌സിയില്‍ അടിച്ച് നല്ലവണ്ണം പൊടിഞ്ഞശേഷം മുട്ടയും റൊട്ടിപ്പൊടിയും ചേര്‍ത്ത് അടിക്കുക. അതില്‍ സോയ ഫ്‌ളേക്കുകള്‍ ഓരോ സ്പൂണ്‍ ചേര്‍ത്ത് അടിച്ചു മിശ്രിതമാക്കി പാത്രത്തില്‍ വയ്ക്കുക. വെളുത്തുള്ളി അരച്ചത്, ധാതുലവണ മിശ്രിതം, പ്രോബയോട്ടിക് ഗുളിക എന്നിവ മിക്‌സിയിലിട്ട് നന്നായി അടിക്കണം. പിന്നെ എള്ളെണ്ണയും കോഡ്‌ലിവര്‍ ഓയിലും ചേര്‍ത്ത് വീണ്ടും മിക്‌സിയില്‍ അടിക്കണം. പാത്രത്തില്‍ സൂക്ഷിച്ചിരിക്കുന്ന ഒന്നാമത്തെ മിശ്രിതം കൂടി ചേര്‍ത്ത് മൃദു തീറ്റയാക്കാം.
മൃദു തീറ്റ -3
കോഴിമുട്ട (പുഴുങ്ങി ചുരണ്ടിയത്) - ഒന്ന്
റൊട്ടി/റെസ്‌ക് പൊടി - രണ്ട് ടേബിള്‍ സ്പൂണ്‍
മള്‍ട്ടി വിറ്റമിന്‍ - 10 തുള്ളി
പ്രോബയോട്ടിക് - അല്‍പ്പം
മിനറല്‍ മിശ്രിതം - പകുതി ടീസ്പൂണ്‍
പുഴുങ്ങിയ ക്യാരറ്റ് അല്ലെങ്കില്‍ മധുരക്കിഴങ്ങ്, ബീറ്റ്‌റൂട്ട് ചിരണ്ടിയത്, ഓട്ട്‌സ്, മുളപ്പിച്ച ധാന്യങ്ങള്‍, അരിഞ്ഞ ഇലവര്‍ഗ്ഗങ്ങള്‍ എന്നിവ ഇതോടൊപ്പം ചേര്‍ക്കാവുന്നതാണ്.
പുഴുങ്ങിയ മുട്ട തോട് മാറ്റിയ ശേഷം വളരെ ചെറുതായി അരി‍ഞ്ഞ് രണ്ട് ടേബിള്‍സ്പൂണ്‍ റൊട്ടി/റസ്‌ക് പൊടി, 10 തുള്ളി മള്‍ട്ടി വിറ്റമിനും, അര സ്പൂണ്‍ മിനറല്‍ മിശ്രിതവും, ഒരു നുള്ള് പ്രോബയോട്ടിക്കും ചേര്‍ത്ത് നല്ലവണ്ണം ഇളക്കുക. നനവുണ്ടെങ്കിലും കുഴഞ്ഞുപോകാത്ത രീതിയില്‍ തയ്യാറാക്കുക. ഒപ്പം ക്യാരറ്റോ, മധുരക്കിഴങ്ങ് പുഴുങ്ങിയതോ, ബീറ്റ്‌റൂട്ട് ചെറുതായി അരി‍ഞ്ഞതോ ചേര്‍ക്കാം. ഓട്‌സ് ചേര്‍ത്താൽ കൂടുതല്‍ സ്വാദ് ലഭിക്കും.
വിപണിയില്‍ ലഭ്യമായ പ്രോട്ടീന്‍ എഗ് ഫുഡിൽ ഗുണമേന്മയേക്കുറിച്ചും പോഷകാഹാര ഘടനയെക്കുറിച്ചും സ്വകാര്യ കമ്പനികള്‍ പരസ്യം നല്‍കാറുണ്ട്. അതില്‍ ഒരു കമ്പനിയുടെ മൃദു തീറ്റ പരിശോധിക്കുന്നത് അവയുടെ പോഷകമൂല്യത്തെക്കുറിച്ചുള്ള ഏകദേശ ധാരണ ലഭിക്കാൻ സഹായിക്കും. അത്തരത്തിലൊന്ന് പരിശോധിക്കാം-
ക്രൂഡ് പ്രോട്ടീന്‍ - 14.5% (മിനിമം)
ക്രൂഡ് ഫാറ്റ് - 6.0% (മിനിമം)
ക്രൂഡ് ഫൈബര്‍ - 2.0% (മാക്‌സിമം)
മെതിയോണിന്‍ - 0.5% (മിനിമം)
ലൈസിന്‍ - 0.9% (മിനിമം)
വിറ്റമിന്‍ എ- 10,000 IU/kg (മിനിമം)
വിറ്റമിന്‍ ഡി - 750 IU/kg (മിനിമം)
വിറ്റമിന്‍ ഇ - 100 IU/kg (മിനിമം)
ബയോട്ടിൻ- 0.1 mg/kg (മിനിമം)
വിറ്റമിന്‍ ബി12 - 20 mg/kg (മിനിമം)
വിറ്റമിന്‍ സി- 100 mg/kg (മിനിമം)
ഒമേഗ - 6 ഫാറ്റി ആസിഡ് - 1.2% (മിനിമം)
ഒമേഗ - 3 ഫാറ്റി ആസിഡ് - 10.3% (മിനിമം)
ഡിഎച്ച്എ - 0.03% (മിനിമം)
ടോട്ടല്‍ ലാക്റ്റിക് ആസിഡ് ബാക്ടീരിയ - 2 x 105 cfu/g (മിനിമം)
കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbiurl.in/grihalakshmi
Content Highlights: Discover the benefits of egg food for pet birds and learn about its nutritional value and get easy recipes for optimal bird health and breeding.
Published: 27 Oct 2025, 07:20 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented