'ഈ ലോകത്ത് ആണുങ്ങൾ വേണ്ടായിരുന്നു. പെൺകുട്ടികൾ പൂക്കുകയോ മുട്ടയിടുകയോ ചെയ്താൽ മതിയായിരുന്നു'

നാട്ടുഭാഷയുടെ കരുത്തുള്ള എഴുത്തുശൈലിയും പുതുസങ്കേതങ്ങൾ സ്വാഭാവികമായി കൈകാര്യം ചെയ്യാനുള്ള മിടുക്കും വായനക്കാരന്റെ പൊതുബോധത്തെ ഉടച്ചു വാർക്കുന്ന ആശയങ്ങളും കഥയിൽ ഉൾപ്പെടുത്താനുള്ള അസാമാന്യ വൈദഗ്ധ്യമാണ് അമൽ പിരപ്പൻകോടിന്റെ കഥകളെ വ്യത്യസ്തമാക്കുന്നത്. ഭാഷയെ ആഢ്യപദങ്ങളിൽ നിന്ന് മോചിപ്പിക്കുകയും സാധാരണ മനുഷ്യന്റെ മാനസികാവസ്ഥയും ജീവിതാവസ്ഥയും യഥാതഥമായി ചിത്രീകരിക്കുകയും പ്രകൃതി ചൂഷണം, കച്ചവടവത്ക്കരണം, രാഷ്ട്രീയത്തിലെ അപചയം ഇതെല്ലാം സൂക്ഷ്മതയോടെ അവതരിപ്പിക്കുകയും ചെയ്യുന്ന കഥകളാണ് 'ഉരുവം ' എന്ന കഥാസമാഹാരത്തിലുള്ളത്.

ഉരുവത്തിലെ ' കുശലകുമാരി 'എന്ന കഥ കുശലകുമാരി എന്ന സ്ത്രീയെ കേന്ദ്രകഥാപാത്രമാക്കി രചിക്കപ്പെട്ടതാണ്. പാണ്ടൻ തെങ്ങിൽ ചാരി വെട്ടുപാറക്കല്ലിൽ ഒരു കാലെടുത്തുവെച്ച്, ചെവി മടക്കിൽ നിന്ന് ബീഡിയെടുത്ത് കത്തിച്ച് പുകയൂതി, ആറടി ഉയരം, ഉടയാത്ത ശരീരം കറുത്ത നിറം, തീ കണ്ണുകളും കള്ളി കൈലിയും കാവലിന് കന്യാവുകളും മാടനും മറുതയും ഒക്കെയുള്ള ഭൂലോകകേഡിയായാണ് വായനക്കാരന് മുന്നിൽ കുശലകുമാരി പ്രത്യക്ഷപ്പെടുന്നത്. കുശലകുമാരിയുടെ അമ്മ അവൾക്ക് പതിന്നാല് പതിനഞ്ച് വയസ്സായപ്പോൾ മരിച്ചു. അതോടെ മലക്കറികച്ചവടം നടത്തിയാണ് അവൾ ജീവിക്കുന്നത്. സിജോ എന്ന കഥാപാത്രത്തിന്റെ അമ്മയുടെ അടുത്ത സുഹൃത്തായിരുന്നു കുശലകുമാരി. സിജോയുടെയും ബഹന്നാൻ എന്ന പഞ്ചായത്ത് അംഗത്തിന്റെയും ഓർമ്മകളിലൂടെ കുശലകുമാരിയുടെ ഒരേകദേശരൂപം വായനക്കാരന് ലഭിക്കുന്നു. ബഹന്നാനും ചന്ത കോൺട്രാക്റ്ററായ നളിനനുമായി കൂട്ടുകച്ചവടവും രാഷ്ട്രീയ പ്രവർത്തനവും നടത്തി വന്നിരുന്ന സമയത്താണ് കുശലകുമാരിയുടെ അമ്മ മരിക്കുന്നതും ജീവിക്കാനായി അവൾ ചന്തക്കച്ചവടം തുടങ്ങുന്നതും.

Content Highlights: Explore Amal Pirappancode`s `Uruvam,` a collection of stories challenging societal norms. Dive into `Kushalakumari`s` fierce journey of survival and defiance.