ഇത് പരിമിതികളെ മറികടന്ന് സമകാലിക സ്ത്രീ എഴുത്തുകാർ ആർജിച്ച ആവിഷ്‌കാര സ്വാതന്ത്ര്യം

സ്ത്രീ ഭാവുകത്വത്തിന്റെ പുത്തൻ തലങ്ങൾ തേടിയുള്ള ഗൃഹലക്ഷ്മിയുടെ കഥാമത്സരത്തിന്റെ പുരസ്‌കാര സമർപ്പണ ചടങ്ങ് ഇന്നലെ വൈകീട്ട് നാലുമണിക്ക് കോഴിക്കോട് കെ.പി. കേശവമേനോൻ ഹാളിൽ വച്ച് നടന്നു. മലയാള സാഹിത്യ രംഗത്ത് കാലങ്ങൾക്ക് മുമ്പ് ഗൃഹലക്ഷ്മി നടത്തിയ മൂല്യവത്തായൊരു ഇടപെടലായിരുന്നു ഗൃഹലക്ഷ്മി കഥാമത്സരം. ആർദ്ര കെ.എസ്., നൂറ, ഐശ്വര്യ ജലജ പ്രദീപ് എന്നിവരാണ് യഥാക്രമം ഒന്നും രണ്ടും മൂന്നും സ്ഥാനങ്ങളിലെത്തിയത്. ഗൃഹലക്ഷ്മി അസിസ്റ്റന്റ് എഡിറ്റർ കെ. വിശ്വനാഥ് സ്വാഗതം പറഞ്ഞ ചടങ്ങിൽ സാഹിത്യകാരൻ കൽപ്പറ്റ നാരായണൻ പുരസ്‌കാരം സമ്മാനിച്ചു. മാതൃഭൂമി ഡയറക്ടർ, ഡിജിറ്റൽ ബിസിനസ്സ് മയൂര എം.എസ്. ജേതാക്കൾക്ക് പ്രശസ്തി പത്രവും കൈമാറി. സമ്മാനത്തുകയടങ്ങുന്ന ചെക്ക് കൈമാറിയത് എഴുത്തുകാരി ആർ. രാജശ്രീയാണ്.

പുരസ്‌കാരദാന ചടങ്ങിനുശേഷം വേദിയിൽ 'മലയാള കഥയിലെ നൂതന ചലനങ്ങൾ' എന്ന വിഷയത്തിൽ കൽപ്പറ്റ നാരായണൻ പ്രഭാഷണവും നടത്തി. മലയാള സാഹിത്യത്തിലും ഭാഷയിലും സമീപകാലത്തുണ്ടായ വിപ്ലവാത്മകമായ മാറ്റങ്ങളെയും സ്ത്രീ-പുരുഷ സമത്വത്തിന്റെ പുതിയ ഭാവങ്ങളെയും അടയാളപ്പെടുത്തുന്നതായിരുന്നു പ്രസംഗം. ചരിത്രപരവും വ്യാകരണപരവുമായ പരിമിതികളെ മറികടന്ന് സമകാലിക സ്ത്രീ എഴുത്തുകാർ ആർജിച്ച ആവിഷ്‌കാര സ്വാതന്ത്ര്യത്തെ പ്രാസംഗികൻ വിശകലനം ചെയ്തു. പഴയകാല ഉല്പത്തി കഥകളിലെയും കുഞ്ചൻ നമ്പ്യാരുടെ വരികളിലെയും സ്ത്രീവിരുദ്ധമായ പൊതുബോധത്തെ തിരുത്തിയാണ് പുതിയ എഴുത്തുകാർ മുന്നോട്ട് വരുന്നതെന്നും സ്ത്രീയെ അബദ്ധക്കാരിയായി ചിത്രീകരിച്ച പഴയ സങ്കല്പങ്ങളിൽ നിന്ന്, അവളെ സ്വാതന്ത്ര്യത്തിന്റെ ആദ്യ വിമോചകയായി കാണുന്ന പുതിയ കാഴ്ചപ്പാടുകൾ സാഹിത്യത്തിൽ രൂപപ്പെട്ടിട്ടുണ്ടെന്നും അദ്ദേഹം അഭിപ്രായപ്പെട്ടു. പുരുഷൻ നിർമ്മിച്ച ഭാഷയിൽ സ്ത്രീക്ക് സ്വന്തം സ്വത്വം ആവിഷ്‌കരിക്കാൻ കഴിയാത്ത പരിമിതിയെ മറികടക്കാൻ കുമാരനാശാൻ തന്റെ കഥാപാത്രങ്ങളിലൂടെ വലിയ പരീക്ഷണങ്ങൾ നടത്തിയിരുന്നു. ഒരു പരിധി വരെ എഴുതുമ്പോൾ സ്ത്രീയായി മാറുന്ന സവിശേഷമായ ട്രാൻസ്‌ജെൻഡർ ഭാവമാണ് ആശാൻ പുലർത്തിയത്. ഇന്ന് കഥകളിൽ ആൺ-പെൺ വ്യത്യാസങ്ങൾ തിരിച്ചറിയാനാകാത്ത വിധം ആശ്വാസകരമായ മാറ്റം വന്നിട്ടുണ്ട്. പണ്ട് പുരുഷന്മാർക്ക് മാത്രം പ്രാപ്യമായിരുന്ന മദ്യശാലകളുടെ പശ്ചാത്തലങ്ങളും മയ്യത്ത് കഴുകൽ പോലുള്ള അതീവ സൂക്ഷ്മമായ ജീവിതസാഹചര്യങ്ങളും പുതിയ കഥാകാരികൾ തങ്ങളുടെ രചനകളിൽ മികവോടെ അവതരിപ്പിക്കുന്നതിനെയും അദ്ദേഹം പ്രശംസിച്ചു. 'കുനിഞ്ഞവർക്കേ നിവരാനാകൂ' എന്ന തത്വമാണ് ഇവിടെ പ്രകടമാകുന്നത്. ദീർഘകാലം അടിച്ചമർത്തപ്പെട്ടവരായതുകൊണ്ട് തന്നെ സ്ത്രീകൾ കൈവരിച്ച ആവിഷ്‌കാര സ്വാതന്ത്ര്യം വന്യവും ശക്തവുമാണ്. എഴുത്തിൽ 'എന്ത്' പറയുന്നു എന്നതിനേക്കാൾ 'എങ്ങനെ' ആവിഷ്‌കരിക്കുന്നു എന്ന രൂപത്തിനാണ് പ്രാധാന്യമെന്ന് പ്രസംഗത്തിൽ ചൂണ്ടിക്കാട്ടി. മുൻകാലത്തെ പ്രമുഖ എഴുത്തുകാരെപ്പോലെ ദാർശനികമായ വലിയൊരു ദർശനം ചില കഥകളിൽ ദൃശ്യമല്ലെങ്കിലും, ജീവിതത്തെ ഇത്രമാത്രം സൂക്ഷ്മമായി പഠിച്ച് ആവിഷ്‌കരിക്കുന്ന പുതിയ പെൺകുട്ടികളുടെ കഥകൾ മലയാള സാഹിത്യത്തിന് വലിയ പ്രതീക്ഷയാണ് നൽകുന്നതെന്നും പ്രസംഗത്തിൽ പറഞ്ഞു.

മത്സരത്തിൽ തിരഞ്ഞെടുക്കപ്പെട്ട 20 കഥകൾ ഉൾപ്പെടുത്തിയ ഗൃഹലക്ഷ്മി കഥകൾ എന്ന പുസ്തകത്തിന്റെ പ്രകാശനവും പരിപാടിയോടനുബന്ധിച്ച് നടത്തി. എഴുത്തുകാരി ആർ. രാജശ്രീയാണ് പുസ്തകപ്രകാശനം നടത്തിയത്. സ്ത്രീകളുടെ എഴുത്തിൽ ദർശനഗരിമയുടെ കുറവുണ്ടെന്ന വിമർശനം ഉൾക്കൊള്ളാൻ മടിയില്ലെന്ന് വ്യക്തമാക്കിയ പുരസ്‌കാര സമിതി അംഗം കൂടിയായ എഴുത്തുകാരി, അതിന് പിന്നിലെ സാമൂഹിക സാഹചര്യങ്ങളെ ചർച്ച ചെയ്യേണ്ടതുണ്ടെന്ന് ഓർമ്മിപ്പിച്ചു. 'നാളെ എന്ത് ഭക്ഷണം ഉണ്ടാക്കണം എന്ന് ഇന്നലെ മുതൽ ആലോചിക്കേണ്ടിവരുന്ന ഒരു സ്ത്രീക്ക്, താൻ എഴുതുന്ന നോവലിന്റെ കഥാഗതിയെക്കുറിച്ച് ആലോചിക്കാൻ രാത്രി ഒൻപത് മണിക്ക് ശേഷമേ സമയം കിട്ടാറുള്ളൂ. ഈ മേഖലയിലേക്ക് വരണമെങ്കിൽ സ്ത്രീകൾക്ക് ഇരട്ടി അധ്വാനം വേണം,' അവർ പറഞ്ഞു. ദളിത് ചിന്തകളെയോ സ്ത്രീപക്ഷ ചിന്തകളെയോ മലയാളത്തിന്റെ മുഖ്യധാരാ സാഹിത്യലോകം അർഹിക്കുന്ന ഗൗരവത്തോടെ ചർച്ച ചെയ്തിട്ടില്ലെന്നും അവർ കുറ്റപ്പെടുത്തി. മലയാളത്തിലെ പുതിയ എഴുത്തുകാരെ അംഗീകരിക്കാൻ മടിക്കുന്ന മുൻതലമുറയുടെ മനോഭാവത്തെയും വിമർശിച്ചു. ഒരു അനുഭവത്തെ മുൻനിർത്തി, 'എങ്ങനെ തെളിയിച്ചാലാണ് ഞങ്ങൾ എഴുത്തുകാരാണെന്ന് നിങ്ങൾ അംഗീകരിക്കുക?' എന്ന ശക്തമായ ചോദ്യവും അവർ ആരാഞ്ഞു. എഴുത്തിൽ സീനിയോറിറ്റി ഒരു മാനദണ്ഡമല്ലെന്നും സ്വയം ഒരു പുതിയ എഴുത്തുകാരിയായി കാണാനാണ് തനിക്കിഷ്ടമെന്നും അവർ വ്യക്തമാക്കി. പുരസ്‌കാരത്തിനായി വന്ന കഥകൾ മുഴുവനും ജൂറി അംഗങ്ങളായ സിതാര എസ്., ഇ.പി. രാജഗോപാലൻ എന്നിവർക്കൊപ്പം താളുകൾ വിടാതെ വായിച്ചതിനെക്കുറിച്ചും എഴുത്തുകാരി സംസാരിച്ചു. 'പൂർണ്ണമായും ഫാൾസ് കോഡ് നമ്പറുകൾ ഇട്ടാണ് കഥകൾ തങ്ങൾക്ക് ലഭിച്ചത്. അതിനാൽ വ്യക്തിപരമായ താല്പര്യങ്ങൾക്ക് അതീതമായി തികച്ചും ജനാധിപത്യപരമായാണ് കഥകൾ വിലയിരുത്തിയത്. എഴുത്ത് നിർത്തിപ്പോയ പലരുടെയും തിരിച്ചുവരവിന് ഇത്തരം മത്സരങ്ങൾ കാരണമാകുന്നു.' ജീവിതത്തിന്റെ വിലക്ഷണതകളെപ്പോലും ഭംഗിയാക്കി മാറ്റുന്നതാണ് യഥാർത്ഥ സാഹിത്യമെന്ന് പുതിയ എഴുത്തുകാരെ അവർ ഓർമ്മിപ്പിച്ചു. വർത്തമാനകാല വാർത്തകളിൽ നടത്തുന്നതുപോലെ കഥകളിലും നോവലുകളിലും വസ്തുതാപരിശോധന (Fact Checking) നടത്തുന്നത് സാഹിത്യത്തിന്റെ ആസ്വാദനത്തെ പിന്നോട്ടടിക്കുമെന്നും അവർ അഭിപ്രായപ്പെട്ടു. സത്യത്തെയും അസത്യത്തെയും വിശ്വസനീയമായ രീതിയിൽ 'നുണയായി പറഞ്ഞു ഫലിപ്പിക്കുന്നതാണ്' സാഹിത്യത്തിന്റെ സൗന്ദര്യം, ലോകസാഹിത്യത്തിന്റെ വലിയൊരു ശേഖരം നമ്മുടെ മുന്നിലുണ്ടെന്നും അത് വായിച്ചുൾക്കൊണ്ട് സ്വയം തിരുത്തി വളരാൻ പുതിയ തലമുറ തയ്യാറാകണമെന്നും ആഹ്വാനം ചെയ്തുകൊണ്ടാണ് ജൂറി പ്രതിനിധി സംസാരിച്ച് അവസാനിപ്പിച്ചത്.

വിധിനിർണ്ണയ പ്രക്രിയയും അനുഭവങ്ങളും പങ്കുവെച്ചാണ് ജൂറി പ്രതിനിധി എസ്. സിതാര സംസാരിച്ചത്. സാഹിത്യപരമായും വിഷയപരമായും ചില പരിമിതികളോ പ്രശ്‌നങ്ങളോ ഉള്ള കഥകൾ ഇടയ്ക്കുണ്ടായിരുന്നെങ്കിൽ പോലും, മത്സരത്തിന് വന്ന എല്ലാ കഥകളിലും ഏതെങ്കിലും തരത്തിലുള്ള ഒരു മികച്ച 'സ്പാർക്ക്' കണ്ടെത്താൻ സാധിച്ചതിൽ അവർ സന്തോഷം രേഖപ്പെടുത്തി. കഥകൾ അയച്ചുതന്നത് പൂർണ്ണമായും രഹസ്യ സ്വഭാവത്തോടെയായിരുന്നതിനാൽ നിഷ്പക്ഷമായ വിലയിരുത്തലിന് അത് മുതൽക്കൂട്ടായെന്നും സിതാരയും അഭിപ്രായപ്പെട്ടു. പുരുഷകേന്ദ്രീകൃതമായ ഈ സമൂഹത്തിൽ സ്ത്രീകൾക്ക് എഴുത്തുമായി മുന്നോട്ടുപോകുക എന്നത് ഒട്ടും എളുപ്പമല്ലെന്ന കാര്യം വീണ്ടും അടിവരയിട്ട് പറഞ്ഞു. ഒരു പുരുഷൻ ബിസിനസ്സിലോ ഔദ്യോഗിക മേഖലയിലോ എത്തുന്നതിനേക്കാൾ എത്രയോ മടങ്ങ് അധ്വാനം അതേ സ്ഥാനത്തെത്താൻ ഒരു സ്ത്രീക്ക് ആവശ്യമാണെന്നും, അവിടെ എത്തിക്കഴിഞ്ഞാലും ആ പദവി നിലനിർത്താൻ അവൾക്ക് നിരന്തരം സ്ട്രഗിൾ ചെയ്യേണ്ടി വരുന്നുണ്ടെന്നും നിരീക്ഷിക്കപ്പെട്ടു. പ്രതിസന്ധികൾക്കിടയിലും സ്ത്രീകൾ എങ്ങനെ ഇത്ര നന്നായി എഴുതുന്നു എന്നതിനെക്കുറിച്ച് ഒരു ലേഖനം എഴുതാമോ എന്ന് ഒരു പ്രമുഖ വാരികയുടെ എഡിറ്റർ ചോദിച്ച കാര്യം പ്രസംഗത്തിൽ പരാമർശിക്കപ്പെട്ടു. എന്നാൽ, എഴുത്തിന് അങ്ങനെ പ്രത്യേക 'ടിപ്പുകൾ' ഒന്നും തന്നെയില്ലെന്നും, ഓരോ സ്ത്രീയും അവരുടെ ജീവിത സാഹചര്യങ്ങൾക്കനുസരിച്ച് പ്രതിസന്ധികളെ സ്വന്തം നിലയിൽ മറികടന്നുകൊണ്ടാണ് അക്ഷരങ്ങളുടെ ലോകത്തേക്ക് എത്തിച്ചേരുന്നതെന്നും സിതാര വ്യക്തമാക്കി. ഇത്തരം പരിമിതികളെ മറികടന്ന് മികച്ച രചനകൾ നടത്തിയ, മത്സരത്തിൽ പങ്കെടുത്ത എല്ലാ എഴുത്തുകാരികളെയും സ്‌നേഹത്തോടെ ചേർത്തുപിടിച്ചുകൊണ്ടാണ് അവർ പ്രസംഗം അവസാനിപ്പിച്ചത്.

തന്റെ ചെറുപ്പകാലത്ത് കുടുംബത്തിലുണ്ടായിരുന്ന വലിയമ്മയുടെ ഓർമ്മകൾ പങ്കുവെച്ചുകൊണ്ടാണ് ജൂറി അംഗമായ ഇ.പി. രാജഗോപാലൻ പ്രസംഗം ആരംഭിച്ചത്. റെയിൽവേ ട്രാക്കിൽ അമ്മ സ്വയം ഇല്ലാതാക്കിയതിന്റെ ആഘാതവും ദുരന്തവും പേറി ജീവിച്ച, ആ വലിയമ്മ തന്റെ ദുഃഖങ്ങളെ സ്വാതന്ത്ര്യത്തിന്റെ സന്ദർഭങ്ങളാക്കി മാറ്റിയ വിചിത്ര വ്യക്തിത്വമായിരുന്നു എന്നദ്ദേഹം പറഞ്ഞു. യു.ആർ. അനന്തമൂർത്തിയുടെ ജീവിതാനുഭവങ്ങളെ മുൻനിർത്തി, വീടിന്റെ മുൻഭാഗത്തെ ഉന്നതരുടെ സഭകളേക്കാൾ പിറകിലെ വേലക്കാരുടെ സംഭാഷണങ്ങളാണ് ജീവിതത്തിന്റെ പുതിയ നറേറ്റീവുകൾ നൽകിയതെന്ന് അദ്ദേഹം ഓർമ്മിപ്പിച്ചു. 'പുരുഷന്മാർ പൊതുവെ മിണ്ടാതെ അനുസരിക്കുന്ന സ്ത്രീകളെ വീട്ടുപകരണമായി കാണാൻ ആഗ്രഹിക്കുമ്പോൾ, അതിനെതിരെയുള്ള ശക്തമായ പ്രതിരോധമാണ് സ്ത്രീ എഴുത്തുകൾ. മാധവിക്കുട്ടിയുടെ കഥകൾ മുതൽ സമകാലിക എഴുത്തുകാരായ രാജശ്രീ, സിതാര എന്നിവരുടെ കൃതികൾ വരെ ഈ പാരമ്പര്യം കാത്തുസൂക്ഷിക്കുന്നു.' അദ്ദേഹം പറഞ്ഞു. 'ഭരണകൂടം എന്നാൽ വലിയൊരു പുരുഷനാണ്. വമ്പിച്ച ധനശക്തിയും മനുഷ്യശക്തിയും ബുദ്ധിയുമുള്ള വലിയൊരു പുരുഷൻ. സ്‌കൂളുകളും കോളേജുകളും ഉൾപ്പെടെയുള്ള നമ്മുടെ വ്യവസ്ഥിതികളെല്ലാം ഇത്തരം ആണധികാര രൂപങ്ങളാണ്. ഇതിനെതിരെയുള്ള മാനസികവും നേരിട്ടുള്ളതുമായ നീക്കങ്ങളാണ് സ്ത്രീ എഴുത്തുകൾ നിർവ്വഹിക്കേണ്ടത്. പൊരുത്തപ്പെട്ട് വിജയിക്കുക എന്നതാണ് പുതിയ മുതലാളിത്ത കാലഘട്ടം നൽകുന്ന പ്രിസ്‌ക്രിപ്ഷൻ. പണ്ട് കേരളത്തിൽ ഏറ്റവും ആകർഷകമായ വാക്ക് 'കോംറേഡ്' (സഖാവ്) എന്നതായിരുന്നുവെങ്കിൽ ഇന്ന് 'കോംപ്രമൈസർ' എന്നതായി മാറിയിരിക്കുന്നു. പ്രതിപക്ഷമില്ലാത്ത, രാഷ്ട്രീയമില്ലാത്ത ഒരു വിചിത്രമായ അന്തരീക്ഷമാണ് കേരളത്തിലുള്ളത്. മാറ്റത്തിന് കാരണമാകുന്ന പല വാക്കുകളും മലയാള ഭാഷയിൽ നിന്ന് തന്നെ അപ്രത്യക്ഷമായിക്കൊണ്ടിരിക്കുകയാണെന്നും അദ്ദേഹം കൂട്ടിച്ചേർത്തു.

അപ്രതീക്ഷിതമായി ലഭിച്ച പുരസ്‌കാരത്തിളക്കത്തിന്റെ സന്തോഷം പങ്കുവെക്കുകയായിരുന്നു ജേതാക്കളായ ആർദ്ര കെ.എസ്., നൂറ, ഐശ്വര്യ ജലജ പ്രദീപ് എന്നിവർ. തന്റെ എഴുത്തുകളുടെ തുടർച്ചയ്ക്ക് പുരസ്‌കാരം മുതൽക്കൂട്ടായെന്ന് ആർദ്രയും വർഷങ്ങൾക്കുശേഷം തങ്ങളുടെ ഭാഷയെ വീണ്ടെടുക്കാനും എഴുതിത്തുടങ്ങാനുമുള്ള പ്രചോദനമായെന്ന് മറ്റു രണ്ടുപേരും അഭിപ്രായപ്പെട്ടു. എഴുത്തുകാരൻ കൽപ്പറ്റ നാരായണൻ പ്രസംഗത്തിൽ പറഞ്ഞ എഴുത്തുകളിലെ ദാർശനികതയുടെ അഭാവത്തെക്കുറിച്ചും തങ്ങളുടെ വ്യക്തിപരമായ കാഴ്ചപ്പാടുകൾ ജേതാക്കൾ പങ്കുവെച്ചു.

സാഹിത്യത്തെയും എഴുത്തിലെ നവീന ആശയങ്ങളെയും മുറുകെപ്പിടിക്കാനുള്ള ലക്ഷ്യത്തോടെ ഗൃഹലക്ഷ്മി നടത്തിയ ആദരസന്ധ്യയിൽ പങ്കെടുക്കാൻ വേദിയിലും നിരവധി മനുഷ്യർ ഒത്തുചേർന്നു. ഗൃഹലക്ഷ്മി സീനിയർ സബ് എഡിറ്റർ വി. പ്രവീണ സദസ്സിലും വേദിയിലും സന്നിഹിതരായ മുഴുവൻ ആളുകൾക്കും നന്ദി പറഞ്ഞ് പരിപാടി അവസാനിപ്പിച്ചു. ഗൃഹലക്ഷ്മി സബ് എഡിറ്റർ അനന്യ ജി. ആയിരുന്നു പരിപാടിയുടെ മോഡറേറ്റർ. 
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Honoring winners of the 2026 Grihalakshmi Short Story Competition., Analysis of contemporary trends in Malayalam storytelling and women's agency., Launch of the 'Grihalakshmi Kathakal' book featuring 20 selected stories., Expert insights on the challenges and creative freedom of women writers in Kerala., Critique of patriarchal structures and the evolution of language in literature.