മലയാളത്തിന്റെ സൂപ്പര്‍സ്റ്റാര്‍ മോഹന്‍ലാല്‍ വിജയക്കുതിപ്പിലാണ്. അദ്ദേഹത്തിന്റെ ഏറ്റവും പുതിയ ചിത്രമായ 'ഹൃദയപൂര്‍വ്വം' ലോകമെമ്പാടുമായി 100 കോടി ക്ലബ്ബില്‍ ഔദ്യോഗികമായി ഇടംപിടിച്ചു. ഇത് അദ്ദേഹത്തിന്റെ തിളക്കമാര്‍ന്ന കരിയറിലെ മറ്റൊരു പൊന്‍തൂവലായി മാറിയിരിക്കുകയാണ്. സിനിമ ഒടിടിയിലും റിലീസ് ചെയ്തിരിക്കുകയാണിപ്പോൾ. ജിയോഹോട്ട്സ്റ്റാറിലാണ് സ്ട്രീം ചെയ്യുന്നത്.

ഓണം ഉത്സവവാരത്തില്‍ റിലീസ് ചെയ്ത 'ഹൃദയപൂര്‍വ്വ'ത്തിന് ബോക്‌സ് ഓഫീസില്‍ കടുത്ത മത്സരം നേരിടേണ്ടി വന്നിരുന്നു. കല്യാണി പ്രിയദര്‍ശന്‍, നസ്ലെന്‍ എന്നിവരുടെ 'ലോക: ചാപ്റ്റര്‍ 1 - ചന്ദ്ര', ഫഹദ് ഫാസില്‍-കല്യാണി പ്രിയദര്‍ശന്‍ എന്നിവരുടെ 'ഓടും കുതിര ചാടും കുതിര' തുടങ്ങിയ വമ്പന്‍ റിലീസുകളുമായി ഏറ്റുമുട്ടിയിട്ടും ചിത്രം സ്വന്തമായൊരു ഇടം കണ്ടെത്തി. മുതിര്‍ന്ന സംവിധായകന്‍ സത്യന്‍ അന്തിക്കാട് സംവിധാനം ചെയ്ത ഈ ചിത്രം ഒരു ക്ലാസിക് ഫാമിലി ഡ്രാമയാണ്. 'ലോക'യെപ്പോലെ റെക്കോര്‍ഡുകള്‍ തകര്‍ത്തില്ലെങ്കിലും, 2025-ല്‍ ഏറ്റവും കൂടുതല്‍ കളക്ഷന്‍ നേടിയ നാലാമത്തെ മലയാള ചിത്രമായി ഇത് മാറി.

മോഹന്‍ലാല്‍ നായകനായ ഈ ചിത്രത്തില്‍ മാളവിക മോഹനന്‍, സംഗീത് പ്രതാപ് എന്നിവരും പ്രധാന വേഷങ്ങളില്‍ എത്തുന്നു. അഭിനേതാക്കളുടെ സ്വാഭാവികവും ഹൃദയസ്പര്‍ശിയുമായ പ്രകടനങ്ങളെ നിരൂപകരും പ്രേക്ഷകരും ഒരുപോലെ പ്രശംസിച്ചു. ചിത്രത്തിന്റെ ലളിതമായ ഭാവത്തോട് ചേര്‍ന്ന, വര്‍ണ്ണാഭമായ ദൃശ്യങ്ങള്‍ ഒരുക്കിയ ഛായാഗ്രാഹകന്‍ അനു മൂത്തേടത്തും പ്രശംസ അര്‍ഹിക്കുന്നു. സംഗീതസംവിധായകന്‍ ജസ്റ്റിന്‍ പ്രഭാകരന്‍, മൂളിനടക്കാന്‍ തോന്നുന്ന നിരവധി ഗാനങ്ങളടങ്ങിയ ഹൃദയസ്പര്‍ശിയായ സംഗീതമാണ് ചിത്രത്തിന് നല്‍കിയത്.

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbiurl.in/grihalakshmi