‘എന്റെ അച്ഛനുമായി അകൽച്ചയുണ്ടായിരുന്നു, എനിക്കിപ്പോൾ മൂന്ന് വയസ്സുള്ള ഒരു മകളുണ്ട്’

രൺബീർ കപൂറും മകൾ റാഹയും തമ്മിലുള്ള ബന്ധത്തെക്കുറിച്ച് കുടുംബാംഗങ്ങളും സിനിമാലോകത്തെ സുഹൃത്തുക്കളും പലപ്പോഴും സംസാരിക്കാറുണ്ട്. എന്നാൽ ഇപ്പോൾ, അന്തരിച്ച പിതാവ് ഋഷി കപൂറുമായി തനിക്കുണ്ടായിരുന്നതിനേക്കാൾ വ്യത്യസ്തമായ ബന്ധമാണ് തനിക്ക് മകളോടുള്ളതെന്നും, ഒരു സുഹൃത്തിനെപ്പോലെയുള്ള ബന്ധമാണ് താൻ ആഗ്രഹിക്കുന്നതെന്നും താരം തുറന്നു പറഞ്ഞിരിക്കുകയാണ്.

ഒരു പ്രമുഖ ജ്വല്ലറി ബ്രാൻഡിന്റെ അംബാസഡറായി രൺബീർ കപൂറിനെ അടുത്തിടെ പ്രഖ്യാപിച്ചിരുന്നു. ഇതിനോടനുബന്ധിച്ചു നടന്ന സംഭാഷണത്തിലാണ് തന്റെ മകളെക്കുറിച്ച് താരം മനസ്സ് തുറന്നത്. 'എന്റെ പിതാവിന് എന്നോടുള്ള ബന്ധം അല്പം അകൽച്ചയുള്ളതായിരുന്നു; അത് സൗഹൃദം പോലെയായിരുന്നില്ല. ആ തലമുറ അങ്ങനെയായിരുന്നു. എന്നാൽ എന്റെ മകളുടെ കാര്യത്തിൽ, ആ ഭിത്തി തകർക്കാൻ ഞാൻ ആഗ്രഹിക്കുന്നു. അവൾക്ക് ഒരു സുഹൃത്താകാനും, അവൾ ആഗ്രഹിക്കുന്ന ദിശയിലേക്ക് പറക്കാൻ അവൾക്ക് ചിറകുകൾ നൽകാനും ഞാൻ ആഗ്രഹിക്കുന്നു.'

കപൂർ കുടുംബത്തിന്റെ പാരമ്പര്യം നൽകുന്ന സമ്മർദ്ദത്തെക്കുറിച്ചും അദ്ദേഹം സംസാരിച്ചു. 'എനിക്കൊരിക്കലും അതൊരു സമ്മർദ്ദമായി തോന്നിയിട്ടില്ല. എനിക്കിതൊരു താലത്തിൽ വെച്ച് കിട്ടിയതാണെന്ന ഉത്തരവാദിത്തബോധമാണ് എപ്പോഴും ഉണ്ടായിരുന്നത്. പതിനായിരക്കണക്കിന് കഴിവുള്ള കലാകാരന്മാർ അവസരങ്ങൾക്കായി കാത്തുനിൽക്കുമ്പോൾ, എനിക്ക് ഇത് ഇത്ര എളുപ്പത്തിൽ ലഭിച്ചതിനെ നിസ്സാരമായി കാണാൻ കഴിയില്ല. ഞാൻ കഠിനാധ്വാനം ചെയ്യണം, ചിന്തിക്കണം, മൗലികത പുലർത്തണം. ഞാൻ വളർന്ന സാഹചര്യങ്ങൾ കാരണമാണ് ഇങ്ങനെയൊരു ബോധ്യം എനിക്കുണ്ടായത്.'

സന്ദീപ് റെഡ്ഡി വംഗയുടെ 'അനിമൽ' ഫെബ്രുവരി 13-ന് ജപ്പാനിൽ റിലീസ് ചെയ്യാൻ ഒരുങ്ങുകയാണ്. ഇതിന് മുന്നോടിയായി ഫെബ്രുവരി 4-ന് നടന്ന പ്രദർശനത്തിന് മികച്ച പ്രതികരണമാണ് ലഭിച്ചത്. സൂം കോൾ വഴി പ്രേക്ഷകരോട് സംസാരിക്കവെ തന്റെ മുത്തച്ഛൻ രാജ് കപൂറിന് ജപ്പാനുമായുണ്ടായിരുന്ന സാംസ്‌കാരിക ബന്ധത്തെക്കുറിച്ച് അദ്ദേഹം അനുസ്മരിച്ചു. 'മേരാ ജൂതാ ഹേ ജപ്പാനി' എന്ന പ്രശസ്തമായ പാട്ടിനെക്കുറിച്ചും, ഷൂ ജപ്പാനീസ് ആണെങ്കിലും ഹൃദയം ഇന്ത്യക്കാരനാണെന്ന അതിന്റെ അർത്ഥത്തെക്കുറിച്ചും അദ്ദേഹം വിശദീകരിച്ചു.

2015-ൽ 'തമാശ' എന്ന സിനിമയുടെ ചിത്രീകരണത്തിനായി ടോക്കിയോയിൽ പോയപ്പോഴാണ് താൻ ജപ്പാനിലെ പൈതൃകവും ജനങ്ങളെയും അടുത്തറിഞ്ഞതെന്ന് അദ്ദേഹം പറഞ്ഞു. 'എനിക്കിപ്പോൾ മൂന്ന് വയസ്സുള്ള ഒരു മകളുണ്ട്, അവളെ ജപ്പാൻ കാണിക്കാൻ ഞാൻ ആകാംക്ഷയോടെ കാത്തിരിക്കുകയാണ്,' രൺബീർ പങ്കുവെച്ചു.

നിലവിൽ സഞ്ജയ് ലീല ബൻസാലിയുടെ 'ലവ് ആൻഡ് വാർ', നിതേഷ് തിവാരിയുടെ 'രാമായണം' എന്നീ ചിത്രങ്ങളുടെ തിരക്കിലാണ് താരം.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Ranbir Kapoor shares his desire for a friend-like relationship with his daughter Raha, unlike his bond with father Rishi Kapoor. Read more on his heartfelt confessions.