ബോളിവുഡിന്റെ ഐക്കോണിക് ആങ്‌ഗ്രി യങ് മാൻ ആകുന്നതിന് മുൻപ്, നടനെന്ന നിലയിൽ വലിയ കഷ്ടപ്പാടുകൾ നേരിട്ടൊരു സമയമുണ്ടായിരുന്നു അമിതാഭ് ബച്ചന്. അദ്ദേഹത്തിന്റെ വ്യക്തിത്വത്തിന്റെ പ്രധാനഘടകമായ ഉയരത്തെ എല്ലാവരും പ്രകീർത്തിക്കാറുണ്ട്. എന്നാൽ തുടക്കത്തിൽ പൊക്കം ഒരു പോരായ്മയായിട്ടാണ് കണക്കാക്കപ്പെട്ടിരുന്നത്. അതുകൊണ്ടുതന്നെ ഈ രൂപത്തിൽ തനിക്കൊപ്പം അഭിനയിക്കാൻ തയ്യാറാവുന്ന നായികമാരെ കണ്ടെത്താൻ ബുദ്ധിമുട്ടായിരിക്കുമെന്ന് നിർമ്മാതാക്കൾ തന്നോട് പറഞ്ഞിരുന്നുവെന്ന് പറയുകയാണ് ബിഗ് ബിയിപ്പോൾ.

‘കോൻ ബനേഗാ ക്രോർപതി’യുടെ പുതിയ എപ്പിസോഡിൽ, വിനമ്ര എന്നൊരു മത്സരാർത്ഥി ചില കാര്യങ്ങൾ അദ്ദേഹത്തോട് ചോദിച്ചു. 1970-കളിലെ അമിതാഭ് ബച്ചന്റെ സിഗ്നേച്ചർ ഹെയർസ്റ്റൈലിനെക്കുറിച്ചും നീളത്തിലുള്ള സൈഡ് ബേൺസിനെക്കുറിച്ചുമായിരുന്നു പ്രധാനചോദ്യം. തുടർന്ന് താരം തന്റെ സിനിമാജീവിതത്തിന്റെ ആദ്യകാല ദിനങ്ങൾ ഓർത്തെടുത്തു, ആ ഹെയർസ്റ്റൈലിന് പിന്നിലെ പ്രത്യേക കാരണവും വെളിപ്പെടുത്തി.

ആദ്യമായി സിനിമകളിൽ വന്നപ്പോൾ, നിർമ്മാതാക്കൾ രണ്ട് കാര്യങ്ങൾ പറയുമായിരുന്നുവെന്ന് ബച്ചൻ പറഞ്ഞു. ഒന്ന്, ഉയരം വളരെ കൂടുതലാണ്, ഒരു നായികയും ഒപ്പം ജോലി ചെയ്യാൻ ആഗ്രഹിക്കില്ല; രണ്ടാമതായി, മുഖം വളരെ ചെറുതാണ്. അത് നികത്താൻ മുടി വളർത്തി, മുടി കൺപീലികൾ വരെ വളരാൻ അനുവദിക്കുമായിരുന്നെന്നും അങ്ങനെ മുഖം കൂടുതൽ പൂർണ്ണമായി കാണപ്പെടുമെന്നും അദ്ദേഹം പറഞ്ഞു.

ആദ്യകാലത്ത്, ബിഗ് ബിയുടെ നിരവധി ചിത്രങ്ങൾ ബോക്സോഫീസിൽ പരാജയപ്പെട്ടു, ഒരു മുൻനിര നടനായി സ്വയം സ്ഥാപിക്കാൻ അദ്ദേഹം പാടുപെട്ടു. കരിയറിലെ ഈ ഘട്ടത്തിൽ അദ്ദേഹത്തെ പരാജയപ്പെട്ട പുതുമുഖം എന്നുപോലും വിശേഷിപ്പിച്ചിരുന്നു.

1973-ൽ 'സഞ്ജീർ' (Zanjeer) എന്ന ചിത്രത്തിലൂടെയാണ് വഴിത്തിരിവുണ്ടായത്. റൊമാന്റിക് നായകന്മാർ ഹിന്ദി സിനിമയിൽ ആധിപത്യം പുലർത്തിയിരുന്ന ഒരു കാലഘട്ടത്തിൽ, ഇൻസ്പെക്ടർ വിജയ് ആയി അമിതാഭ് അവതരിപ്പിച്ച തീവ്രമായ കഥാപാത്രം പ്രേക്ഷകർക്ക് വ്യത്യസ്തമായൊരു നായകനെ നൽകി. ചിത്രത്തിന്റെ വിജയം അദ്ദേഹത്തെ ഒരു പ്രധാന താരമായി ഉയർത്തുകയും ഒടുവിൽ ബോളിവുഡിന്റെ "ആങ്‌ഗ്രി യങ് മാൻ" എന്ന പ്രശസ്തമായ വിശേഷണം നേടിക്കൊടുക്കുകയും ചെയ്തു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi