10,000 രൂപ ശമ്പളത്തിന് ജിം ട്രെയിനറായി... ഇന്നിതാ പാകിസ്താൻ അധോലോക സംഘത്തിലെ ഇന്ത്യൻ ചാരൻ

ആദിത്യ ധറിന്റെ 'ധുരന്ധർ: ദി റിവഞ്ച്' ബോക്സ് ഓഫീസിൽ തരംഗം സൃഷ്ടിക്കുമ്പോൾ, അതിലെ ഓരോ കഥാപാത്രവും പ്രേക്ഷക ശ്രദ്ധ നേടുകയാണ്. ചിത്രത്തിൽ ഹംസയുടെ (രൺവീർ സിങ്) വിശ്വസ്തനായ സഹായിയും പാകിസ്താനിലെ ഇന്ത്യൻ ചാരനുമായ റിസ്‌വാൻ എന്ന കഥാപാത്രത്തെ അവതരിപ്പിച്ചത് മുസ്തഫ അഹമ്മദ് ആണ്. സെലിബ്രിറ്റി ഫിറ്റ്നെസ്സ് ട്രെയിനറിൽ നിന്ന് നടനായി മാറിയ താരമാണ് അദ്ദേഹം.

വെറും 10,000 രൂപ ശമ്പളത്തിന് ജിം ട്രെയിനറായി ജോലി തുടങ്ങിയ മുസ്തഫയുടെ ജീവിതം ഒരു സിനിമ പോലെ വിസ്മയിപ്പിക്കുന്നതാണ്. 21-ാം വയസ്സിൽ ഒരു കോൾ സെന്ററിൽ ജോലി ചെയ്തിരുന്ന മുസ്തഫ, 2004-05 കാലഘട്ടത്തിൽ പ്രതിമാസം ഒരു ലക്ഷം രൂപ ശമ്പളം വാങ്ങുന്ന ഏറ്റവും പ്രായം കുറഞ്ഞ ടീം ലീഡറായിരുന്നു. എന്നാൽ ഫിറ്റ്‌നസിനോടുള്ള അഭിനിവേശം കാരണം അദ്ദേഹം ആ ജോലി ഉപേക്ഷിച്ചു.

ഡൽഹിയിലെ ഒരു ജിമ്മിൽ വെച്ച് പ്രായമായ ഒരു സ്ത്രീയെ വ്യായാമം ചെയ്യാൻ സഹായിച്ചതാണ് അദ്ദേഹത്തിന്റെ ജീവിതം മാറ്റിയത്. രണ്ടു മാസത്തിന് ശേഷം അവർ നൽകിയ കത്തിൽ, "നീ ഇതിനായി ജനിച്ചവനാണ്, ഇത് നിന്റെ നിയോഗമാണ്" എന്ന് എഴുതിയിരുന്നു. ആ വാക്കുകൾ മുസ്തഫയെ സ്വാധീനിക്കുകയും അദ്ദേഹം തന്റെ ഉയർന്ന ശമ്പളമുള്ള ജോലി ഉപേക്ഷിക്കുകയും ചെയ്തു. ഇതിനെത്തുടർന്ന് മുസ്തഫയുടെ അമ്മ ഒരാഴ്ചയോളം അദ്ദേഹത്തോട് സംസാരിച്ചില്ലത്രേ. പിന്നീട് ജാനക്പുരിയിലെ ഒരു ജിമ്മിൽ വെറും 10,000 രൂപ ശമ്പളത്തിന് അദ്ദേഹം ജോലിക്ക് ചേർന്നു.

തുടർന്ന് ഏഷ്യയിലെ തന്നെ ഒന്നാം നമ്പർ ട്രെയിനറായി മാറിയ മുസ്തഫയ്ക്ക് തന്റെ ഭാര്യയുടെ ഫിറ്റ്‌നസ് ബേക്കറി വഴിയാണ് സിനിമ മേഖലയുമായി ബന്ധമുണ്ടാകുന്നത്. ഹൃത്വിക് റോഷന്റെ അന്നത്തെ ട്രെയിനർ അവിടെ എത്തുമായിരുന്നു. അദ്ദേഹം ലണ്ടനിലേക്ക് മടങ്ങിയപ്പോൾ മുസ്തഫ ഹൃത്വിക്കിനെ ബന്ധപ്പെട്ടു. മുസ്തഫയുടെ പരിശീലനത്തിൽ തൃപ്തനായ ഹൃത്വിക്, അദ്ദേഹത്തെ മുഴുവൻ സമയ ട്രെയിനറായി നിയമിച്ചു. പിന്നീട് രൺവീർ സിങ്, വിക്കി കൗശൽ, യാമി ഗൗതം തുടങ്ങിയ മുൻനിര താരങ്ങളുടെയും പരിശീലകനായി അദ്ദേഹം മാറി.

2025-ൽ യാമി ഗൗതം ചിത്രം 'ധൂം ധാം' ലൂടെയാണ് മുസ്തഫ സിനിമയിൽ അരങ്ങേറ്റം കുറിച്ചത്. 'ധുരന്ധർ' എന്ന ചിത്രത്തിൽ അർഷാദ് പപ്പുവിന്റെ സംഘത്തിലേക്ക് നുഴഞ്ഞുകയറിയ ഇന്ത്യൻ ചാരനായാണ് അദ്ദേഹം എത്തുന്നത്. ചിത്രത്തിലെ അദ്ദേഹത്തിന്റെ പ്രകടനം കണ്ട് ആരാധകർ അദ്ദേഹത്തെ "അടുത്ത സണ്ണി ഡിയോൾ" എന്നാണ് വിശേഷിപ്പിക്കുന്നത്.

ആദ്യദിനം ഇന്ത്യയിൽ 145 കോടി രൂപ നേടിയ ചിത്രം (ധുരന്ധർ 2 ) വെറും നാല് ദിവസത്തിനുള്ളിൽ 450 കോടി കടന്നു. ആഗോളതലത്തിൽ ചിത്രം ഇതിനോടകം 750 കോടി രൂപ പിന്നിട്ടതായാണ് റിപ്പോർട്ടുകൾ. അർജുൻ രാംപാൽ, ആർ. മാധവൻ, സഞ്ജയ് ദത്ത് എന്നിവരും ഈ ചിത്രത്തിൽ പ്രധാന വേഷങ്ങളിലുണ്ട്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Mustafa Ahmed's transition from a high-paying call center job to a fitness trainer., The pivotal moment that led him to pursue a career in fitness., His journey as a celebrity trainer for stars like Hrithik Roshan and Ranveer Singh., His successful acting debut and performance in the blockbuster Dhurandhar.