‘സെറ്റിൽ രൺബീറും കത്രീന കൈഫും പ്രണയിച്ചിട്ടില്ല, അവിടെ എല്ലാവരും അനുസരണയുള്ള കുട്ടികളായിരുന്നു’

ബോളിവുഡ് താരങ്ങളായ കത്രീന കൈഫും രൺബീർ കപൂറും തമ്മിലുള്ള പ്രണയം ഏറെ വിവാദങ്ങളുണ്ടാക്കിയ ഒന്നായിരുന്നു. 'അജബ് പ്രേം കി ഗജബ് കഹാനി' എന്ന ചിത്രത്തിൽ പ്രവർത്തിക്കുമ്പോഴാണ് ഇരുവരും പ്രണയത്തിലായതെന്നാണ് അന്ന് പുറത്തുവന്ന റിപ്പോർട്ടുകൾ. എന്നാൽ ഷൂട്ടിങ്ങിനിടയിൽ ഇരുവരും പ്രണയിക്കുന്നത് (romancing) താൻ കണ്ടിട്ടില്ലെന്ന് പറയുകയാണ് സഹതാരങ്ങളിൽ ഒരാളായ വിശ്വനാഥ്. കത്രീനയുടെ അർപ്പണബോധത്തെ അദ്ദേഹം പ്രശംസിക്കുകയും ചെയ്തു.

ഒരു അഭിമുഖത്തിൽ, രൺബീറും കത്രീനയും തമ്മിലുള്ള പ്രണയത്തെക്കുറിച്ച് ചോദിച്ചപ്പോഴായിരുന്നു പ്രതികരണം. "സെറ്റിൽ അങ്ങനെയൊന്നും നടക്കുന്നുണ്ടായിരുന്നില്ല സാർ. രാജ്കുമാർ സന്തോഷിജി അവിടെ ഇരിക്കുകയായിരുന്നു, അദ്ദേഹത്തിന്റെ മുന്നിൽ അങ്ങനെയൊന്ന് നടക്കാൻ സാധ്യതയുണ്ടോ? അവിടെ എല്ലാവരും നല്ല അനുസരണയുള്ള കുട്ടികളെ പോലെയായിരുന്നു. രാജ്കുമാർ സന്തോഷി സർ ഒരു രാജാവാണ്, ഒരു സിംഹത്തെ പോലെയാണ് അദ്ദേഹം. അദ്ദേഹം ആളുകളെ കഥാപാത്രങ്ങളിൽ വളരെ ആഴത്തിൽ മുഴുകിയിരുത്തുകയും അതേസമയം, അവരെ കെയറും ചെയ്യുമായിരുന്നു. അങ്ങനെയൊന്ന് ഞാൻ കണ്ടിട്ടില്ല."

തുടർന്ന് അദ്ദേഹം കത്രീനയുടെ അർപ്പണബോധത്തെ പ്രശംസിച്ചു "രൺബീർ ഉൾപ്പെടെ ഞങ്ങളെല്ലാവരും കത്രീനയുടെ അർപ്പണബോധവും ശാരീരികക്ഷമതയും കണ്ട് അത്ഭുതപ്പെട്ടിരുന്നു. ബോട്ടിൽ നിന്ന് ഒരു കോണിയിലൂടെ പാലത്തിലേക്ക് എത്തേണ്ട ഒരു രംഗമുണ്ടായിരുന്നു, കത്രീന വളരെ വേഗത്തിൽ കയറി. സംഭാഷണങ്ങൾ കൃത്യമാക്കാനും വളരെ കഠിനാധ്വാനം ചെയ്തു. അർപ്പണബോധത്തിന്റെ കാര്യത്തിൽ കത്രീന ടീമിൽ ഒന്നാം സ്ഥാനത്തായിരുന്നു. ഞങ്ങൾ എല്ലാവരും ഒരുമിച്ച് വളരെ സന്തോഷത്തോടെ പ്രവർത്തിച്ചു."

അതേസമയം, പ്രണയത്തിന്റെ തുടക്കത്തിൽ തങ്ങൾ സാധാരണ കൂട്ടുകാരാണെന്നാണ് രൺബീറും കത്രീനയും പറഞ്ഞിരുന്നത്. പിന്നീട് പരിപാടികളിലും അവധി ദിവസങ്ങളിലും കുടുംബയോഗങ്ങളിലുമെല്ലാം ഇരുവരെയും ഒന്നിച്ച് കാണാൻ തുടങ്ങി. 2014-15 കാലഘട്ടത്തിൽ, ഇരുവരും ഒന്നിച്ച് താമസിക്കാൻ തുടങ്ങിയെന്ന് റിപ്പോർട്ടുകളുണ്ടായിരുന്നു. രണ്ടുപേരും ഉടനെ വിവാഹിതരാവുന്നുവെന്ന വാർത്തകളും പ്രചരിച്ചു. എന്നാൽ, 2016-ൽ, ഏകദേശം ആറ് വർഷത്തെ പ്രണയത്തിന് ശേഷം രൺബീറും കത്രീനയും വേർപിരിയുകയും ചെയ്തു. വേർപിരിയാനുള്ള കാരണം ഇരുവരും പരസ്യമാക്കിയിട്ടില്ല. ശേഷം, ഇരുതാരങ്ങളും തങ്ങളുടെ വ്യക്തിജീവിതത്തിൽ മുന്നോട്ട് പോയി. 2022-ൽ രൺബീർ കപൂർ ആലിയ ഭട്ടിനെ വിവാഹം കഴിച്ചു, അതേസമയം കത്രീന കൈഫ് 2021-ൽ വിക്കി കൗശലിനെയും വിവാഹം കഴിച്ചു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Co-star Vishwanath denies on-set romance between Ranbir and Katrina., Director Rajkumar Santoshi maintained a disciplined and focused work environment., Katrina Kaif was praised for her intense dedication and physical fitness during filming., The pair previously starred in Ajab Prem Ki Ghazab Kahani, Raajneeti, and Jagga Jasoos., Both actors have since moved on, with successful marriages to Vicky Kaushal and Alia Bhatt.