മൃദുവായ സ്പര്‍ശത്താലും തിളക്കമുള്ള ലുക്കുകൊണ്ടും മറ്റെല്ലാ തുണിത്തരങ്ങളേക്കാളും വേറിട്ടുനില്‍ക്കുന്നതാണ് സില്‍ക്ക്. പരമ്പരാഗത സാരി മുതല്‍ ക്രോപ്പ് ടോപ്പുകളിലും, പാര്‍ട്ടി വെയര്‍ മുതല്‍ നിത്യോപയോഗ വസ്ത്രങ്ങളിലും സില്‍ക്ക് ഉപയോഗിക്കുന്നു. ഇത്രയും ഭാരം കുറഞ്ഞ ഈ തുണിത്തരം ദീര്‍ഘകാലം സുന്ദരമായി നിലനിര്‍ത്താന്‍ അതിനെ ശരിയായ രീതിയില്‍ പരിപാലിക്കേണ്ടത് അത്യാവശ്യമാണ്. സില്‍ക്ക് തുണിത്തരങ്ങള്‍ എങ്ങനെ വൃത്തിയാക്കണം, എങ്ങനെ സൂക്ഷിക്കണം എന്ന് വായിച്ചറിയാം…
- വസ്ത്രം എങ്ങനെ വൃത്തിയാക്കണമെന്നറിയാന്‍ ലേബല്‍ പരിശോധിക്കുക. ലേബലില്‍ ചിലപ്പോള്‍ 'ഡ്രൈ ക്ലീന്‍' എന്ന് എഴുതിയിട്ടുണ്ടാകാം. ചിലത് കൈകൊണ്ട് കഴുകാനും സാധിക്കും. എന്നാല്‍, 'ഡ്രൈ ക്ലീന്‍ മാത്രം' എന്ന നിര്‍ദ്ദേശം ഗൗരവമായി എടുക്കണം. സാധാരണപോലെ കഴുകുന്നത് ഇത്തരം പട്ടിന്റെ നാരുകള്‍ക്ക് കേടുപാടുകള്‍ വരുത്തിയേക്കാം.
- നിറം ഇളകുമോ എന്ന് പരിശോധിക്കണം. അതിന് ഒരു കോട്ടണ്‍ തുണി വീര്യം കുറഞ്ഞ ഡിറ്റര്‍ജന്റും വെള്ളവും ചേര്‍ന്ന മിശ്രിതത്തില്‍ മുക്കി, വസ്ത്രത്തിന്റെ ഉള്‍വശത്തുള്ള ഒരു തുന്നലില്‍ മെല്ലെ ഒപ്പിയെടുക്കുക. തുണിയില്‍ നിറം പടരുന്നുണ്ടോ എന്ന് നോക്കുക. അങ്ങനെ സംഭവിക്കുകയാണെങ്കില്‍, വസ്ത്രത്തിന്റെ നിറം ഇളകാന്‍ സാധ്യതയുണ്ട്. അങ്ങനെയുള്ള വസ്ത്രങ്ങള്‍ ഡ്രൈ ക്ലീന്‍ ചെയ്യുന്നതാണ് നല്ലത്.
- കറ കളയാനായി സില്‍ക്ക് വസ്ത്രങ്ങളില്‍ ഒരു പ്രത്യേക ഭാഗത്ത് മാത്രം ഉരസുകയോ വൃത്തിയാക്കുകയോ ചെയ്യുന്നത് ആ ഭാഗത്തെ നിറം മങ്ങുന്നതിനോ പാടുകള്‍ ഉണ്ടാകുന്നതിനോ കാരണമാകും. അതിനാല്‍, ചെറിയ കറയാണെങ്കില്‍പോലും വസ്ത്രം മുഴുവനായി വൃത്തിയാക്കണം. കടുത്ത കറയാണെങ്കില്‍ ഒരു പ്രൊഫഷണല്‍ ക്ലീനറുടെ സഹായം തേടണം.
- തണുത്ത വെള്ളം നിറച്ച്, സില്‍ക്ക് വസ്ത്രം ഉള്‍വശം പുറത്താക്കി മുക്കിവയ്ക്കുക. ഇത് നാരുകള്‍ക്ക് കേടുപാടുകള്‍ വരുത്താതെ അഴുക്ക് ഇളകാന്‍ സഹായിക്കും.
- സില്‍ക്ക് പോലുള്ള മൃദുവായ തുണിത്തരങ്ങള്‍ക്കായി രൂപകല്‍പ്പന ചെയ്ത, വീര്യം കുറഞ്ഞതും ഗുണമേന്മയുള്ളതുമായ ഏതാനും തുള്ളി ലിക്വിഡ് ഡിറ്റര്‍ജന്റ് ചേര്‍ക്കുക. ഇത് വെള്ളത്തില്‍ നന്നായി കലക്കി വസ്ത്രം ഏകദേശം മൂന്ന് മിനിറ്റ് നേരം മുക്കിവയ്ക്കണം.
- മൂന്ന് മുതല്‍ അഞ്ച് മിനിറ്റ് വരെ വസ്ത്രം വെള്ളത്തില്‍ പതുക്കെ താഴ്ത്തുകയും ഉയര്‍ത്തുകയും ചെയ്യുക. ഇത് സില്‍ക്ക് ഉരയ്ക്കുകയോ പിഴിയുകയോ ചെയ്യാതെ തന്നെ അഴുക്ക് ഇളക്കി കളയാന്‍ സഹായിക്കും.
- വെള്ളത്തില്‍ നിന്ന് പുറത്തെടുത്ത് ഡിറ്റര്‍ജന്റിന്റെ അംശം പൂര്‍ണ്ണമായും മാറുന്നത് വരെ തണുത്ത വെള്ളത്തില്‍ നന്നായി കഴുകണം.
- വസ്ത്രം വൃത്തിയുള്ള ഒരു ടവ്വലില്‍ വെച്ച്, അധികമുള്ള വെള്ളം വലിച്ചെടുക്കുന്നതിനായി പതുക്കെ ചുരുട്ടുക. സില്‍ക്കിന്റെ അതിലോലമായ നാരുകള്‍ വലിയുന്നതിനോ പൊട്ടുന്നതിനോ കാരണമാകുമെന്നതിനാല്‍, വസ്ത്രം പിഴിയുകയോ തിരിക്കുകയോ ചെയ്യരുത്.
- സില്‍ക്ക് വസ്ത്രം അയയിലോ ഡ്രൈയിംഗ് റാക്കിലോ തൂക്കിയിട്ട് വേണം ഉണക്കാന്‍. വസ്ത്രത്തിന്റെ നിറവും തിളക്കവും സംരക്ഷിക്കുന്നതിനായി നേരിട്ട് സൂര്യപ്രകാശം ഏല്‍ക്കാതെ സ്വാഭാവികമായി ഉണങ്ങാന്‍ അനുവദിക്കുക.
- എപ്പോഴും വസ്ത്രത്തിന്റെ ഉള്‍വശം പുറത്താക്കി, അത് പൂര്‍ണ്ണമായും ഉണങ്ങിയെന്ന് ഉറപ്പുവരുത്തിയ ശേഷം കുറഞ്ഞ ചൂടില്‍ ഇസ്തിരിയിടണം. ഇസ്തിരിയുടെ ചൂട് നേരിട്ട് തട്ടി തിളങ്ങുന്ന പാടുകളോ കരിച്ചിലോ ഉണ്ടാകുന്നത് തടയാന്‍, ഇസ്തിരിക്കും സില്‍ക്കിനും ഇടയില്‍ മറ്റൊരു തുണി വെക്കുക.
- പൊടിയില്‍ നിന്നും ഈര്‍പ്പത്തില്‍ നിന്നും സംരക്ഷിക്കുന്നതിനും വായുസഞ്ചാരം ഉറപ്പാക്കുന്നതിനും സില്‍ക്ക് വസ്ത്രങ്ങള്‍ ബ്രീത്തബിള്‍ ഗാര്‍മെന്റ് ബാഗുകളിലോ ആസിഡ് രഹിത ടിഷ്യൂ പേപ്പറില്‍ പൊതിഞ്ഞോ സൂക്ഷിക്കുക.
- വയര്‍ ഹാംഗറുകള്‍ സില്‍ക്കിന്റെ അതിലോലമായ നാരുകള്‍ വലിയുന്നതിന് കാരണമാകും. അതിനാല്‍, തൂക്കിയിടുകയാണെങ്കില്‍ പാഡ് ചെയ്തതോ തുണികൊണ്ട് പൊതിഞ്ഞതോ ആയ ഹാംഗറുകള്‍ ഉപയോഗിക്കുന്നതാണ് നല്ലത്.
- സില്‍ക്ക് സൂക്ഷിക്കുമ്പോള്‍ പൂപ്പല്‍, ദുര്‍ഗന്ധം എന്നിവ തടയാന്‍, വസ്ത്രം പൂര്‍ണ്ണമായും വൃത്തിയുള്ളതും ഉണങ്ങിയതുമാണെന്ന് ഉറപ്പാക്കുക.
കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbi.page.link/grihalakshmi
Content Highlights: Discover expert tips for washing, drying, ironing, and storing your delicate silk garments. Keep your silk looking pristine with our easy-to-follow guide.
Published: 01 Dec 2025, 11:45 am IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented