ബോളിവുഡ് നടൻ നാനാ പടേക്കറുടെ വിയോഗത്തിന് പിന്നാലെ സോഷ്യൽ മീഡിയയിൽ ഉയർന്ന വിവാദങ്ങളിൽ പ്രതികരണവുമായി നടി തനുശ്രീ ദത്ത. നാനാ പടേക്കറുടെ മരണവാർത്തയ്ക്ക് പിന്നാലെ "തിന്മ ചത്തൊടുങ്ങി" (Evil Dead) എന്ന അർത്ഥത്തിൽ തനുശ്രീ പങ്കുവെച്ച ഇൻസ്റ്റഗ്രാം വീഡിയോ വ്യാപകമായ വിമർശനങ്ങൾക്കിടയാക്കിയിരുന്നു. എന്നാൽ തന്റെ പ്രസ്താവനയിൽ ഉറച്ചുനിൽക്കുന്നുവെന്ന് വ്യക്തമാക്കിക്കൊണ്ട് പുതിയ വീഡിയോയുമായി താരം രംഗത്തെത്തി.

ഒക്ടോബർ 8-ന് ഗോവയിലെ വസതിയിൽ വെച്ച് ഹൃദയാഘാതത്തെ തുടർന്നായിരുന്നു 75-കാരനായ നാനാ പടേക്കറുടെ അന്ത്യം. വാർത്ത പുറത്തുവന്നതിന് പിന്നാലെ തനുശ്രീ പങ്കുവെച്ച പോസ്റ്റ് സോഷ്യൽ മീഡിയയിൽ വലിയ ചർച്ചയായിരുന്നു. വിമർശനങ്ങൾ കടുപ്പമായതോടെയാണ് വ്യക്തത വരുത്തി, തനുശ്രീ വീണ്ടും സംസാരിച്ചത്. "എനിക്കെതിരെ നെഗറ്റിവിറ്റിയുടെ വലിയൊരു തരംഗം തന്നെ ഉണ്ടാകുന്നുണ്ട്. മറ്റുള്ളവർക്ക് അയാളെക്കുറിച്ചുള്ള അനുഭവങ്ങൾ വ്യത്യസ്തമായിരിക്കാം. എന്നാൽ എന്നെ സംബന്ധിച്ചിടത്തോളം ഇതാണ് യാഥാർത്ഥ്യം. പഴയ കാര്യങ്ങൾ വീണ്ടും കുഴിച്ചെടുക്കാൻ ഞാൻ ആഗ്രഹിക്കുന്നില്ല. എന്നാൽ മറ്റുള്ളവരെ ഉപദ്രവിക്കുകയും ഇരയാക്കുകയും ചെയ്ത ഒരാൾ മരിച്ചാൽ, അയാൾ ചെയ്ത കുറ്റങ്ങളും അക്രമങ്ങളും ഇല്ലാതാകുമോ? അയാളുടെ അക്കൗണ്ട് അവിടെ അവസാനിക്കുമോ?" തനുശ്രീ ചോദിക്കുന്നു.

Also Read

placeholder

ദിവസവും 60 സിഗരറ്റ് വലിച്ച നാനാ പടേക്കർ; പെട്ടെന്നൊരു നാൾ പുകവലി വേണ്ടെന്നുവെച്ചതിനുപിന്നിൽ

placeholder

'96'-ൽ ജാനുവാകാൻ ആദ്യം പരിഗണിച്ചത് ജ്യോതികയെയോ? പ്രചാരണങ്ങൾക്ക് മറുപടിയുമായി സംവിധായകൻ

placeholder

‘അതൊക്കെ പണം കൊടുത്ത് ചെയ്യിക്കുന്ന അധിക്ഷേപങ്ങൾ’; തുറന്നടിച്ച് വിജയ് ദേവരകൊണ്ട

തനിക്കെതിരെ സൈബർ ആക്രമണം നടത്തുന്ന യൂട്യൂബർമാർക്കും ട്രോളന്മാർക്കും തനുശ്രീ ശക്തമായ മുന്നറിയിപ്പ് നൽകി. താൻ കടന്നുപോയ അനുഭവങ്ങളിലൂടെ മറ്റൊരാൾക്ക് കടന്നുപോകാൻ കഴിയില്ലെന്ന് താരം പറഞ്ഞു. "2020-ന് ശേഷം എനിക്ക് നേരെ ജീവഹാനിവരെ വരുത്താവുന്ന ആക്രമണങ്ങളുണ്ടായി. ഗുണ്ടകൾ എന്നെ പിന്തുടർന്നു, എന്റെ കാറിന്റെ ബ്രേക്ക് തകർക്കപ്പെട്ടു," താൻ നേരിട്ട ഭീഷണികളെക്കുറിച്ച് തനുശ്രീ വെളിപ്പെടുത്തി.

ലഖ്‌നൗവിലേക്ക് പോകുന്നതിനിടെയാണ് നാനാ പടേക്കറുടെ മരണവാർത്ത തനുശ്രീ അറിയുന്നത്. തുടർന്ന് മാധ്യമങ്ങൾ പ്രതികരണം തേടിയപ്പോൾ, "മരിച്ചുപോയവർ മരിച്ചു, എനിക്കൊന്നും പറയാനില്ല" എന്നായിരുന്നു ആദ്യ പ്രതികരണം.

2008-ൽ 'ഹോൺ ഒകെ പ്ലീസ്' എന്ന ചിത്രത്തിലെ പ്രത്യേക ഗാനരംഗത്തിന്റെ ചിത്രീകരണത്തിനിടെ നാനാ പടേക്കർ തന്നോട് ലൈംഗികാതിക്രമം കാട്ടിയെന്ന തനുശ്രീയുടെ വെളിപ്പെടുത്തലാണ് 2018-ൽ ഇന്ത്യയിലെ #MeToo മുന്നേറ്റത്തിന് തുടക്കമിട്ടത്. അന്ന് സിനി ആൻഡ് ടിവി ആർട്ടിസ്റ്റ് അസോസിയേഷന് (CINTAA) പരാതി നൽകിയെങ്കിലും കാര്യമായ നടപടികളുണ്ടായില്ല.

തുടർന്ന് 2018 ഒക്ടോബറിൽ മുംബൈ ഒഷിവാര പോലീസ് സ്റ്റേഷനിൽ തനുശ്രീയുടെ അഭിഭാഷകൻ പരാതി നൽകുകയും നാനാ പടേക്കർ, കൊറിയോഗ്രാഫർ ഗണേഷ് ആചാര്യ, നിർമ്മാതാവ് സാമി സിദ്ദിഖി, സംവിധായകൻ രാകേഷ് സാരംഗ് എന്നിവരെ ലൈ ഡിറ്റക്ടർ, നാർക്കോ അനാലിസിസ് പരിശോധനകൾക്ക് വിധേയരാക്കണമെന്ന് ആവശ്യപ്പെടുകയും ചെയ്തിരുന്നു. എന്നാൽ 2019 ജൂണിൽ തെളിവുകളുടെ അഭാവം ചൂണ്ടിക്കാട്ടി പോലീസ് നാനാ പടേക്കർക്ക് ക്ലീൻ ചിറ്റ് നൽകുകയായിരുന്നു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi