ദീർഘദൂര യാത്രകളിൽ നടുവേദനയുണ്ടാകാറുണ്ടോ? പരിഹാരമിതാ
ഓരോ യാത്രകളും വ്യത്യസ്തമായ അനുഭവങ്ങളാണ് സമ്മാനിക്കുന്നത്. യാത്ര ചെയ്യാന് ഇഷ്ടമില്ലാത്തവര് വിരളമാണ്. എന്നാല് നീണ്ട വിമാന യാത്രകളിലും, റോഡിലൂടെയുള്ള മണിക്കൂറുകള് നീണ്ട യാത്രകളിലും നടുവേദന വരാന് തുടങ്ങിയാല്, യാത്ര അത്ര സുഖകരമാകില്ല. ഒപ്പം ഭാരമുള്ള ലഗേജ് കൂടെയുണ്ടെങ്കില് അതും വലിച്ച് നടക്കുന്നത് നിങ്ങളുടെ നടുവേദന കൂട്ടുകയും, യാത്ര ദുരിതമാക്കി മാറ്റുകയും ചെയ്യും. യാത്രാവേളയില് ഉണ്ടാകുന്ന ഇത്തരം നടുവേദന ഒഴിവാക്കാന് ചില ലളിതമായ കാര്യങ്ങള് ശ്രദ്ധിക്കാം.
യാത്ര പുറപ്പെടുന്നതിന് മുമ്പ് സൗകര്യത്തിനായി അനുയോജ്യമായ ഷൂസും അയഞ്ഞ വസ്ത്രങ്ങളും ധരിക്കുക. എളുപ്പത്തില് എടുക്കാനായി ഒരു ചെറിയ തലയിണയോ ബാക്ക് ബ്രേസോ നിങ്ങളുടെ കൈവശമുള്ള ബാഗില് കരുതുക. യാത്രകളില് സാധിക്കുമെങ്കില് കൂടുതല് ലെഗ് സ്പേസുളള സീറ്റുകള് തിരഞ്ഞെടുക്കുക. കാറുകളില് സീറ്റ് ക്രമീകരിച്ച് ഇരിക്കാനായി മുന്വശത്തെ പാസഞ്ചര് സീറ്റ് തിരഞ്ഞെടുക്കുക.
വിമാനത്തിലെ സീറ്റുകള് നടുവിന് സൗകര്യപ്രദമാകണമെന്നില്ല. അതിനായി നടുവിന് താഴെയായി തലയിണ വെയ്ക്കാം. അല്ലെങ്കില് ജാക്കറ്റ് ചുരുട്ടി വെയ്ക്കാം. പാദങ്ങള് തറയില് വെച്ച് ഇരിക്കാൻ ശ്രദ്ധിക്കാം. കാലുകള് ക്രോസ് ചെയ്ത് ഇരിക്കുന്നത് ഒഴിവാക്കുക. ഇടയ്ക്കിടെ നിങ്ങളുടെ സീറ്റിന്റെ ആങ്കിള് ക്രമീകരിക്കുക. പേശിവലിവ് ഒഴിവാക്കാന് സീറ്റിലിരുന്ന് തന്നെ ചെറിയ രീതിയിലുള്ള സ്ട്രെച്ചിംഗുകള് ചെയ്യാന് ശ്രമിക്കുക.
കൂടുതല് നേരം ഇരിക്കുന്നത് നിങ്ങളുടെ നടുവിലെ പിരിമുറുക്കവും സമ്മര്ദ്ദവും വര്ദ്ധിപ്പിക്കുന്നു. ഓരോ 30 മുതല് 60 മിനിറ്റിലും എഴുന്നേല്ക്കുക, ഇടനാഴിയിലൂടെ നടക്കുക അല്ലെങ്കില് സ്ട്രെച്ച് ചെയ്യുക. തോളുകള്, കണങ്കാല് എന്നീ ഭാഗങ്ങള് ചെറുതായി കറക്കുന്നത് പേശികളെ അയവുള്ളതാക്കാനും നിങ്ങള് പുറത്തിറങ്ങി നടക്കുമ്പോള് പ്രയാസമില്ലാതിരിക്കാനും സഹായിക്കും.
കാര് യാത്രകള്, നടുവിന് ബുദ്ധിമുട്ടുണ്ടാക്കുന്നതായി തോന്നിയേക്കാം. അപ്പോൾ നിങ്ങളുടെ ഇരിപ്പിടം, ഇടുപ്പും കാല്മുട്ടുകളും ഒരേ നിരപ്പില് വരുന്ന രീതിയില് ക്രമീകരിക്കുക, ആവശ്യമെങ്കില് നടുവിന് താങ്ങ് നല്കാന് ഒരു കുഷ്യന് ഉപയോഗിക്കുക. നടക്കാനും സ്ട്രെച്ച് ചെയ്യാനുമായി ഓരോ മണിക്കൂറിലും വണ്ടി നിര്ത്തുക. മുന്നോട്ട് കുനിയുകയോ ചാരി ഏറെ നേരം ഇരിക്കുകയോ ചെയ്യുന്നത് ഒഴിവാക്കാം.
ശ്രദ്ധയില്ലാതെ ഭാരമുള്ള ബാഗുകള് ഉയര്ത്തുന്നതിലൂടെ പലപ്പോഴും നടുവിന് പണികിട്ടാന് സാധ്യതയുണ്ട്. കാല്മുട്ടുകള് മടക്കി, ലഗേജ് ശരീരത്തോട് ചേര്ത്ത് പിടിച്ച് വേണം ഉയര്ത്താന്. വീലുകളുള്ള സ്യൂട്ട്കേസുകള്, സ്ട്രാപ്പുകളില് പാഡുകള് ഉളള ബാക്ക്പാക്കുകള് എന്നിവ യാത്രയ്ക്കായി തിരഞ്ഞെടുക്കാം. അല്ലെങ്കില് ഭാരം കുറഞ്ഞ ചെറു ബാഗുകളിലായി പാക്ക് ചെയ്യുന്നതാവും നല്ലത്. ഒരു ലംബാര് കുഷ്യന്, കഴുത്തിന് ഉപയോഗിക്കുന്ന തലയിണ, കംപ്രഷന് സോക്സുകള് എന്നിവ ദീര്ഘദൂര യാത്രകള്ക്കായി ഉപയോഗിക്കുന്നത് അറെ ഗുണകരമാണ്. ചെറിയ മസാജ് ബോളോ പോര്ട്ടബിള് ഹീറ്റിംഗ് പാഡോ യാത്രകളില് കരുതാം. ഇവ ഇടവേളകളില് പേശികളെ അയവുള്ളതാക്കാന് സഹായിക്കും. ശരീരത്തില് ജലാംശം കുറയുന്നത് പേശികളുടെ പിരിമുറുക്കം വര്ദ്ധിപ്പിക്കും. അതിനാല് ഇടയ്ക്കിടെ വെള്ളം കുടിക്കുക. ഇത്തരം ചെറിയ ചില കാര്യങ്ങള് ശ്രദ്ധിച്ചാല് നടുവേദനയെക്കുറിച്ച് ആകുലപ്പെടാതെ യാത്ര ആസ്വദിക്കാം.
കൂടുതല് ഫീച്ചറുകള് വായിക്കാന് ഗൃഹലക്ഷ്മി വാട്സാപ്പ് ഗ്രൂപ്പില് അംഗമാകൂ:https://mbi.page.link/grihalakshmi
Content Highlights: Avoid travel back pain with simple tips for comfortable flights & road trips. Learn how to sit, stretch, pack, and stay hydrated for a pain-free journey.