ശ്വാസകോശത്തെ ബാധിക്കുന്ന ആരോഗ്യപ്രശ്നങ്ങൾ അനുദിനം വര്‍ധിച്ചുവരികയാണ്. ക്രോണിക് ഒബ്‌സ്ട്രക്റ്റീവ് പള്‍മണറി ഡിസീസ് (സി.ഒ.പി.ഡി) ലോകമെമ്പാടുമുള്ള 38.4 കോടിയോളം പേരെ ബാധിക്കുന്നു. പ്രതിവര്‍ഷം 30 ലക്ഷത്തോളം മരണങ്ങൾക്കും കാരണമാകുന്നു. 2020-ല്‍  22.1 ലക്ഷം പുതിയ കേസുകളും 18 ലക്ഷം മരണങ്ങളുമായി ശ്വാസകോശ അര്‍ബുദം അർബുദ മരണത്തിന്റെ പ്രധാന കാരണമാണെന്നറിയുക. കൂടാതെ, ഓരോ വര്‍ഷവും 70 ലക്ഷം മരണങ്ങള്‍ക്ക് വായു മലിനീകരണം കാരണമാകുന്നു, ഇത് ആസ്ത്മ, സി.ഒ.പി.ഡി, ശ്വാസകോശ അര്‍ബുദം എന്നിവയെ കൂടുതല്‍ വഷളാക്കുന്നു. 'ശ്വാസകോശാരോഗ്യത്തിനായി പ്രവര്‍ത്തിക്കാം' എന്ന സന്ദേശം ഉയര്‍ത്തിയാണ് ലോകാരോഗ്യസംഘടന ഈ വര്‍ഷത്തെ ലോക ശ്വാസകോശ ദിനം ആചരിക്കുന്നത്.

To advertise here,

ശ്വാസകോശാരോഗ്യത്തെ ബാധിക്കുന്ന പ്രധാന കാരണങ്ങള്‍

  • വായു മലിനീകരണം- ഇന്ത്യയില്‍, പ്രത്യേകിച്ച് നഗരപ്രദേശങ്ങളില്‍, വായു മലിനീകരണം ഒരു പ്രധാന പ്രശ്നമാണ്. വായു മലിനീകരണം മൂലം ശ്വാസകോശ സംബന്ധമായ രോഗങ്ങള്‍ വര്‍ധിക്കുന്നു.
  • പുകവലി- പുകവലി ശ്വാസകോശാരോഗ്യത്തിന് ഏറ്റവും വലിയ ഭീഷണികളിലൊന്നാണ്. ഇന്ത്യയില്‍ പുകവലി മൂലം ശ്വാസകോശാര്‍ബുദം, ക്രോണിക് ഒബ്സ്ട്രക്റ്റീവ് പള്‍മണറി ഡിസീസ് (COPD) എന്നിവ വര്‍ധിക്കുന്നു.
  • വ്യായാമക്കുറവ്- ശ്വാസകോശാരോഗ്യത്തിന് വ്യായാമം വളരെ പ്രധാനമാണ്.

പ്രധാന പ്രശ്നങ്ങള്‍

  • ശ്വാസകോശാര്‍ബുദം
  • ക്രോണിക് ഒബ്സ്ട്രക്റ്റീവ് പള്‍മണറി ഡിസീസ് (COPD)
  • ആസ്ത്മ

പരിഹാരം

  • വായു മലിനീകരണം കുറയണം- അതിന് നടപടിയെടുക്കേണ്ടത് സര്‍ക്കാരാണ്. പാരിസ്ഥിതിക നിയമങ്ങള്‍ കര്‍ശനമാക്കണം.
  • പുകവലി നിര്‍ത്തുക- പുകവലി നിര്‍ത്തുന്നതിനായി ബോധവത്കരണ പരിപാടികള്‍ നടത്തുക. പുകവലി നിര്‍ത്താന്‍ സഹായകമായ അന്തരീക്ഷം സൃഷ്ടിക്കുക.
  • വ്യായാമം പ്രോത്സാഹിപ്പിക്കുക- ശ്വാസകോശാരോഗ്യത്തിന് വ്യായാമം പ്രോത്സാഹിപ്പിക്കണം. സ്‌കൂളുകളില്‍, ഓഫീസുകളില്‍ വ്യായാമ പരിപാടികള്‍ സംഘടിപ്പിക്കണം.
  • പുതിയ ചികിത്സകള്‍ക്കായുള്ള ഗവേഷണത്തെ പ്രോത്സാഹിപ്പിക്കുക.

ആധുനിക ചികിത്സകള്‍
ശ്വാസകോശ ചികിത്സാരംഗത്ത് ആരോഗ്യരംഗം വലിയ പുരോഗതി കൈവരിച്ചിരിക്കുന്ന സമയമാണിത്. സി.ഒ.പി.ഡി.ക്ക്, ബ്രോങ്കോഡിലേറ്ററുകളും ഇന്‍ഹേല്‍ഡ് സ്റ്റിറോയിഡുകളും മുതല്‍ പള്‍മണറി റീഹാബിലിറ്റേഷനും സപ്ലിമെന്റല്‍ ഓക്സിജന്‍ തെറാപ്പിയും വരെയുള്ള ചികിത്സകള്‍ ഇപ്പോള്‍ ലഭ്യമാണ്. ശ്വാസകോശ അര്‍ബുദ ചികിത്സകളുടെ കാര്യത്തിലും ഗണ്യമായി പുരോഗതിയുണ്ടായിട്ടുണ്ട്. ശ്വാസകോശാര്‍ബുദ രോഗികളില്‍ കോശങ്ങളെ ലക്ഷ്യമാക്കി നടത്തുന്ന ടാര്‍ഗെറ്റഡ് തെറാപ്പികളും രോഗപ്രതിരോധശേഷി വര്‍ധിപ്പിച്ചുകൊണ്ടുള്ള ഇമ്യൂണോതെറാപ്പികളും അതിജീവന നിരക്ക് മെച്ചപ്പെടുത്താന്‍ സഹായിക്കുന്നു. രോഗം ഗുരുതരമായ കേസുകളില്‍, ശ്വാസകോശം മാറ്റിവയ്ക്കലും ഒരു പ്രായോഗിക സാധ്യത നല്‍കുന്നു,

നൂതനമായ സമീപനങ്ങളും ഉയര്‍ന്നുവരുന്നുണ്ട്. ഉദാഹരണത്തിന്, ബ്രോങ്കോസ്‌കോപ്പിക് ലങ് വോളിയം റിഡക്ഷന്‍ (ബി.എല്‍.വി.ഡി.) എന്നത് എംഫിസീമ രോഗികള്‍ക്കുള്ള മിനിമലി ഇന്‍വേസീവ് പ്രക്രിയയാണ്, ശ്വസനം മെച്ചപ്പെടുത്തുന്നതിന് ശ്വാസകോശത്തിന്റെ അളവ് കുറയ്ക്കുന്ന രീതിയാണിത്. കൂടാതെ, ജീന്‍ തെറാപ്പിയും റീജനറേറ്റീവ് മെഡിസിനും ജനിതക ശ്വാസകോശ വൈകല്യങ്ങളെ ചികിത്സിക്കുന്നതിനും കേടായ ശ്വാസകോശ കോശങ്ങളെ നന്നാക്കുന്നതിനും സഹായിക്കുന്നു.

പരമ്പരാഗത ചികിത്സകള്‍ക്കപ്പുറം, പ്രതിരോധത്തിലും നേരത്തെയുള്ള കണ്ടെത്തലിലും ശ്രദ്ധ കേന്ദ്രീകരിക്കുന്നത് നിര്‍ണായകമാണ്. പുകവലി നിര്‍ത്തല്‍, ചിട്ടയായ വ്യായാമം, ശുദ്ധവായു എന്നിവ ഉള്‍പ്പെടെയുള്ള ആരോഗ്യകരമായ ജീവിതശൈലി പ്രോത്സാഹിപ്പിക്കുന്നത് ശ്വാസകോശ രോഗങ്ങളുടെ സാധ്യത കുറയ്ക്കുന്നതിന് അത്യാവശ്യമാണ്. കൂടാതെ, ശ്വാസകോശ കാന്‍സര്‍ സ്‌ക്രീനിങ്ങിലെ ആധുനിക സംവിധാനങ്ങളും നേരത്തെയുള്ള രോഗനിര്‍ണയവും വിജയകരമായ ചികിത്സയുടെ സാധ്യത വര്‍ധിപ്പിക്കുന്നു.

ആരോഗ്യകരമായ ശ്വാസകോശങ്ങള്‍ക്കായി, ശ്വാസകോശ സംബന്ധമായ അസുഖങ്ങള്‍ക്ക് കാരണമാകുന്ന സാമൂഹികവും പാരിസ്ഥിതികവുമായ ഘടകങ്ങളെ അഭിസംബോധന ചെയ്യേണ്ടത് അത്യന്താപേക്ഷിതമാണ്. വായു മലിനീകരണം കുറയ്ക്കുക, എല്ലാവര്‍ക്കും മികച്ച ചികിത്സാ ലഭ്യത ഉറപ്പുവരുത്തുക, ശ്വാസകോശാരോഗ്യം ലക്ഷ്യമിട്ടുള്ള പ്രചാരണ പ്രവര്‍ത്തനങ്ങള്‍, ഗവേഷണങ്ങള്‍ തുടങ്ങി സമഗ്രമായ സമീപനത്തിന്റെ ആവശ്യകതയാണ് ആഗോളതലത്തില്‍ ഉയര്‍ന്നുകൊണ്ടിരിക്കുന്ന രോഗികളുടെ എണ്ണം വിളിച്ചു പറയുന്നത്.

(തലശ്ശേരി മിഷന്‍ ഹോസ്പിറ്റലിലെ കണ്‍സള്‍ട്ടന്റ് പള്‍മനോളജിസ്റ്റാണ് ലേഖകന്‍)