ഗോവിന്ദമല ട്രെക്ക്;നെല്ലിയാമ്പതിയിലെ തേയിലത്തോട്ടങ്ങളും കൊല്ലങ്കോടിന്റെ വശ്യതയും

ഐതിഹ്യങ്ങൾ പ്രകാരം കശ്യപമഹർഷി തപസ്സ് ചെയ്തിരുന്നത് ഗോവിന്ദമലയുടെ മുകളിലായിരുന്നു. മഹർഷിയുടെ ഭക്തിയിൽ പ്രീതനായ മഹാവിഷ്ണു മലമുകളിൽ ദർശനം നൽകിയെന്നും പിന്നീട് മഹർഷിയുടെ ആഗ്രഹപ്രകാരം മലയടിവാരത്തിൽ കുടികൊണ്ടു എന്നുമാണ് വിശ്വാസം. മഹർഷി തപസ്സുചെയ്ത ഈ ഭൂപ്രദേശം 'കശ്യപകുറിശ്ശി' എന്ന് അറിയപ്പെടുകയും കാലക്രമേണ അത് 'കാച്ചാംകുറുശ്ശി' ആയി മാറുകയും ചെയ്തു. പയ്യല്ലൂരിലെ പ്രശസ്തമായ തിരുക്കാച്ചാംകുറുശ്ശി ക്ഷേത്രമുറ്റത്തുനിന്ന് നോക്കിയാൽ ഗോവിന്ദമലയുടെ ഗാംഭീര്യമാർന്ന ദൃശ്യം കാണാൻ സാധിക്കും.

കൊല്ലങ്കോട്, നെല്ലിയാമ്പതി റേഞ്ചുകളുടെ അതിർത്തിയിലുൾപ്പെടുന്ന വനപ്രദേശമാണ് ഗോവിന്ദമല. അതുകൊണ്ടുതന്നെ സുരക്ഷാകാരണങ്ങളാൽ വനംവകുപ്പ് വർഷത്തിൽ രണ്ടുതവണ മാത്രമാണ് ഇങ്ങോട്ടേക്ക് പ്രവേശനം അനുവദിക്കാറുള്ളൂ-മകരമാസത്തിലെ തൈപ്പൂയം നാളിലും ശിവരാത്രി ദിനത്തിലും. കൊല്ലങ്കോട്ടിൽനിന്ന് ഏകദേശം ആറ് കിലോമീറ്റർ അകലെയുള്ള 'ചാത്തൻപാറ'യിൽനിന്നാണ് യാത്ര ആരംഭിക്കുന്നത്. യാത്രികരിൽ ഭൂരിപക്ഷവും ഭക്തരാണെങ്കിലും സാഹസികത ഇഷ്ടപ്പെടുന്ന ഒരുവിഭാഗം പ്രകൃതിസ്‌നേഹികളും ഈ മലകയറ്റത്തിന് എത്താറുണ്ട്. മൺസൂൺ കാലത്ത് സജീവമാകുന്ന വെള്ളരിമേട് വെള്ളച്ചാട്ടത്തിന്റെ മനോഹരമായ വ്യൂ പോയിന്റ് കൂടിയാണ് ചാത്തൻപാറ. ഈ വെള്ളച്ചാട്ടത്തിലൂടെ പിറവികൊള്ളുന്ന ഇക്ഷുമതി നദി പിന്നീട് ഭാരതപ്പുഴയുടെ കൈവരിയായ ഗായത്രിപ്പുഴയിൽ ചേരുന്നു. ചാത്തൻപാറയിലെ വിശാലമായ പാറപ്പുറത്ത് വാഹനങ്ങൾ പാർക്ക്‌ചെയ്ത്, അടുത്തുള്ള അയ്യപ്പക്ഷേത്രത്തിൽ തൊഴുതാണ് ഭക്തർ യാത്രതുടങ്ങുന്നത്.

Content Highlights: Historic association with Kashyapa Maharshi and the origin of the name Kachamkurussi., Restricted access: Forest department allows entry only twice a year (Thai Pooyam and Shivaratri)., Adventurous 3km trek featuring steep rock climbing with ropes., Stunning 360-degree views of Nelliampathy tea estates and Kollengode paddy fields., Spiritual significance of the hilltop shrine and sacred water drops.