തമിഴ്നാട് മുഖ്യമന്ത്രിയാകുമെന്ന് വിജയ് അന്നേ സൂചന നൽകി, ഈ വിജയമെല്ലാം പ്രവചിച്ചിരുന്നോ?

കന്നിയങ്കത്തിൽ തന്നെ തമിഴ്നാട് രാഷ്ട്രീയത്തിൽ സ്ഥാനമുറപ്പിച്ചിരിക്കുകയാണ് ദളപതി വിജയ്. രണ്ടു വയസ്സുമാത്രം പ്രായമുള്ള ‘തമിഴക വെട്രി കഴക’മെന്ന അദ്ദേഹത്തിന്റെ പാർട്ടി നേടിയ വിജയം എല്ലാവരെയും അമ്പരപ്പിച്ചിരിക്കുകയാണ്. എന്നാൽ രാഷ്ട്രീയത്തിൽ വരുന്നതിന് മുന്നേ തന്നെ വിജയ് ഇക്കാര്യങ്ങൾ കണക്കുകൂട്ടിയിരുന്നു എന്നാണ് ഇപ്പോൾ ആരാധകരുടെ വാദം.

വിജയ്‍യുടെ 2024-ലെ ഹിറ്റ് ചിത്രമായ 'The Greatest of All Time' (GOAT)-ൽ, വിജയ് രാഷ്ട്രീയപ്രവേശനത്തെക്കുറിച്ചുള്ള സൂചനകൾ നൽകിയിരുന്നു എന്നാണ് വിലയിരുത്തപ്പെടുന്നത്. ചിത്രത്തിലെ ഒരു രംഗത്തിൽ വിജയ് ഓടിക്കുന്ന കാറിന്റെ രജിസ്‌ട്രേഷൻ നമ്പർ ശ്രദ്ധിച്ചാൽ ഇത് മനസ്സിലാകും. TN 07 CM 2026 എന്നാണ് ആ വാഹനത്തിന്റെ നമ്പർ. ഇത് 2026-ലെ അദ്ദേഹത്തിന്റെ രാഷ്ട്രീയ പദ്ധതികളെ നേരിട്ട് സൂചിപ്പിക്കുന്നതാണെന്നാണ് ഇപ്പോൾ സോഷ്യൽ മീഡിയയിലടക്കം ചർച്ചകൾ നടക്കുന്നത്.

വിജയുടെ രാഷ്ട്രീയ പ്രവേശനവും 'GOAT' സിനിമയും
ടിവികെ (TVK) അധ്യക്ഷനെന്ന നിലയിലുള്ള വിജയ്‍യുടെ രാഷ്ട്രീയ അരങ്ങേറ്റം തമിഴ്‌നാട്ടിൽ വലിയൊരു തരംഗം തന്നെ സൃഷ്ടിച്ചിരിക്കുകയാണ്. നൂറിലധികം സീറ്റുകളിൽ ടിവികെ മുന്നേറിയതോടെ തമിഴ്‌നാട് രാഷ്ട്രീയം വലിയൊരു മാറ്റത്തിന് സാക്ഷ്യം വഹിച്ചിരിക്കുകയാണ്.

പലരെയും അത്ഭുതപ്പെടുത്തിയെങ്കിലും, ഇതെല്ലാം വിജയ്‍ നേരത്തെ തന്നെ ആസൂത്രണം ചെയ്തതാണെന്ന് വേണം കരുതാൻ. (GOAT) എന്ന ചിത്രത്തിൽ അദ്ദേഹം ഉപയോഗിച്ച കാറിന്റെ നമ്പർ പ്ലേറ്റ് ആരാധകർക്കിടയിൽ അന്നും വലിയ ചർച്ചയായിരുന്നു. ഇതിലെ അക്ഷരങ്ങൾ വിശകലനം ചെയ്താൽ: TN എന്നത് തമിഴ്‌നാട് (Tamil Nadu), CM: മുഖ്യമന്ത്രി (Chief Minister) 2026: നിയമസഭാ തിരഞ്ഞെടുപ്പ് വർഷം എന്നിങ്ങനെയാണെന്നും, ഇത് 2026-ൽ അദ്ദേഹം തമിഴ്‌നാട് മുഖ്യമന്ത്രിയാകുമെന്നതിന്റെ നേരിട്ടുള്ള സൂചനയായും പലരും വിശ്വസിച്ചിരുന്നു.

പ്രേംജി അമരന്റെ പ്രവചനം
'GOAT'-ലെ സഹതാരം പ്രേംജി അമരൻ വിജയ്‍യുടെ ഈ നമ്പറിനെക്കുറിച്ച് വെളിപ്പെടുത്തിയിരുന്നു. 2026-ൽ വിജയ് മുഖ്യമന്ത്രിയാകുമെന്ന് അദ്ദേഹം പ്രവചിച്ചിരുന്നു: "2026-ൽ ഞാൻ അദ്ദേഹത്തിന് വോട്ട് ചെയ്യും. വിജയ് തമിഴ്‌നാട് മുഖ്യമന്ത്രിയാകുമെന്ന് ഞാൻ ഉറപ്പുനൽകുന്നു. കാത്തിരുന്നു കാണുക." പ്രേംജിയുടെ വാക്കുകൾ ഇപ്പോൾ ഏതാണ്ട് സത്യമായി മാറിക്കൊണ്ടിരിക്കുകയാണ്.

തിരഞ്ഞെടുപ്പും അവസാന ചിത്രവും
ആദ്യഘട്ടത്തിൽ പലരും വിജയ്‍യുടെ രാഷ്ട്രീയ പ്രവേശനത്തെ സംശയിച്ചിരുന്നെങ്കിലും, നിയമസഭാ തിരഞ്ഞെടുപ്പിലെ ഈ ട്രെൻഡുകൾ, അദ്ദേഹത്തിന് ശക്തമായ തുടക്കമാണ് നൽകുന്നത്. ഈ വർഷം ആദ്യം വിജയ്‍യുടെ അവസാന ചിത്രമായ 'ജനനായകൻ' ചില പ്രതിസന്ധികളിൽ അകപ്പെട്ടിരുന്നു. സെൻസർഷിപ്പ് പ്രശ്നങ്ങളും നിയമപോരാട്ടങ്ങളും നേരിട്ട ചിത്രം ഓൺലൈനിൽ ചോരുകയും ചെയ്തു. റിപ്പോർട്ടുകൾ പ്രകാരം ചിത്രം മെയ് 8-ന് റിലീസ് ചെയ്യും.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi