പുരുഷന്മാർക്ക് നിർഭാഗ്യം കൊണ്ടുവരുന്ന ലോകത്തിലെ ഏറ്റവും വിലപിടിപ്പുള്ള വജ്രം

ലോകത്തിലെ ഏറ്റവും വിലപിടിപ്പുള്ള വജ്രമായ കോഹിനൂർ, ബ്രിട്ടീഷ് രാജകിരീടത്തിലെ അമൂല്യശേഖരത്തിന്റെ ഭാഗമാണ്. 'വിലമതിക്കാനാവാത്തത്' എന്ന് വിശേഷിപ്പിക്കപ്പെടുന്ന ഈ രത്‌നത്തിന് സംഭവബഹുലമായ ഒരു ഭൂതകാലമുണ്ട്.

കോഹിനൂരിന്റെ തിളക്കവും ഭംഗിയും എല്ലാവരെയും ആകർഷിക്കാറുണ്ടെങ്കിലും, അതിനോടൊപ്പമുള്ള ഒരു ശാപത്തെകുറിച്ച് പലർക്കും അറിയില്ല. പേർഷ്യൻ ഭാഷയിൽ 'പ്രകാശത്തിന്റെ മല' എന്നറിയപ്പെടുന്ന, ഏകദേശം 105.6 കാരറ്റ് തൂക്കമുള്ള ഈ വജ്രം, അത് കൈവശം വെക്കുന്ന പുരുഷന്മാർക്ക് നിർഭാഗ്യം കൊണ്ടുവരുമെന്നാണ് വിശ്വസിക്കപ്പെടുന്നത്.

ഒഡീഷ സ്റ്റേറ്റ് ആർക്കൈവ്സ് പ്രകാരം, പതിമൂന്നാം നൂറ്റാണ്ടിൽ കാകതീയ രാജവംശത്തിന്റെ ഭരണകാലത്ത് ഗോൽകൊണ്ട മേഖലയിലെ (ഇന്നത്തെ തെലങ്കാന) കൊല്ലൂർ ഖനികളിൽ നിന്നാണ് ഈ വജ്രം കണ്ടെത്തിയത്. ഇതിന്റെ അസാധാരണമായ വലിപ്പവും തിളക്കവും ഉടമസ്ഥർക്കിടയിൽ അത്യാഗ്രഹത്തിനും അഹങ്കാരത്തിനും കാരണമായി.

വിവിധ കാലഘട്ടങ്ങളിലായി ഹിന്ദു, അഫ്ഗാൻ, പേർഷ്യൻ, മംഗോളിയൻ, സിഖ് രാജാക്കന്മാരുടെ കൈകളിലൂടെ ഈ വജ്രം കടന്നുപോയി. ഇത് കൈവശം വെക്കാൻ വേണ്ടി നടന്ന രക്തരൂക്ഷിതമായ പോരാട്ടങ്ങളുടെ ചരിത്രത്തിൽ വഞ്ചനയും പീഡനങ്ങളും കൊലപാതകങ്ങളും നിറഞ്ഞുനിൽക്കുന്നു.

കോഹിനൂർ സ്വന്തമാക്കിയ പുരുഷന്മാർക്ക് നേരിടേണ്ടി വന്ന ദുരന്തങ്ങൾ എന്തെല്ലാമെന്ന് നോക്കാം.

ഷാജഹാൻ: മുഗൾ ചക്രവർത്തി ഷാജഹാന്റെ മയൂരസിംഹാസനത്തിൽ കോഹിനൂർ പതിപ്പിച്ചിരുന്നു. എന്നാൽ സ്വന്തം മകൻ ഔറംഗസീബിൽ നിന്ന് വഞ്ചന നേരിട്ട അദ്ദേഹത്തിന് ജീവിതത്തിന്റെ അവസാന വർഷങ്ങൾ ആഗ്ര കോട്ടയിൽ തടവുകാരനായി കഴിയേണ്ടി വന്നു.

നാദിർ ഷാ: 1739-ൽ മുഗൾ ചക്രവർത്തി മുഹമ്മദ് ഷായിൽ നിന്ന് തന്ത്രപരമായി വജ്രം കൈക്കലാക്കിയ നാദിർ ഷാ, ഡൽഹിയിൽ ഒൻപത് മണിക്കൂർ കൊണ്ട് 30,000 പേരെ കൊന്നൊടുക്കാൻ ഉത്തരവിട്ടു. ഒടുവിൽ 1747-ൽ അദ്ദേഹം വധിക്കപ്പെട്ടു.

സിഖ് സാമ്രാജ്യം: മഹാരാജ രഞ്ജിത് സിംഗിന്റെ മരണശേഷം വജ്രം ലഭിച്ച മകൻ ഖരക് സിംഗ് ജയിലിൽ വെച്ച് വിഷം ഉള്ളിൽ ചെന്ന് മരിച്ചു. അദ്ദേഹത്തിന്റെ മകൻ നൗ നിഹാൽ സിംഗും ദുരൂഹസാഹചര്യത്തിൽ മരിച്ചു.

ദുലീപ് സിംഗ്: സിഖ് സാമ്രാജ്യത്തിലെ അവസാന മഹാരാജാവായ ദുലീപ് സിംഗിന് 10 വയസ്സുള്ളപ്പോഴാണ് ബ്രിട്ടീഷുകാർ പഞ്ചാബ് പിടിച്ചടക്കുന്നത്. ലാഹോർ ഉടമ്പടി പ്രകാരം കോഹിനൂർ വജ്രം വിക്ടോറിയ രാജ്ഞിക്ക് നൽകാൻ അദ്ദേഹം നിർബന്ധിതനായി.

1857-ലെ ഒന്നാം സ്വാതന്ത്ര്യസമരം ഈസ്റ്റ് ഇന്ത്യാ കമ്പനിയെ പിടിച്ചുലച്ചു. വജ്രത്തിന്റെ 'ശാപത്തെ' കുറിച്ച് ബോധവാന്മാരായിരുന്ന ബ്രിട്ടീഷുകാർ, പുരുഷന്മാരായ രാജാക്കന്മാരെ ഇത് ധരിക്കാൻ അനുവദിച്ചില്ല. വിക്ടോറിയ രാജ്ഞി, അലക്‌സാണ്ട്ര രാജ്ഞി, എലിസബത്ത് രാജ്ഞി എന്നിവരടക്കമുള്ള സ്ത്രീകളാണ് ഈ വജ്രം പതിപ്പിച്ച കിരീടം ധരിച്ചിട്ടുള്ളത്. കോഹിനൂർ ഇന്ത്യയിലേക്ക് തിരികെ കൊണ്ടുവരണമെന്ന ആവശ്യവും പ്രതിഷേധങ്ങളും ശക്തമായി തുടരുമ്പോഴും, ഈ അമൂല്യരത്‌നം ലണ്ടൻ ടവറിലെ 'ജ്യുവൽ ഹൗസിൽ' പൊതുജനങ്ങൾക്കായി പ്രദർശിപ്പിച്ചിരിക്കുകയാണ്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi