ഇരുപത്തൊന്നാം വയസ്സില് ആദ്യ ചിത്രം തന്നെ മണിരത്നത്തോടൊപ്പം. തുടരെത്തുടരെ വീണ്ടും രണ്ട് മണിരത്നം സിനിമയിലെ നായകപദവി. സ്വപ്നതുല്യമായിരുന്നു അരവിന്ദ് സ്വാമിയുടെ സിനിമാ അരങ്ങേറ്റം. 'ദളപതിയി'ലൂടെ അരങ്ങേറിയ അരവിന്ദ് വളരെ പെട്ടെന്ന് തന്നെ താരമായി. പുരുഷസൗന്ദര്യത്തിന്റെ ഉദാത്ത മാതൃകയായി വാഴ്ത്തപ്പെട്ടു. അദ്ദേഹം ഭാഗമായ സിനിമകളെല്ലാം വമ്പന് ഹിറ്റുകളായി.ഭാഗ്യം പൊടുന്നെനെയാണ് ദിശ മാറിയത്. തൊണ്ണൂറുകളുടെ ആദ്യ പകുതി വിജയകരമായി പൂര്ത്തിയാക്കിയ അരവിന്ദിന് രണ്ടാം പാതിയില് കാലിടറി. രണ്ടായിരത്തിന്റെ തുടക്കത്തിലും അരവിന്ദിന്റെ സിനിമകള് പരാജയമറിഞ്ഞു.
'അലൈപായുതേ'യിലെ അതിഥിവേഷം കഴിഞ്ഞതോടെ അരവിന്ദ് സിനിമയില് നിന്നും ചുവടുമാറാന് തീരുമാനിച്ചു. സമ്പന്ന കുടുംബത്തില് ജനിച്ചുവളര്ന്ന അരവിന്ദിന്റെ ജീവിതം സിനിമയില് ഒതുങ്ങുന്നതായിരുന്നില്ല. സിനിമകള് നിരാശപ്പെടുത്തിയപ്പോള് അരവിന്ദ് കുടുംബബിസിനസിലേക്ക് തിരിഞ്ഞു. വി.ഡി. സ്വാമി ആന്ഡ് കമ്പനി എന്ന അച്ഛന്റെ സംരംഭത്തിന്റെ അമരക്കാരനായി. ഇന്റര്നാഷണല് ബിസിനസ്സില് അമേരിക്കയില് നിന്ന് ബിരുദാനന്തര ബിരുദം കഴിഞ്ഞെത്തിയ അരവിന്ദിന് ബിസിനസ്സില് കഴിവ് തെളിയിക്കാന് അധികം സമയം വേണ്ടിവന്നില്ല. അതേസമയം ഇന്റെര്പ്രോ ഗ്ലോബലിന്റെ പ്രെസിഡന്റായും പ്രോറിലീസ് ഇന്ത്യയുടെ ചെയര്മാനായും അരവിന്ദ് തിളങ്ങി. സിനിമയില് നിന്നും പൂര്ണമായ വിടവാങ്ങല്.
2005-ല് അരവിന്ദ് സ്വന്തം കമ്പനി ആരംഭിച്ചു- ടാലന്റ് മാക്സിമസ്. അതേ വര്ഷമാണ് അതിഭീകരമായ ഒരപകടം അദ്ദേഹത്തിന്റെ ജീവിതം മാറ്റിമറിച്ചത്. അത്ഭുതകരമായ രക്ഷപ്പെടല്. പക്ഷേ, നട്ടെലിനു ഗുരുതരമായി പരിക്കേറ്റിരുന്നു. ബോധം വന്നപ്പോള് അദ്ദേഹത്തിന്റെ കാലുകള്ക്ക് ചലനശേഷി നഷ്ടപ്പെട്ടിരുന്നു. രണ്ടുവര്ഷം കിടപ്പിലായി. പണം കൊണ്ട് സാധിക്കാവുന്ന സകല ചികിത്സകളും തുടര്ന്നുപോയി. പതുക്കെ കാലുകള്ക്ക് ജീവന് വെച്ചു. എങ്കിലും അത്യധികമായിരുന്നു വേദന. ഏതാനും ചുവടുകള് നടന്നാല് കൊത്തിവലിക്കുന്ന വേദന ശരീരമാകെ പടര്ന്നു.
കടന്നുപോയ ദുഖങ്ങളെപ്പറ്റി അദ്ദേഹം പില്ക്കാലത്തു പറഞ്ഞു - ''കിടക്കയില് നിന്ന് ബാത്ത്റൂം വരെയുള്ള നടത്തംപോലും അസഹനീയമായ വേദനയാണ്. അതിനിടെ മൂന്നോ നാലോ തവണ ഇരിക്കേണ്ടി വരും. കിടക്കയില് നിന്ന് ചാടിയെഴുന്നേല്ക്കുന്നത് പോലെയുള്ള പല കാര്യങ്ങളും വളരെ നിസ്സാരമായിട്ടാണ് നമ്മള് കാണുന്നത്. കൈകാലുകളുടെ പൂര്ണ്ണ നിയന്ത്രണം നഷ്ടമാകുന്നതോടെ എല്ലാത്തിനെക്കുറിച്ചുമുള്ള നമ്മുടെ കാഴ്ചപ്പാട് മാറും.''
സ്വന്തം ശരീരത്തോടും മനസ്സിനോടും അരവിന്ദിന് പൊരുതേണ്ടിവന്നു. ഏകദേശം അഞ്ചു വര്ഷം കഴിഞ്ഞാണ് അരവിന്ദിന്റെ ആരോഗ്യനില പൂര്വസ്ഥിതിയിലായത്. അപ്പോഴേക്കും അമിതഭാരവും മുടികൊഴിച്ചിലും അദ്ദേഹത്തെ തിരിച്ചറിയാനാകാത്ത വിധം മാറ്റിയിരുന്നു. ജീവിതത്തിലേക്ക് തിരിച്ചെത്തിയ അരവിന്ദിനെ തേടി വീണ്ടും സിനിമയെത്തി. ഇത്തവണയും മണിരത്നത്തിന്റെ രൂപത്തില്. 'കടല് 'എന്ന സിനിമയില് ഒരു റോള്. പതിനഞ്ചു കിലോയോളം അദ്ദേഹത്തിന് കുറക്കേണ്ടിവന്നു. 13 വര്ഷത്തെ ഇടവേളയ്ക്ക് ശേഷം അരവിന്ദ് സ്വാമി തിരിച്ചെത്തുന്നു എന്ന വാര്ത്ത വന്നു. അടുത്ത സിനിമ വൈകാതെയെത്തി 'തനി ഒരുവന്' അതില് വില്ലനായി അരവിന്ദ് ആരാധകരെ ഞെട്ടിച്ചു, അത്യുഗ്രന് പ്രകടനത്തിന് പ്രശംസയും പുരസ്കാരങ്ങളും പിന്നാലെയെത്തി.
അഭിനയലോകത്ത് അദ്ദേഹമിപ്പോള് സജീവമാണ്. അരവിന്ദ് അഭിനയിക്കുന്ന ഒട്ടേറെ സിനിമകളും സീരീസുകളും വരാനിരിക്കുന്നു. പക്ഷേ, രണ്ടാം വരവില് സിനിമയ്ക്കൊപ്പം ബിസിനസ്സ് കൂടി മുന്നോട്ടുകൊണ്ടുപോകുകയാണ് അരവിന്ദ്. അത്ഭുതത്തോടെ ബിസിനസ്സ് ലോകം അദ്ദേഹത്തിന്റെ നേതൃത്വഗുണം നോക്കിക്കാണുന്നു. 2022-ല് 3300 കോടിയായിരുന്നു അരവിന്ദിന്റെ കമ്പനിയുടെ വാര്ഷികവരുമാനം. സിനിമയിലും ജീവിതത്തിലും ഹീറോ ആകുക അത്ര എളുപ്പമല്ല.
Content Highlights: the inspiring life of arvind swamy
Published: 08 Nov 2024, 12:53 pm IST
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented