മഴക്കാലത്തെ കണ്ണ് ചൊറിച്ചിൽ കൊണ്ട് പൊറുതിമുട്ടിയോ? ഇക്കാര്യങ്ങൾ പരീക്ഷിച്ചു നോക്കൂ

മഴക്കാലത്തെ ചർമസംരക്ഷണത്തെക്കുറിച്ച് നമ്മൾ ആകുലപ്പെടാറുണ്ട്. എന്നാൽ ചർമസംരക്ഷണം പോലെ തന്നെ പ്രധാനപ്പെട്ടതാണ് കണ്ണിന്റെ സംരക്ഷണവും. ഡിജിറ്റൽ യുഗത്തിൽ ഏറ്റവുമധികം സമ്മർദം നേരിടുന്ന അവയവമാണ് കണ്ണ്. അതുകൊണ്ടു തന്നെ അതിന്റെ സംരക്ഷണത്തിലും അത്രതന്നെ ശ്രദ്ധ പുലർത്തേണ്ടിയിരിക്കുന്നു. മഴക്കാലത്ത് രോഗങ്ങളും അണുബാധയും കണ്ണിനെ ബാധിക്കാൻ സാധ്യത കൂടുതലാണ്.

മഴക്കാലത്തെ ഉയർന്ന ഈർപ്പവും പൊടിയും മലിനജലവുമായുള്ള സമ്പർക്കവും ബാക്ടീരിയ, വൈറസ് എന്നിവ മൂലമുള്ള നേത്രരോഗങ്ങൾ ഉണ്ടാകാൻ കാരണമാകുന്നു. ചെങ്കണ്ണ് (കൺജങ്ക്റ്റിവിറ്റിസ്), പോളക്കുരു, ബ്ലെഫറൈറ്റിസ് തുടങ്ങിയ രോഗങ്ങൾ ഈ കാലയളവിൽ കൂടുതലായി കാണപ്പെടുന്നു. ഇത് കണ്ണിന് ചുവപ്പ്, ചൊറിച്ചിൽ, കണ്ണിൽ നിന്ന് വെള്ളം വരൽ, അസ്വസ്ഥത എന്നിവയ്ക്ക് കാരണമാകുന്നു. ശരിയായ പരിചരണം ലഭിച്ചില്ലെങ്കിൽ, ഈ അണുബാധകൾ കൂടുതൽ ഗുരുതരവും സങ്കീർണവുമാവാം. ഇത്തരം രോഗങ്ങളെയും അണുബാധകളെയും അകറ്റി നിർത്താൻ നിത്യജീവിതത്തിൽ തന്നെ ശീലിക്കാവുന്ന ചില വഴികളുണ്ട്. മഴക്കാലത്ത് മാത്രമല്ല കണ്ണിന്റെ നല്ല ആരോഗ്യത്തിന് എല്ലാക്കാലവും സ്വീകരിക്കാവുന്ന മാർഗങ്ങളാണിവ.

• കണ്ണുകളുടെ ആരോഗ്യത്തിന് ശുചിത്വം പാലിക്കേണ്ടത് അത്യാവശ്യമാണ്.
• കണ്ണുകളിൽ തൊടുന്നതിന് മുൻപ് സോപ്പും വെള്ളവും ഉപയോഗിച്ച് പതിവായി കൈ കഴുകുന്നത് ശീലമാക്കണം.
• കണ്ണുകൾ തിരുമ്മുന്നതും ഒഴിവാക്കുക, കാരണം ഇത് നിങ്ങളുടെ കൈകളിൽ നിന്ന് കണ്ണുകളിലേക്ക് ബാക്ടീരിയകളും വൈറസുകളും പടരാൻ കാരണമാകും. അനാവശ്യമായി കണ്ണിൽ തൊടുന്നതും പൂർണമായി ഒഴിവാക്കണം.
• കണ്ണിൽ മഴവെള്ളം വീഴുകയാണെങ്കിൽ, എത്രയും പെട്ടെന്ന് ശുദ്ധവും അണുവിമുക്തവുമായ വെള്ളം ഉപയോഗിച്ച് അവ കഴുകുക. ശേഷം മുഖവും കണ്ണുകളും തുടയ്ക്കുക.
• കണ്ണു തുടയ്ക്കാൻ എപ്പോഴും വൃത്തിയുള്ളതും ഉണങ്ങിയതുമായ ടവലുകളും തൂവാലകളും മാത്രം ഉപയോഗിക്കാനും ശ്രദ്ധിക്കണം.
• അണുബാധ  തടയാൻ തൂവാലയും മറ്റും പങ്കുവെക്കുന്നതും ഒഴിവാക്കുക.
• കണ്ണുകളെ സംരക്ഷിക്കാൻ സൺഗ്ലാസുകളോ സംരക്ഷണ കണ്ണടകളോ ധരിക്കാം. എന്നാൽ കോൺടാക്റ്റ് ലെൻസുകൾ ഉപയോഗിക്കുന്നത് ഒഴിവാക്കണം.

നിങ്ങളുടെ പരിസരം വൃത്തിയായും പൊടിയും അലർജിയും ഇല്ലാത്തതുമായും സൂക്ഷിക്കേണ്ടത് സ്വന്തം ഉത്തരവാദിത്തമാണ്. ഈർപ്പത്തിനും പൂപ്പലിനും സാധ്യതയുള്ള സ്ഥലങ്ങൾ പതിവായി വൃത്തിയാക്കുക, കാരണം ഇവ കണ്ണിന് അണുബാധയുണ്ടാക്കുന്ന ദോഷകരമായ സൂക്ഷ്മാണുക്കളെ വളർത്തിയേക്കാം. ശരീരത്തിലും കണ്ണുകളിലും ജലാംശം നിലനിർത്താൻ ധാരാളം വെള്ളം കുടിക്കുകയും വേണം. മലിനമായ ജലസ്രോതസ്സുകളുമായുള്ള സമ്പർക്കം ഒഴിവാക്കുന്നതും നല്ലതാണ്.

കണ്ണിനു ചുറ്റും എന്തെങ്കിലും അസ്വസ്ഥത അനുഭവപ്പെടുകയോ വീക്കം അനുഭവപ്പെടുകയോ ചെയ്താൽ ഒരു ചൂടുള്ള കംപ്രസ് വെക്കുന്നത് വീക്കം ശമിപ്പിക്കാനും രോഗശാന്തിക്കും സഹായിക്കും. ചെറുചൂടുള്ള വെള്ളത്തിൽ മുക്കിയ വൃത്തിയുള്ള തുണി ഉപയോഗിച്ച് ദിവസത്തിൽ പല തവണ നിങ്ങളുടെ അടഞ്ഞ കണ്‌പോളകളിൽ അഞ്ചോ പത്തോ മിനിറ്റ് വയ്ക്കാം. കണ്ണിന്റെ ആരോഗ്യം നിലനിർത്തുന്നതിന് പതിവായി നേത്ര പരിശോധന നടത്തുന്നതും നല്ലതാണ്. ലക്ഷണങ്ങൾ നീണ്ടുനിൽക്കുകയാണെങ്കിൽ പെട്ടെന്നു തന്നെ വൈദ്യസഹായം തേടേണ്ടതാണ്.

(പൊതുവായ നിർദേശങ്ങൾ മാത്രമാണിവ, ആരോഗ്യവിദഗ്ദന്റെ സഹായത്തോടെ മുന്നോട്ടുപോവുക)

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbi.page.link/grihalakshmi

Content Highlights: protect your eyes this monsoon! learn essential tips for preventing infections and maintaining healthy vision during the rainy season.