വേട്ടയാടുന്നത് പെണ്സിംഹങ്ങള്, പക്ഷേ ആദ്യം കഴിക്കുന്നത് ആണ്സിംഹങ്ങള്;കാട്ടില് കഴിയാത്ത കാട്ടിലെ രാജാവ്
'കാട്ടിലെ രാജാവ്' എന്നാണ് സിംഹത്തിന്റെ വിളിപ്പേര്. വേഗം കൊണ്ട് ചീറ്റപ്പുലിയും ശക്തി കൊണ്ട് ആനയുമാണ് രാജാവാകേണ്ടത്. കഴുതപ്പുലിയുടെ കടിക്ക് പോലും സിഹത്തിന്റേതിനേക്കാള് ശക്തിയുണ്ട്. ഏറ്റവും രസകരമായ കാര്യം സിംഹങ്ങള് കാടുകളിലല്ല ജീവിക്കുന്നത് എന്നതാണ്. അവ പുൽമേടുകളിലും സാവന്നകളിലുമാണ് കഴിയുന്നത്. പിന്നെന്തിന് സിംഹത്തെ രാജാവെന്ന് വിളിക്കുന്നു? ആജ്ഞാശക്തി, പെരുമാറ്റം, നേതൃത്വപാടവം എന്നിവകൊണ്ടാണ് സിംഹത്തിന് ഈ വിശേഷണം കിട്ടിയത്. അവയുടെ സാമൂഹിക ജീവിതം, കൂട്ടായ പ്രവര്ത്തനം, പ്രദേശത്തിന്മേലുള്ള നിയന്ത്രണം എന്നിവ മറ്റ് ജീവികളില് കാണുന്നില്ല.
സിംഹങ്ങള് സംഘടിതമായ കൂട്ടങ്ങളായി ജീവിക്കുന്നു, ഈ കൂട്ടങ്ങള്ക്കുള്ളില് ആണ്-പെണ് സിംഹങ്ങള്ക്ക് വ്യത്യസ്ത റോളുകളുണ്ട്. ശൗര്യവും ചുറുചുറുക്കും കൂടുതലുള്ളത് പെണ്സിംഹങ്ങള്ക്കാണ്. തന്ത്രജ്ഞരായ ഇവരാണ് പ്രധാന വേട്ടക്കാര്. തങ്ങളേക്കാള് വളരെ വലിയ ഇരകളെപ്പോലും ഇവര് കൃത്യതയോടും സഹകരണത്തോടും കൂടി വീഴ്ത്തും. ഇവയുടെ പതുങ്ങിയിരുന്നുള്ള വേട്ടയാടല്, കൂട്ടായ പ്രവര്ത്തനം എന്നിവ ശ്രദ്ധേയമാണ്. പെണ്സിംഹങ്ങള് കൂട്ടത്തിലെ പരിപാലകര് കൂടിയാണ്. ഇവര് കുഞ്ഞുങ്ങളെ കൂട്ടായി വളര്ത്തുകയും സംരക്ഷിക്കുകയും ചെയ്യുന്നു. ഇവയുടെ നിശ്ചയദാര്ഢ്യം, ബുദ്ധി, വിശ്വസ്തത എന്നിവ കൂട്ടത്തിന്റെ നിലനില്പ്പിന്റെ ആണിക്കല്ലാണ്. വേട്ടയാടുന്നത് മിക്കപ്പോഴും പെണ്സിംഹങ്ങള് ആണെങ്കിലും ആണ്സിംഹങ്ങളാണ് സാധാരണയായി ആദ്യം ഭക്ഷണം കഴിക്കുന്നത്.
ഗംഭീരമായ സടയും ഇടിമുഴക്കം പോലുള്ള ഗര്ജ്ജനങ്ങളുമായി, ആണ്സിംഹങ്ങള് ദിവസത്തിന്റെ ഭൂരിഭാഗവും വിശ്രമിക്കുന്നു. അവര് പൊതുവെ ശാന്തരാണ്. ആണ്സിംഹങ്ങളാണ് കൂട്ടത്തിന്റെ സംരക്ഷകര്. തങ്ങളുടെ പ്രദേശം പിടിച്ചെടുക്കാന് ശ്രമിക്കുന്ന എതിരാളികളായ ആണ്സിംഹങ്ങളെ അവര് പ്രതിരോധിക്കുന്നു. ഈ ഏറ്റുമുട്ടലുകള് പലപ്പോഴും പരിക്കുകളിലോ മരണത്തിലോ കലാശിക്കുന്നവയുമാണ്. നിതാന്ത ജാഗ്രത പുലര്ത്തുന്ന ആണ്സിംഹങ്ങള് കഠിനമായ പോരാട്ടത്തിന് സദാസന്നദ്ധരാണ്. കൂട്ടത്തിന്റെ, പ്രത്യേകിച്ച് കുഞ്ഞുങ്ങളുടെ അതിജീവനം അവയെ ആശ്രയിച്ചിരിക്കുന്നു.
ആണ്സിംഹങ്ങള് 150-250 കിലോഗ്രാം വരെ ഭാരമുണ്ടാകും. പ്രതിരോധത്തിനായി രൂപപ്പെട്ട വീതിയേറിയ തലയും ശക്തമായ താടിയെല്ലുകളും പേശീബലമുള്ള ശരീരവുമാണ് ഇവയ്ക്കുള്ളത്. 110-180 കിലോഗ്രാം ഭാരമുള്ള, പെണ്സിംഹങ്ങള് താരതമ്യേന ചെറിയവരും കൂടുതല് മെയ്വഴക്കമുള്ളവരുമാണ്. ഇവയുടെ ഒതുങ്ങിയ ശരീരം വേട്ടയാടുമ്പോള് വേഗത്തിലും രഹസ്യമായും നീങ്ങാന് സഹായിക്കുന്നു.
സിംഹങ്ങളെ പ്രധാനമായും കാണുന്നത് സബ്-സഹാറന് ആഫ്രിക്കയിലാണ്. ടാന്സാനിയ, കെനിയ, ദക്ഷിണാഫ്രിക്ക, ബോട്സ്വാന, നമീബിയ, സിംബാബ്വെ തുടങ്ങിയ രാജ്യങ്ങളിലും ധാരാളം സിംഹങ്ങളുണ്ട്. ഒരുകാലത്ത് യൂറോപ്പ്, മിഡില് ഈസ്റ്റ് എന്നിവിടങ്ങളിലും ഏഷ്യയുടെ മിക്ക ഭാഗങ്ങളിലും സിംഹങ്ങള് വിഹരിച്ചിരുന്നു, എന്നാല് ആവാസവ്യവസ്ഥയുടെ നാശവും മനുഷ്യന്റെ ഇടപെടലും കാരണം അവയുടെ എണ്ണം കുറഞ്ഞു. ഇന്ന് ഏഷ്യാറ്റിക് സിംഹങ്ങളുടെ അവശേഷിക്കുന്ന ഒരേയൊരു കൂട്ടം ഇന്ത്യയിലെ ഗുജറാത്തിലുള്ള ഗീര് വനത്തിലും ചുറ്റിലുമായിട്ടാണ് കാണപ്പെടുന്നത്.
കൂടുതല് ഫീച്ചറുകള് വായിക്കാന് ഗൃഹലക്ഷ്മി വാട്സാപ്പ് ഗ്രൂപ്പില് അംഗമാകൂ:https://mbi.page.link/grihalakshmi
Content Highlights: Discover the surprising truth about lions: who hunts, who eats first, and why they`re called the `King of the Jungle` despite living in grasslands.