അജിത്തിന്റെ മകനായി നസ്ലിനെ വേണ്ടെന്ന് പറഞ്ഞത് ഞാനാണ്; കാരണം വെളിപ്പെടുത്തി ആദിക് രവിചന്ദ്രൻ

മലയാളത്തിൽ യുവതാരമായി തിളങ്ങുന്നതിനൊപ്പം തമിഴ് സിനിമയിലും സാന്നിധ്യമറിയിക്കുകയാണ് നസ്ലിൻ. സൂര്യ നായകനാകുന്ന 'സീൻ' എന്ന ചിത്രത്തിലൂടെ തമിഴിൽ അരങ്ങേറ്റം കുറിച്ചിരിക്കുകയാണ് താരം. ഇതിനിടെ അജിത് കുമാറിന്റെ 'ഗുഡ് ബാഡ് അഗ്ലി'യിൽ നസ്ലിൻ അഭിനയിക്കുമെന്ന് നേരത്തേ റിപ്പോർട്ടുകളുണ്ടായിരുന്നു. ചിത്രത്തിൽ അജിത്തിന്റെ മകനായാണ് നസ്ലിൻ എത്തുന്നതെന്നായിരുന്നു അഭ്യൂഹങ്ങൾ. എന്നാൽ ആ വേഷം ഒടുവിൽ താരത്തിന് ലഭിച്ചില്ല. ഇപ്പോഴിതാ നസ്ലിൻ ചിത്രത്തിന്റെ ഭാഗമാകാതിരുന്നതിന്റെ കാരണം വെളിപ്പെടുത്തിയിരിക്കുകയാണ് സംവിധായകൻ ആദിക് രവിചന്ദ്രൻ.

'ഡ്യൂഡ്' എന്ന ചിത്രത്തിലേക്ക് മമിത ബൈജുവിനെ പരിഗണിക്കുന്നതിനിടെ നസ്ലിനെയും കാണണമെന്ന് നിർമാതാക്കളായ മൈത്രി മൂവി മേക്കേഴ്സ് ആദിക് രവിചന്ദ്രനോട് ആവശ്യപ്പെട്ടിരുന്നു. ആ സമയത്ത് നസ്ലിൻ ചെന്നൈയിലുണ്ടായിരുന്നതിനാലാണ് കൂടിക്കാഴ്ചയ്ക്ക് അവസരമൊരുങ്ങിയത്. എന്നാൽ അജിത്തിന്റെ മകനായി നസ്ലിനെ കാസ്റ്റ് ചെയ്യേണ്ടതില്ലെന്ന് നിർദേശിച്ചത് താൻ തന്നെയാണെന്ന് ആദിക് വ്യക്തമാക്കി.

“ഞാൻ നസ്ലിനെ കാണുകയും അജിത് കുമാർ സാറിന്റെ സിനിമയാണ് ചെയ്യുന്നതെന്ന് പറയുകയും ചെയ്തു. അജിത് സാറിന്റെ മകനായി നസ്ലിനെ കാസ്റ്റ് ചെയ്യേണ്ടെന്ന് മൈത്രി മൂവി മേക്കേഴ്സിനോട് ഞാൻ തന്നെയാണ് പറഞ്ഞത്. കാരണം, നസ്ലിൻ ഇതിനകം നായകനായി അഭിനയിക്കുന്ന നടനാണ്. ആ കഥാപാത്രത്തിന് സിനിമയിൽ കാര്യമായ ഇടവും ഉണ്ടായിരുന്നില്ല. അച്ഛനും മകനും തമ്മിലുള്ള ബന്ധത്തിന് പ്രാധാന്യമുള്ള മുഴുനീള സിനിമയായിരുന്നെങ്കിൽ നസ്ലിനെ പരിഗണിക്കാമായിരുന്നു”, ആദിക് പറഞ്ഞു. ഒടുവിൽ കാർത്തികേയ ദേവിനാണ് ആ കഥാപാത്രം ലഭിച്ചത്. 'ഗുഡ് ബാഡ് അഗ്ലി'യിൽ വിഹാൻ എന്ന കഥാപാത്രത്തെയാണ് താരം അവതരിപ്പിച്ചത്.
അതേസമയം, സൂര്യ നായകനായെത്തുന്ന 'സീൻ' എന്ന ചിത്രത്തിലൂടെയാണ് നസ്ലിൻ തമിഴിൽ അരങ്ങേറ്റം കുറിച്ചിരിക്കുന്നത്. ദീപാവലി റിലീസായി ഇന്ന് ചിത്രം തിയേറ്ററുകളിലെത്തി. ജിത്തു മാധവൻ സംവിധാനം ചെയ്ത ചിത്രത്തിൽ ഡി.എസ്.പി ഇമ്പരാജ് എന്ന കഥാപാത്രത്തെയാണ് സൂര്യ അവതരിപ്പിക്കുന്നത്. നസ്ലിൻ വില്ലൻ വേഷത്തിലാണ് എത്തുന്നത്. ആദ്യ തമിഴ് ചിത്രത്തിൽ തന്നെ സൂര്യയെപ്പോലൊരു താരത്തിനൊപ്പം സ്‌ക്രീൻ പങ്കിടുന്നതും നസ്ലിന്റെ അരങ്ങേറ്റത്തെ ശ്രദ്ധേയമാക്കുന്നു.

അജിത് കുമാറിനൊപ്പം രണ്ടാമതും ഒന്നിക്കാനുള്ള ഒരുക്കത്തിലാണ് ആദിക് രവിചന്ദ്രൻ. 'ഡെയർഡെവിൾ' എന്ന് പേരിട്ടിരിക്കുന്ന ചിത്രത്തിന്റെ പൂജ അടുത്തിടെ ചെന്നൈയിൽ നടന്നു. ദീപാവലിക്കുശേഷം ചിത്രീകരണം ആരംഭിക്കുമെന്നാണ് റിപ്പോർട്ടുകൾ. അജിത്തിന്റെ ഭാര്യ ശാലിനി അജിത് കുമാറിന്റെ ബ്രേവ് ഹാർട്ട്സ് പ്രൊഡക്ഷൻസാണ് ചിത്രം നിർമിക്കുന്നത്.
ശ്രീലീല, പാർഥിപൻ, പ്രഭു, സുനിൽ, ഉണ്ണി മുകുന്ദൻ തുടങ്ങിയവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്. അനിരുദ്ധ് രവിചന്ദറാണ് സംഗീതം. അഭിനന്ദൻ രാമാനുജം ഛായാഗ്രഹണവും വിജയ് വെളുക്കുട്ടി എഡിറ്റിങ്ങും നിർവഹിക്കുന്നു.

ആദിക്കിന്റെ ചിത്രങ്ങളുമായി ബന്ധപ്പെട്ട് നസ്ലിന്റെ പേരും നേരത്തേ ചർച്ചകളിൽ വന്നിരുന്നെങ്കിലും 'ഗുഡ് ബാഡ് അഗ്ലി'യിലെ കാസ്റ്റിങ്ങിനെക്കുറിച്ചുള്ള വിശദീകരണം മാത്രമാണ് സംവിധായകൻ ഇപ്പോൾ നൽകിയിരിക്കുന്നത്. 'ഡെയർഡെവിൾ' ചിത്രത്തിൽ നസ്ലിൻ ഉണ്ടാകുമെന്ന കാര്യത്തിൽ സ്ഥിരീകരണമില്ല.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi