ഹാൻഡ് ഡ്രയറിൽ കെെ ഉണക്കാറുണ്ടോ? ശീലം മാറ്റിയില്ലെങ്കിൽ തടി കേടാകും

റസ്റ്റോറന്റുകളിലും മാളുകളിലും ട്രെയിനുകളിലുമെല്ലാം ഹാൻഡ് ഡ്രയർ ഉപയോഗിക്കുന്നൊരു ശീലം നമുക്കുണ്ട്. നനഞ്ഞ കെെ പെട്ടെന്ന് ഉണങ്ങി കിട്ടുമെന്നു മാത്രമല്ല, കെെ വൃത്തിയാകുകയും ചെയ്യുമെന്നാണ് നമ്മുടെയൊക്കെ ധാരണ. പക്ഷേ, ആ ധാരണ തികച്ചും തെറ്റാണെന്നും നിരവധി ആരോഗ്യപ്രശ്നങ്ങൾ ഉണ്ടാക്കുമെന്നുമാണ് പഠനം പറയുന്നത്.

ഹാൻഡ് ഡ്രയറുകൾ ഗുണത്തേക്കാളേറെ ദോഷമുണ്ടാക്കിയേക്കാം. ഹാൻഡ് വാഷ് ഉപയോഗിച്ച് കഴുകി വൃത്തിയാക്കിയ കൈകളിലേക്ക് ബാക്ടീരിയകളെയും രോഗകാരികളെയും തിരികെ എത്തിക്കാൻ ഈ ഉപകരണങ്ങൾക്ക് കഴിയുമെന്നാണ് ആരോഗ്യ വിദഗ്ധരുടെ അഭിപ്രായം. പലപ്പോഴും ടോയ്ലറ്റിലോ അതിനോടു ചേർന്ന വിശ്രമമുറിയിലോ സ്ഥാപിച്ചിരിക്കുന്ന ഹാൻഡ് ഡ്രയറുകളിൽ നിന്ന് ഇത്തരം രോഗകാരികൾ കെെകളിലേക്കെത്തുമെന്ന് വിദഗ്ധർ പറയുന്നു. ശക്തമായ ജെറ്റ് ഡ്രയറുകൾ ടോയ്‌ലറ്റ് ഫ്ലഷ് എയറോസോളുകളിൽ നിന്ന് മലിനമായ വായു വലിച്ചെടുത്ത് പുറത്തേക്ക് വിടുന്നു. കെെ ഉണക്കുമ്പോൾ ഈ രോഗാണുക്കൾ കെെയിലേക്കെത്തുകയും ചെയ്യുന്നു. മാത്രമല്ല ഇത്തരം രോഗാണുക്കൾ വിശ്രമമുറി മലിനമാക്കുകയും ചെയ്യുന്നു.

കണക്റ്റിക്കട്ട് സർവകലാശാലയിലും ക്വിന്നിപിയാക് സർവകലാശാലയിലും നടത്തിയ പഠനങ്ങൾ കാണിക്കുന്നത്, ഡ്രയറുകൾ പ്രവർത്തിപ്പിക്കുമ്പോൾ ശുചിമുറിയിലെ വായുവുമായി സമ്പർക്കത്തിൽ വരുകയും ബാക്ടീരിയകളെ കൂട്ടത്തോടെ ആഗിരണം ചെയ്യുകയും ചെയ്യുന്നുവെന്നാണ്. ഭൂരിഭാഗം ബാക്ടീരിയകളും ടോയ്‌ലറ്റ് എയറോസോളുകളിൽ നിന്നാണ് പുറത്തേക്കുവരുന്നത്. അതിവേഗത്തിൽ പ്രവർത്തിക്കുന്ന ജെറ്റ് ഡ്രയറുകൾ മലിനമായ കണങ്ങളെ കൈകളിലേക്കും വസ്ത്രങ്ങളിലേക്കും പരിസരത്തും വ്യാപിപ്പിക്കുന്നു.

അമേരിക്കൻ സൊസൈറ്റി ഫോർ മൈക്രോബയോളജി 2018-ൽ നടത്തിയ ഒരു പഠനം വെളിപ്പെടുത്തിയത്, ചൂടുള്ള വായു ഡ്രയറുകൾ ബീജങ്ങളെയും രോഗകാരികളെയും വഹിക്കുന്ന മലിനമായ വായുപ്രവാഹങ്ങൾ പുറപ്പെടുവിക്കുന്നുവെന്നുണ്ടെന്നാണ്. 

ഇൻഫെക്ഷൻ കൺട്രോൾ & ഹോസ്പിറ്റൽ എപ്പിഡെമിയോളജിയിൽ പ്രസിദ്ധീകരിച്ച ഗവേഷണങ്ങൾ കാണിക്കുന്നത് ജെറ്റ് ഡ്രയറുകൾ പരമ്പരാഗത രീതികളേക്കാൾ കൂടുതൽ അണുക്കളെ പുറത്തുവിടുന്നു എന്നാണ്. ഇത് കൂടുതൽ ദൂരം രോഗാണുക്കളെ അന്തരീക്ഷത്തിലേക്ക് വ്യാപിപ്പിക്കുകയും പരിസരത്ത് കൂടുതൽ സമയം തങ്ങിനിർത്തുകയും ചെയ്യുന്നു.

വിമാനത്താവളങ്ങൾ, സ്കൂളുകൾ, ആശുപത്രികൾ തുടങ്ങി തിരക്കുള്ള സ്ഥലങ്ങളിൽ, പേപ്പർ ടവലുകൾ ഉപയോഗിക്കുന്നത് ജെറ്റ് എയർ ഡ്രയറുകളെ അപേക്ഷിച്ച് അണുബാധ സാധ്യത ഗണ്യമായി കുറയ്ക്കും. അതിനാൽ അടുത്ത തവണ നിങ്ങൾ കൈ കഴുകുമ്പോൾ, ഒരു പേപ്പർ ടവൽ എടുക്കുന്നത് സുരക്ഷിതമായ തിരഞ്ഞെടുപ്പായിരിക്കും. ആരോഗ്യം നിലനിർത്തുന്നതിൽ വലിയ മാറ്റമുണ്ടാക്കുന്ന ഒരു ചെറിയ ശീലമായിരിക്കുമിത്. 

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbi.page.link/grihalakshmi

Content Highlights: Studies reveal hand dryers spread bacteria and pathogens.