പെട്ടെന്ന് സംഭവിക്കുന്നതല്ല ആര്‍ത്തവവിരാമം. മിക്ക സ്ത്രീകള്‍ക്കും ആര്‍ത്തവം പൂര്‍ണമായി നില്‍ക്കുന്നതിന് വര്‍ഷങ്ങള്‍ക്കുമുമ്പ് തന്നെ മാറ്റങ്ങള്‍ അനുഭവപ്പെടാന്‍ തുടങ്ങും. 'ആര്‍ത്തവവിരാമപരിവര്‍ത്തനം' അല്ലെങ്കില്‍ 'പ്രീമെനോപോസ്' എന്നാണിതിനെ പറയുന്നത്. ഈ സമയത്ത് ഈസ്ട്രജന്‍ ഹോര്‍മോണിന്റെ അളവ് കുറയുന്നതുമൂലം ശരീരത്തിന് അനുഭവപ്പെടുന്ന ചൂട് (ഹോട്ട് ഫ്‌ളാഷുകള്‍), രാത്രി വിയര്‍പ്പ്, മാനസികാവസ്ഥയിലെ മാറ്റങ്ങള്‍, ഉറക്ക പ്രശ്‌നങ്ങള്‍, വിഷാദം തുടങ്ങിയവയുണ്ടാകുന്നു. പിന്നീടുള്ള വര്‍ഷങ്ങളില്‍ പലര്‍ക്കും യോനിയില്‍ വരള്‍ച്ച അനുഭവപ്പെടുന്നു. പതുക്കെ ആര്‍ത്തവവിരാമത്തിനായി ശരീരം തയ്യാറെടുക്കുന്നതാണിത്. 12 മാസത്തിനുള്ളില്‍ ആര്‍ത്തവം ഉണ്ടായിട്ടില്ലെങ്കില്‍, നിങ്ങള്‍ ആര്‍ത്തവവിരാമത്തിലൂടെ കടന്നുപോകുന്നു.
ആര്‍ത്തവവിരാമത്തോടെ അണ്ഡാശയങ്ങള്‍ അണ്ഡം പുറത്തുവിടുന്നത് നിര്‍ത്തുകയും ഈസ്ട്രജന്‍, പ്രൊജസ്ട്രോണ്‍ എന്നീ ഹോര്‍മോണുകളുടെ ഉത്പാദനം നിര്‍ത്തുകയും ചെയ്യുന്നു. ആര്‍ത്തവവിരാമം സാധാരണയായി 45-നും 55-നും ഇടയിലാണ് സംഭവിക്കുന്നത്; ആര്‍ത്തവവിരാമത്തിന്റെ ശരാശരി പ്രായം 51 വയസ്സാണ്. ചിലര്‍ക്ക് അതിലും നേരത്തെ, 40-നും 45-നുമിടയിലും ആര്‍ത്തവവിരാമമുണ്ടായേക്കാം.
Also Read
ഏകദേശം 10 മുതല്‍ 15 ശതമാനം വരെ സ്ത്രീകള്‍ക്ക് ആര്‍ത്തവവിരാമത്തിന്റെ നേരിയ ലക്ഷണങ്ങള്‍ മാത്രമേയുണ്ടാവൂ. ചിലരില്‍ രോഗലക്ഷണങ്ങള്‍ ഉണ്ടാവുകയുമില്ല. ചില സ്ത്രീകള്‍ക്ക് ഈ രോഗലക്ഷണങ്ങള്‍ പ്രീ മെനോപോസ് സമയത്ത് ആരംഭിച്ച് ഏകദേശം 7 മുതല്‍ 10 വര്‍ഷം വരെ നീണ്ടുനില്‍ക്കും, പക്ഷെ ചിലപ്പോള്‍ ഇതിലും കൂടുതല്‍ കാലം നീണ്ടുനില്‍ക്കും.
മെനോപോസ് ചികിത്സ ആവശ്യമോ?
എല്ലാ സ്ത്രീകള്‍ക്കും ആര്‍ത്തവവിരാമലക്ഷണങ്ങള്‍ക്ക് ചികിത്സ ആവശ്യമില്ല. നിങ്ങളുടെ ലക്ഷണങ്ങള്‍ അത്ര ഗുരുതരമല്ലെങ്കില്‍, സ്വന്തമായി പരീക്ഷിക്കാന്‍ കഴിയുന്ന ചില കാര്യങ്ങളുണ്ട്. എന്നാല്‍ കൂടുതല്‍ ഗുരുതരമായ അല്ലെങ്കില്‍ ശല്യപ്പെടുത്തുന്ന ലക്ഷണങ്ങള്‍ക്ക്, ഫലപ്രദമായ ചികിത്സകള്‍ ലഭ്യമാണ്. ചെറിയ ലക്ഷണങ്ങള്‍ക്ക് നമ്മുടെ ശരിയായ ഭക്ഷണരീതികള്‍, 20 മുതല്‍ 30 മിനിറ്റുവരെ നീണ്ടുനില്‍ക്കുന്ന വ്യായാമം എന്നിവ വളരെ ഫലപ്രദമാണ്.
ആര്‍ത്തവവിരാമ പ്രശ്‌നങ്ങള്‍ക്ക് ഹോര്‍മോണ്‍ തെറാപ്പി ഒരു ഫലപ്രദമായ ചികിത്സയാണ്. ഹോര്‍മോണ്‍ തെറാപ്പിയുടെ സുരക്ഷയെ കുറിച്ച് മുമ്പ് ആശങ്കകള്‍ ഉണ്ടായിരുന്നെങ്കിലും, ആര്‍ത്തവവിരാമത്തിന്റെ ലക്ഷണങ്ങളുമായി സഹായം തേടുന്ന മിക്ക സ്ത്രീകള്‍ക്കും ഇത് സുരക്ഷിതവും കുറഞ്ഞ അപകടസാധ്യതയുള്ളതും ഫലപ്രദവുമാണ്.
ഹോര്‍മോണ്‍ തെറാപ്പിയില്‍ ഈസ്ട്രജനും പ്രൊജസ്‌ട്രോണും സംയോജിപ്പിച്ചാണ് ചികിത്സ. എന്നിരുന്നാലും ഗര്‍ഭപാത്രം ഇല്ലാത്ത സ്ത്രീകള്‍ക്ക് ഈസ്ട്രജന്‍ മാത്രമേ ആവശ്യമുള്ളൂ. കഴിക്കാനുള്ള ഒരു ഗുളിക, സ്‌കിന്‍ പാച്ച്, വജൈനല്‍ റിങ്, സ്‌കിന്‍ ജെല്‍, ക്രീം, സ്‌പ്രേ എന്നിവയില്‍ ഹോര്‍മോണ്‍ തെറാപ്പി ലഭ്യമാണ്. ചൂടുള്ള ഫ്‌ളാഷുകള്‍ ഒഴിവാക്കുന്നതിന് പുറമേ, യോനിയിലെ വരള്‍ച്ച, വിഷാദം, മറ്റ് മാനസികപ്രശ്‌നങ്ങള്‍ എന്നിവയുള്‍പ്പെടെ ആര്‍ത്തവവിരാമത്തിന്റെ മറ്റ് ലക്ഷണങ്ങള്‍ക്കും ഹോര്‍മോണ്‍ തെറാപ്പി സഹായകരമാണ്. എന്നിരുന്നാലും, വിഷാദരോഗവുമായി മല്ലിടുന്ന ചില സ്ത്രീകള്‍ക്ക് ആന്റിഡിപ്രസന്റ് മരുന്ന് കഴിച്ചുള്ള ചികിത്സയും ആവശ്യമായി വന്നേക്കാം.
(കോഴിക്കോട് ബേബി മെമ്മോറിയല്‍ ഹോസ്പിറ്റലില്‍ ഒബ്‌സ്‌റ്റെട്രിക്‌സ് & ഗൈനക്കോളജി വിഭാഗത്തില്‍ സീനിയര്‍ കണ്‍സള്‍ട്ടന്റാണ് ലേഖിക)
Content Highlights: menopause; diagnosis and treatment
Published: 22 Oct 2024, 11:26 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented