ഭക്തിയും സംഗീതവും കലയും ഒത്തുചേർന്ന ബൃഹദീശ്വരസന്നിധിയിലേക്ക്

കടുംചൂടും വെയിലുമായി സ്വാഗതം ചെയ്തു തഞ്ചാവൂരിലെ തീവണ്ടി സ്റ്റേഷൻ. പുറത്തെ ബഹളങ്ങളിൽ കലരുന്നു പൂക്കളുടെ ഗന്ധം. ത്യാഗരാജ കീർത്തനങ്ങളുടെ ഇമ്പം മുഴങ്ങുന്ന, പൈക്കൾ വിഹരിക്കുന്ന തെരുവുകൾ. രാജരാജ ചോളന്റെ ആസ്ഥാനനഗരിയായിരുന്ന ദേശം. തഞ്ചാവൂരിന് കാവേരി കൊലുസാണ്. തരിശുനിലങ്ങളും നെൽപ്പാടങ്ങളും കടന്ന് കാവേരി നിറയൗവനം പൂണ്ടൊഴുകുന്ന വർഷകാലം. കുഞ്ചരമല്ലൻ രാജരാജ പെരുന്തച്ചനും സംഘവും മാന്ത്രിക വിരലുകളാൽ കൊത്തിയെടുത്ത മഹാക്ഷേത്രം കാണാനാണ് യാത്ര. പരാന്തകൻ രണ്ടാമന്റെയും വാനവണ്ണ മഹാദേവിയുടെയും മകൻ അരുൾമൊഴിവർമൻ എന്ന രാജരാജ ചോളൻ ചോളസാമ്രാജ്യത്തിന്റെ കീർത്തിയുടെ അടയാളമായി പണികഴിപ്പിച്ച ക്ഷേത്രം. പെരിയുടയോർക്കോവിൽ എന്ന സാക്ഷാൽ ബൃഹദീശ്വര സന്നിധി. കലയും ഭക്തിയും സംഗീതവും ഇഴചേർത്തുതുന്നിയ നിർമിതി. അവിടേക്കുള്ള യാത്ര അദ്ഭുതങ്ങളിലേക്കുള്ള യാത്രകൂടിയാണ്.

അതിശയ ശില
'രാജരാജേശ്വരം കോവിൽ' എന്നും ബൃഹദീശ്വര ക്ഷേത്രം അറിയപ്പെട്ടിരുന്നു. ഒരു സഹസ്രാബ്ദം മുൻപാണ് ഈ ക്ഷേത്രം നിർമിക്കപ്പെട്ടത്. പൂർണമായും ശിലയിൽ പടുത്ത മഹാനിർമിതി. പ്രധാനമൂർത്തി ശിവനാണ്. ഒറ്റക്കല്ലിൽ തീർത്ത പതിമൂന്ന് അടി ഉയരമുള്ള ശിവലിംഗമാണ് പ്രതിഷ്ഠ.

Content Highlights: Built by Raja Raja Chola over a millennium ago, showcasing peak Chola architecture., Features a massive 13-foot Shiva lingam carved from a single stone., The 216-foot main vimana features 108 Bharatanatyam mudras