ഒരു വശത്തെ തോളിൽതന്നെ സ്ഥിരമായി ബാഗ് തൂക്കാറുണ്ടോ? ഇത് നട്ടെല്ലിന്റെ ആരോഗ്യത്തെ ബാധിക്കുമോ?

ജോലിക്കോ പഠനത്തിനോ യാത്രയ്‌ക്കോ പോകുമ്പോൾ ബാഗ് ഒരു വശത്തെ തോളിൽ തൂക്കുന്നത് പലരുടെയും പതിവാണ്. ഹാൻഡ്ബാഗായാലും ലാപ്ടോപ്പ് ബാഗായാലും ഭാരം ഒരു വശത്ത് മാത്രം ഏൽപ്പിക്കുന്നതിൽ പലരും അസ്വാഭാവികത കാണാറില്ല. എന്നാൽ, ഈ ശീലം കഴുത്തിലെയും തോളിലെയും പുറംഭാഗത്തെയും പേശികളിൽ അമിതസമ്മർദമുണ്ടാക്കാൻ കാരണമാകാം. ദീർഘനേരം ഒരേ രീതിയിൽ ബാഗ് ചുമക്കുന്നത് ശരീരത്തിന്റെ നിൽപ്പിനെയും പേശികളുടെ പ്രവർത്തനത്തെയും ബാധിക്കാനും സാധ്യതയുണ്ട്. ഒരു വശത്തെ തോളിൽ ബാഗ് ചുമക്കുന്നതിന്റെ ആരോഗ്യപ്രശ്‌നങ്ങളെക്കുറിച്ചും അവ ഒഴിവാക്കാനുള്ള മാർഗങ്ങളെക്കുറിച്ചും വിദഗ്ധൻ വിശദീകരിക്കുന്നതു നോക്കാം.

ഒരു വശത്തെ തോളിൽ ബാഗ് ചുമക്കുന്നത് നട്ടെല്ലിനെ ബാധിക്കുമോ?
ഒരു വശത്തെ തോളിൽ സ്ഥിരമായി ബാഗ് ചുമക്കുന്നത് ഉടനടി നട്ടെല്ലിന് ഗുരുതരമായ തകരാറുണ്ടാക്കണമെന്നില്ല. എന്നാൽ, ശരീരത്തിന്റെ ഒരു വശത്ത് തുടർച്ചയായി ഭാരം അനുഭവപ്പെടുന്നത് കഴുത്തിലെയും തോളിലെയും മുകൾഭാഗത്തെ പുറംപേശികളിലെയും സമ്മർദം വർധിപ്പിക്കാനിടയുണ്ട്. ഇത് ശരീരത്തിന്റെ സ്വാഭാവികമായ നിൽപ്പിൽ മാറ്റങ്ങൾ വരുത്താനും അസ്വസ്ഥതകൾക്ക് കാരണമാകാനും സാധ്യതയുണ്ട്.

ഒരു വശത്തെ തോളിൽ തന്നെ എപ്പോഴും ബാഗ് തൂക്കുമ്പോൾ ശരീരത്തിന്റെ സന്തുലിതാവസ്ഥ നിലനിർത്താൻ സ്വാഭാവികമായി ചില ക്രമീകരണങ്ങൾ സംഭവിക്കും. ബാഗിന്റെ ഭാരം താങ്ങാൻ തോൾ ഉയർത്തുകയോ ശരീരം ഒരു വശത്തേക്ക് ചരിക്കുകയോ ചെയ്യാം. ഇതോടെ നട്ടെല്ലിന് ചുറ്റുമുള്ള പേശികൾ ഒരേ രീതിയിലല്ലാതെ പ്രവർത്തിക്കും. ദീർഘനേരം ഈ അവസ്ഥ തുടരുമ്പോൾ പേശികൾക്ക് ക്ഷീണമുണ്ടാകാം. കഴുത്തുവേദന, തോളുവേദന, മുകൾഭാഗത്തെ പുറത്ത് മുറുക്കം എന്നിവയൊക്കെ അനുഭവപ്പെടാനും സാധ്യതയുണ്ട്. ബാഗിന്റെ ഭാരം കൂടുതലാണെങ്കിൽ ഇത്തരം അസ്വസ്ഥതകൾ കൂടും.

തെറ്റായ ഇരിപ്പുരീതി, വ്യായാമക്കുറവ്, ദീർഘനേരം സ്‌ക്രീനിലേക്ക് നോക്കിയുള്ള ഇരിപ്പ്, നേരത്തേയുള്ള കഴുത്ത്-തോൾ പ്രശ്‌നങ്ങൾ എന്നിവയുള്ളവരിൽ അസ്വസ്ഥത കൂടുതൽ പ്രകടമാകാം. എന്നാൽ, ഒരു വശത്തെ തോളിൽ ബാഗ് ചുമക്കുന്നതുകൊണ്ടുമാത്രം സ്‌കോളിയോസിസ് (നട്ടെല്ല് വശത്തേക്ക് അസാധാരണമായി വളയുന്ന അവസ്ഥ) അല്ലെങ്കിൽ ഡിസ്‌ക് സംബന്ധമായ പ്രശ്‌നങ്ങൾ ഉടനടി ഉണ്ടാകുമെന്ന് കരുതേണ്ടതില്ല. ബാഗിന്റെ ഭാരം, എത്രനേരം ചുമക്കുന്നു, ശരീരത്തിന്റെ നിൽപ്പ്, പേശികളുടെയും സന്ധികളുടെയും ആരോഗ്യം തുടങ്ങിയ ഘടകങ്ങളെല്ലാം ഇതിൽ പ്രധാനമാണ്.

ആർക്കാണ് കൂടുതൽ ശ്രദ്ധ വേണ്ടത്?
വിദ്യാർഥികൾ: ഭാരമേറിയ പുസ്തകങ്ങളും പഠനോപകരണങ്ങളും ദിവസവും ചുമക്കുന്നവർ.
ഓഫീസിൽ ജോലി ചെയ്യുന്നവർ: ലാപ്ടോപ്പും മറ്റ് ഉപകരണങ്ങളും അടങ്ങിയ ബാഗുകൾ സ്ഥിരമായി ഉപയോഗിക്കുന്നവർ.
ഹാൻഡ്ബാഗ് ഉപയോഗിക്കുന്നവർ: ഭാരമേറിയ ബാഗുകൾ ദീർഘനേരം ഒരേ തോളിൽ തൂക്കുന്നവർ.
വ്യായാമക്കുറവുള്ളവർ: ദീർഘനേരം ഇരുന്ന് ജോലി ചെയ്യുകയും ശരീരചലനം കുറവുമുള്ളവർ.

ബാഗ് ചുമക്കുമ്പോൾ ശ്രദ്ധിക്കാം
അനാവശ്യ ഭാരം ഒഴിവാക്കാം: ബാഗിൽ ആവശ്യമായ സാധനങ്ങൾ മാത്രം സൂക്ഷിക്കുക. ഭാരം കുറയ്ക്കുന്നത് തോളിലെയും പുറംപേശികളിലെയും സമ്മർദം കുറയ്ക്കാൻ സഹായിക്കും.
ബാക്ക്പാക്ക് ഉപയോഗിക്കുമ്പോൾ രണ്ട് സ്ട്രാപ്പുകളും ധരിക്കാം: ഒരു തോളിൽ മാത്രം ഭാരം ഏൽപ്പിക്കുന്നതിനുപകരം ബാക്ക്പാക്കിന്റെ രണ്ട് സ്ട്രാപ്പുകളും ഉപയോഗിക്കുക. ബാഗ് ശരീരത്തോട് ചേർന്നുനിൽക്കുന്ന വിധത്തിൽ ക്രമീകരിക്കുകയും താഴേക്ക് തൂങ്ങിക്കിടക്കുന്നത് ഒഴിവാക്കുകയും വേണം.
ഒറ്റത്തോളിൽ തൂക്കുന്ന ബാഗിന്റെ വശം മാറ്റാം: ഹാൻഡ്ബാഗോ സിംഗിൾ സ്ട്രാപ്പുള്ള ബാഗോ ഉപയോഗിക്കുമ്പോൾ ഇടയ്ക്കിടെ തോളിന്റെ വശം മാറ്റുക. ഭാരമേറിയ ബാഗ് ദീർഘനേരം ഒരേ വശത്ത് ചുമക്കാതിരിക്കാനും ശ്രദ്ധിക്കണം.
ശരീരത്തിന്റെ നിൽപ്പ് ശ്രദ്ധിക്കാം: ബാഗിന്റെ ഭാരം താങ്ങാൻ തോൾ ഉയർത്തുകയോ ശരീരം ഒരു വശത്തേക്ക് ചരിക്കുകയോ ചെയ്യുന്നുണ്ടോ എന്ന് ശ്രദ്ധിക്കുക. ശരിയായ നിൽപ്പും പതിവായുള്ള ശരീരചലനവും പേശികളുടെ ആരോഗ്യം നിലനിർത്താൻ സഹായിക്കും.
വ്യായാമത്തിന് സമയം കണ്ടെത്താം: പതിവായുള്ള വ്യായാമം പേശികളുടെ ശക്തിയും ശരീരത്തിന്റെ ചലനക്ഷമതയും നിലനിർത്താൻ സഹായിക്കും. കഴുത്തിലോ പുറംഭാഗത്തോ തുടർച്ചയായ വേദന അനുഭവപ്പെടുന്നുണ്ടെങ്കിൽ സ്വയം വ്യായാമങ്ങൾ പരീക്ഷിക്കുന്നതിനുപകരം ഡോക്ടറുടെ നിർദേശം തേടണം.

ചെറിയ ശീലങ്ങൾ, വലിയ കരുതൽ
ദൈനംദിന ജീവിതത്തിലെ സാധാരണ ശീലങ്ങൾ പോലും ശരീരത്തിന്റെ ആരോഗ്യത്തെ സ്വാധീനിച്ചേക്കാം. ബാഗിന്റെ ഭാരം കുറയ്ക്കുക, ശരിയായ രീതിയിൽ ചുമക്കുക, ദീർഘനേരം ഒരേ നിലയിൽ തുടരുന്നത് ഒഴിവാക്കുക തുടങ്ങിയ ചെറിയ മാറ്റങ്ങൾ നട്ടെല്ലിന്റെയും പേശികളുടെയും ആരോഗ്യസംരക്ഷണത്തിന് സഹായകരമാണ്. വേദന തുടർച്ചയായി അനുഭവപ്പെടുകയോ വർധിക്കുകയോ ചെയ്താൽ വൈദ്യസഹായം തേടുകയും വേണം.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi