വെള്ളിത്തിരയിലെ മനോഹാരിത കൊണ്ടും പ്രകടനം കൊണ്ടും ലോകത്തെ വിസ്മയിപ്പിച്ച താരമായിരുന്നു മധുബാല. എന്നാൽ അവരുടെ ജീവിതം ക്യാമറയ്ക്ക് പിന്നിൽ അത്ര സുഖകരമായിരുന്നില്ല. ഇന്ന് ജീവിച്ചിരിപ്പുണ്ടായിരുന്നെങ്കിൽ മധുബാലയ്ക്ക് 93 വയസ്സ് തികയുമായിരുന്നു. 1969 ഫെബ്രുവരി 23-ന്, 36-ാം വയസ്സിലാണ് ആ വിശ്വസുന്ദരി ലോകത്തോട് വിടപറഞ്ഞത്.

To advertise here,

ജന്മനായുള്ള ഹൃദയരോഗമായിരുന്നു അവരെ വേട്ടയാടിയിരുന്നത്. ഇത് അവരുടെ ശാരീരിക ആരോഗ്യത്തെ മാത്രമല്ല, മാനസികാവസ്ഥയെയും സാരമായി ബാധിച്ചു. രോഗം മൂലം ശരീരഭാരം വല്ലാതെ കുറഞ്ഞ അവർ, ആ രൂപത്തിൽ ആരെയും കാണാനോ പുറത്തിറങ്ങാനോ ആഗ്രഹിച്ചിരുന്നില്ല.

മധുബാലയുടെ സഹോദരി മധുർ ഭൂഷൺ 'ഫിലിം ഫെയറിന്' നൽകിയ അഭിമുഖത്തിൽ ആ നാളുകളെക്കുറിച്ച് ഓർക്കുന്നത് ഇങ്ങനെയാണ്: "ആപ (മധുബാല) വെറും അസ്ഥികൂടമായി മാറിയിരുന്നു. ആളുകൾക്ക് അവളെ കാണണമെന്ന് ഉണ്ടായിരുന്നുവെങ്കിലും തന്റെ രൂപം ആരും കാണരുതെന്ന് അവൾ നിർബന്ധം പിടിച്ചു. കണ്ണാടിയിൽ നോക്കി അവൾ പറയുമായിരുന്നു, 'നോക്കൂ, ഞാൻ എന്തായി മാറി! എന്റെ രൂപത്തെക്കുറിച്ച് ആരെങ്കിലും എന്തെങ്കിലും പറഞ്ഞാൽ ഞാൻ കൂടുതൽ കരഞ്ഞുപോകും'."

മറ്റാരുടെയും സഹായം സ്വീകരിക്കാൻ അവർ തയ്യാറായിരുന്നില്ലെന്നും, ശ്വാസതടസ്സം നേരിടുമ്പോൾ തൊട്ടടുത്ത് ഒരു ഓക്സിജൻ സിലിണ്ടർ സൂക്ഷിച്ചിരുന്നുവെന്നും സഹോദരി ഓർക്കുന്നു. "എനിക്ക് വേണ്ടി പണം പാഴാക്കരുത്, ഞാൻ രക്ഷപ്പെടില്ല. ഇനി സമ്പാദിക്കാൻ ആരുമില്ലല്ലോ" എന്ന് മധുബാല പറയുമായിരുന്നു.

1954-ൽ 'ബഹുത് ദിൻ ഹുയേ' എന്ന സിനിമയുടെ ചിത്രീകരണത്തിനിടെ പല്ല് തേക്കുമ്പോൾ രക്തം തുപ്പിയതോടെയാണ് രോഗം തിരിച്ചറിഞ്ഞത്. എന്നാൽ ആരോഗ്യം വഷളായിക്കൊണ്ടിരുന്നപ്പോഴും, 1960-ൽ പുറത്തിറങ്ങിയ 'മുഗൾ-ഇ-അസം' എന്ന ചിത്രത്തിലെ കഠിനമായ രംഗങ്ങളിൽ അവർ അഭിനയിച്ചു.

2017 ഓഗസ്റ്റ് 10-ന് ന്യൂഡൽഹിയിലെ മാഡം തുസാഡ്‌സിൽ മധുബാലയുടെ പ്രതിമ അനാച്ഛാദനം ചെയ്തു. മധുബാലയുടെ ജീവിതം സിനിമയാക്കുകയാണെങ്കിൽ കരീന കപൂർ ഖാൻ ആ വേഷം ചെയ്യണമെന്നാണ് സഹോദരി മധുർ ഭൂഷന്റെ ആഗ്രഹം.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi