മുടിവളർച്ച മുതൽ നല്ല ഉറക്കം വരെ: മത്തനോളം ഗുണം നൽകുന്ന മത്തങ്ങക്കുരു

മത്തങ്ങ ഉപയോഗിച്ച് കറി, സൂപ്പ്, പായസം, ഡെസേർട്ട് തുടങ്ങി പല വിഭവങ്ങളും നമ്മൾ തയ്യാറാക്കാറുണ്ട്. എന്നാൽ മത്തങ്ങ മുറിച്ച് ഉപയോഗിക്കുമ്പോൾ അതിലെ കുരു പലപ്പോഴും ചവറ്റുകുട്ടയിലേക്കാണ് പോകുന്നത്. ഇങ്ങനെ കളയുന്ന ഈ ചെറിയ കുരുവിലാണ് പ്രോട്ടീൻ, നാരുകൾ, ആരോഗ്യകരമായ കൊഴുപ്പുകൾ, മഗ്‌നീഷ്യം, സിങ്ക്, ആന്റിഓക്‌സിഡന്റുകൾ തുടങ്ങിയ നിരവധി പോഷകങ്ങൾ ഒളിഞ്ഞിരിക്കുന്നത്.

വറുത്ത് ലഘുഭക്ഷണമായി കഴിക്കാനും സാലഡിലും തൈരിലും സൂപ്പിലും ചേർക്കാനും എളുപ്പമാണ് മത്തങ്ങക്കുരു. മുടിയുടെ ആരോഗ്യം മുതൽ നല്ല ഉറക്കം വരെയുള്ള ചില കാര്യങ്ങളിൽ ഇതിലെ പോഷകങ്ങൾ സഹായകരമാകാം.

മത്തങ്ങക്കുരുവിൽ പ്രോട്ടീൻ, നാരുകൾ, അപൂരിത കൊഴുപ്പുകൾ എന്നിവയ്ക്കൊപ്പം മഗ്‌നീഷ്യം, സിങ്ക്, പൊട്ടാസ്യം, കാൽസ്യം, സെലിനിയം, വിറ്റാമിൻ ഇ തുടങ്ങിയ പോഷകങ്ങളും അടങ്ങിയിട്ടുണ്ട്. എന്നാൽ ഇത് കലോറി കൂടുതലുള്ള ഭക്ഷണമായതിനാൽ അളവ് ശ്രദ്ധിച്ച് കഴിക്കുന്നതാണ് നല്ലത്.

മത്തങ്ങക്കുരുവിന്റെ 7 ആരോഗ്യഗുണങ്ങൾ

ഹൃദയാരോഗ്യം സംരക്ഷിക്കുന്നു
ആരോഗ്യകരമായ കൊഴുപ്പുകളും ആന്റിഓക്‌സിഡന്റുകളും അടങ്ങിയ മത്തങ്ങക്കുരു സമീകൃതാഹാരത്തിന്റെ ഭാഗമായി ഉൾപ്പെടുത്താം. രക്തത്തിലെ കൊളസ്‌ട്രോൾ, പഞ്ചസാര എന്നിവ നിയന്ത്രിക്കുന്നതിനും ഹൃദയാരോഗ്യത്തെ പിന്തുണയ്ക്കുന്നതിനും സഹായകരമായ പോഷകങ്ങൾ ഇതിലുണ്ട്.

നല്ല ഉറക്കത്തിന് സഹായിക്കുന്നു
മഗ്‌നീഷ്യവും ട്രിപ്‌റ്റോഫാനും അടങ്ങിയതിനാൽ വൈകുന്നേരത്തെ ലഘുഭക്ഷണത്തിന്റെ ഭാഗമായി ചെറിയ അളവിൽ മത്തങ്ങക്കുരു ഉൾപ്പെടുത്താം. ഇത് നല്ല ഉറക്കത്തിന് സഹായിക്കുമെങ്കിലും ഉറക്കപ്രശ്‌നങ്ങൾക്കുള്ള മരുന്നായി ഇതിനെ കാണരുത്.

മുടിയുടെ ആരോഗ്യത്തിന്
സിങ്ക്, പ്രോട്ടീൻ, ആരോഗ്യകരമായ കൊഴുപ്പുകൾ എന്നിവ മുടിയുടെ ആരോഗ്യത്തിന് ആവശ്യമായ പോഷകങ്ങളാണ്. മത്തങ്ങക്കുരുവും പോഷകസമൃദ്ധമായ സമീകൃതാഹാരത്തിന്റെ ഭാഗമായി ഉൾപ്പെടുത്തുന്നത് മുടിയ്ക്ക് കൂടുതൽ കരുത്ത് നൽകും.

ദഹനത്തിന് സഹായം
നാരുകൾ അടങ്ങിയിരിക്കുന്നതിനാൽ ദഹനാരോഗ്യത്തിന് മത്തങ്ങക്കുരു സഹായകമാകാം. എന്നാൽ അധികമായി കഴിക്കുന്നത് ചിലരിൽ വയറുവീർക്കാനും അസ്വസ്ഥതയുണ്ടാക്കാനും സാധ്യതയുള്ളതിനാൽ അളവ് ശ്രദ്ധിച്ച് കഴിക്കണം.

ആന്റിഓക്‌സിഡന്റ് സംരക്ഷണം
ശരീരത്തിലെ ഓക്‌സിഡേറ്റീവ് സമ്മർദത്തിനെതിരെ പ്രവർത്തിക്കാൻ സഹായിക്കുന്ന ആന്റിഓക്‌സിഡന്റുകളും വിറ്റാമിൻ ഇയും മത്തങ്ങക്കുരുവിൽ അടങ്ങിയിട്ടുണ്ട്. കോശങ്ങളുടെ ആരോഗ്യത്തെ പിന്തുണയ്ക്കുന്നതിൽ ഇവയ്ക്ക് പങ്കുണ്ട്.

മൂത്രാശയത്തിന്റെ ആരോഗ്യത്തിന്
മത്തങ്ങക്കുരുവും അതിൽനിന്നുള്ള എണ്ണയും മൂത്രാശയത്തിന്റെ ആരോഗ്യത്തിന് നല്ലതാണെന്ന് ചില പഠനങ്ങൾ സൂചിപ്പിക്കുന്നു. അമിതമായി മൂത്രമൊഴിക്കാനുള്ള പ്രവണത പോലുള്ള പ്രശ്‌നങ്ങളിൽ സപ്ലിമെന്റുകൾ ഉപയോഗിക്കുന്നതിന് മുമ്പ് ഡോക്ടറുടെ നിർദേശം തേടുന്നത് നല്ലതാണ്.

പുരുഷന്മാരുടെ പ്രോസ്റ്റേറ്റ് ആരോഗ്യത്തിന്
മത്തങ്ങക്കുരുവിൽ അടങ്ങിയിരിക്കുന്ന സിങ്ക്, ഫൈറ്റോസ്റ്റെറോളുകൾ തുടങ്ങിയ ഘടകങ്ങൾ പ്രോസ്റ്റേറ്റ് ആരോഗ്യത്തെ പിന്തുണയ്ക്കാൻ സഹായകമാകാം. എന്നാൽ പ്രോസ്റ്റേറ്റ് സംബന്ധമായ അസ്വസ്ഥതകൾക്ക് സ്വയം ചികിത്സയ്ക്ക് പകരം വിദഗ്ധരുടെ നിർദേശം തേടണം.

എങ്ങനെ ഭക്ഷണത്തിൽ ഉൾപ്പെടുത്താം?
ലഘുഭക്ഷണമായി: വറുത്ത മത്തങ്ങക്കുരു ചെറിയ അളവിൽ കഴിക്കാം.
സൂപ്പിലും സാലഡിലും തൈരിലും: ക്രഞ്ചി ടെക്‌സ്ചറിനായി മുകളിൽ ചേർക്കാം.
ഓട്‌സിലും സ്മൂത്തിയിലും: മറ്റ് വിത്തുകൾക്കൊപ്പം ഉൾപ്പെടുത്താം.
എണ്ണയായി: മത്തങ്ങക്കുരുവിൽ നിന്നുള്ള എണ്ണ സാലഡ് ഡ്രസ്സിങ്ങായി ഉപയോഗിക്കാം.

കുരു കളയണ്ട, വറുത്ത് കഴിക്കാം
മത്തങ്ങയിൽനിന്ന് എടുത്ത കുരു നന്നായി കഴുകി വൃത്തിയാക്കിയ ശേഷം ഉണക്കുക. പിന്നീട് ഓവനിലോ പാനിലോ വറുത്തെടുക്കാം. അധികം ഉപ്പും എണ്ണയും ചേർക്കാതെ ഉപയോഗിക്കുന്നതാണ് നല്ലത്. തൊലിയോടുകൂടിയ കുരുവും പച്ചനിറത്തിലുള്ള തൊലിയില്ലാത്ത പെപ്പിറ്റാസ് എന്നറിയപ്പെടുന്ന കുരുവും വിപണിയിൽ ലഭ്യമാണ്.

മത്തങ്ങക്കുരു ആരോഗ്യകരമായ ഭക്ഷണമാണെങ്കിലും കലോറി കൂടുതലാണ്. അതിനാൽ ദിവസവും വലിയ അളവിൽ കഴിക്കുന്നതിനുപകരം ചെറിയൊരു പിടി അല്ലെങ്കിൽ ഭക്ഷണത്തിൽ ടോപ്പിങ്ങായി ചെറിയ അളവിൽ ഉൾപ്പെടുത്താം. പ്രത്യേകിച്ച് ഭാരം നിയന്ത്രിക്കാൻ ശ്രമിക്കുന്നവർ കഴിക്കുന്ന അളവ് ശ്രദ്ധിക്കണം.

പച്ചയോ വറുത്തതോ ആയ മത്തങ്ങക്കുരു കഴിക്കാം. പച്ചക്കുരുവിന് സ്വാഭാവികമായ രുചിയാണെങ്കിൽ വറുത്ത കുരുവിന് കൂടുതൽ ക്രഞ്ചും സുഗന്ധവുമുണ്ടാകും. പാക്കറ്റിലാക്കി വിൽക്കുന്ന വറുത്ത കുരു വാങ്ങുമ്പോൾ അതിൽ അധിക ഉപ്പ്, പഞ്ചസാര, എണ്ണ എന്നിവ ചേർത്തിട്ടുണ്ടോ എന്ന് പരിശോധിക്കേണ്ടതാണ്.

എങ്ങനെ സൂക്ഷിക്കാം?
വായു കടക്കാത്ത പാത്രത്തിലോ ചൂടിൽനിന്നും നേരിട്ടുള്ള സൂര്യപ്രകാശത്തിൽനിന്നും മാറ്റിയോ സൂക്ഷിക്കുക. കൊഴുപ്പിന്റെ അളവ് കൂടുതലായതിനാൽ ചൂടും ഈർപ്പവുമുള്ള കാലാവസ്ഥയിൽ ഫ്രിഡ്ജിൽ സൂക്ഷിച്ചാൽ കുരു പെട്ടെന്ന് കേടാകുന്നത് ഒഴിവാക്കാൻ സഹായിക്കും.

ചെറുതാണെങ്കിലും പോഷകങ്ങളുടെ കാര്യത്തിൽ മത്തങ്ങക്കുരു ഒട്ടും ചെറുതല്ല. ദിവസവും ചെറിയ അളവിൽ തൈരിലോ സാലഡിലോ സൂപ്പിലോ ചേർക്കുന്നതിലൂടെ ഈ കുരുവിനെ ഭക്ഷണത്തിന്റെ ഭാഗമാക്കാം. പക്ഷേ ആരോഗ്യഗുണങ്ങൾ ലഭിക്കാൻ അമിതമായി കഴിക്കേണ്ടതില്ല, മിതത്വമാണ് പ്രധാനം.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi