മൊറോക്കോയിലെ സല നഗരത്തിലെ മെഴുകുത്സവം;കൂറ്റന്‍ മെഴുകുരൂപങ്ങള്‍ തലയിലേന്തി അറ്റ്‌ലാന്റിക്കിന്റെ തീരത്ത് ജനങ്ങള്‍ ഒന്നിക്കുന്നു

വൈകുന്നേരം അഞ്ചുമണികഴിഞ്ഞിരിക്കുന്നു. അബൂ റഖ്റഖ് നദിയുടെ ഓളപ്പരപ്പില്‍ സൂര്യന്‍ ഇളംകുപ്പായമിട്ട് മുങ്ങിക്കുളിക്കുന്നത് കാണാം. ചൂട് വിട്ടുമാറിയിട്ടില്ലെങ്കിലും സജീവമാണ് വഴിയോരത്തെ കമ്പോളങ്ങള്‍. മൊറോക്കോയുടെ തലസ്ഥാന നഗരമായ റബാത്തില്‍ പതിവില്‍ക്കവിഞ്ഞ തിരക്കുണ്ട് ഇന്ന്. പ്രശസ്തമായ ഹസ്സാന്‍ ടവര്‍ പള്ളിയില്‍, രാജാവ് മുഹമ്മദ് ആറാമന്‍ പങ്കെടുക്കുന്ന മൗലീദ് സദസ്സ് നടക്കുന്നു എന്നതാണ് വിശേഷം. ട്രാഫിക് മറികടന്ന് മുന്നോട്ടെടുക്കുക പ്രയാസമാണെന്ന് കണ്ടപ്പാള്‍ ഡ്രൈവര്‍ ഓരം ചേര്‍ന്നൊതുക്കിനിര്‍ത്തി. വഴിനിറയെ പോലീസുകാരും പട്ടാളക്കാരും.

ട്രാം സ്റ്റേഷന്‍ മുറിച്ചുകടന്നാല്‍ നവംബര്‍ 16 ചത്വരത്തിലെത്താം. ഫ്രഞ്ച് കോളനിയായിരുന്ന രാജ്യത്തിന്റെ സ്വാതന്ത്ര്യസമര ചരിത്രത്തിലെ നിര്‍ണായകമായൊരു ഓര്‍മ്മയാണ് ഈ ചത്വരം. സ്വതന്ത്ര രാജ്യമെന്ന മുദ്രാവാക്യം ഉയര്‍ത്തിയതിന്റെ പേരില്‍ മഡഗാസ്‌കറിലേക്ക് നാടുകടത്തപ്പെട്ട മുന്‍രാജാവ് മുഹമ്മദ് അഞ്ചാമന്‍ തിരിച്ചെത്തിയ ദിവസമാണ് നവംബര്‍ 16. പച്ചപുതച്ച വഴിയോരം നിറഞ്ഞുകൊണ്ടിരിക്കുന്നു. സ്ത്രീകളും കുട്ടികളുമടക്കം ആബാലവൃദ്ധം ജനങ്ങളാണ് രാജാവിനെ കാണാന്‍ ഹസ്സാന്‍ ടവര്‍ പരിസരത്തെത്തിയിരിക്കുന്നത്. മൊറോക്കോയുടെ ചുവന്ന പതാകയുള്ള മേല്‍വസ്ത്രമണിഞ്ഞിട്ടുണ്ട് പലരും.

Content Highlights: Witness the breathtaking Mawqib ash-Shuma`a, Salé`s candlelight procession celebrating the Prophet`s birthday in Morocco. Giant candles, music, and vibrant culture!