‘മുസ്ലിം ആയിരുന്നിട്ടും അന്ത്യകർമ്മങ്ങൾ ഹിന്ദു ആചാരപ്രകാരം; അമ്മയുടെ മരണത്തിലും സൈബർ ആക്രമണം’

കഴിഞ്ഞ വർഷം നവംബറിലായിരുന്നു പ്രശസ്ത ബോളിവുഡ് താരം സഞ്ജയ് ഖാന്റെ ഭാര്യയും ഇന്റീരിയർ ഡിസൈനറുമായ സെറീൻ ഖാൻ അന്തരിച്ചത്. എന്നാൽ അവരുടെ മരണശേഷവും കുടുംബത്തിന് സോഷ്യൽ മീഡിയയിൽ വലിയ രീതിയിലുള്ള സൈബർ ആക്രമണങ്ങൾ നേരിടേണ്ടി വന്നിരുന്നു. സെറീൻ ഖാന്റെ ഭൗതികശരീരം ഹിന്ദു ആചാരപ്രകാരം സംസ്‌കരിച്ചതായിരുന്നു സൈബർ അധിക്ഷേപങ്ങൾക്ക് കാരണം. ഇപ്പോഴിതാ, ആ തീരുമാനത്തിന് പിന്നിലെ യഥാർത്ഥ കാരണവും തങ്ങൾ നേരിട്ട കടുത്ത ട്രോളുകളെക്കുറിച്ചും മനസ്സ് തുറന്നിരിക്കുകയാണ് സെറീന്റെ മകളും ഡിസൈനറുമായ ഫറ ഖാൻ അലി.

'അത് അമ്മയുടെ ആഗ്രഹമായിരുന്നു'

സെറീൻ ഖാനെ മുസ്ലിം ആചാരപ്രകാരം അടക്കം ചെയ്യുന്നതിന് പകരം ഹിന്ദു ആചാരപ്രകാരം ദഹിപ്പിക്കാൻ ഉണ്ടായ കാരണം വിക്കി ലാൽവാനിയുമായുള്ള അഭിമുഖത്തിൽ ഫറ വ്യക്തമാക്കുകയുണ്ടായി. "അമ്മ ഒരു പാർസി കുടുംബത്തിലാണ് ജനിച്ചതെങ്കിലും വിവാഹം കഴിച്ചത് മുസ്ലിമിനെയായിരുന്നു. എങ്കിലും തന്റെ ചിതാഭസ്മം കശ്മീരിലെ ഒഴുകുന്ന ജലാശയത്തിൽ നിമജ്ജനം ചെയ്യണമെന്ന് അമ്മയ്ക്ക് വലിയ ആഗ്രഹമുണ്ടായിരുന്നു. അതുകൊണ്ടാണ് തന്നെ ഒരു ഹിന്ദുവിനെപ്പോലെ സംസ്‌കരിക്കണമെന്ന് അമ്മ ഞങ്ങളോട് ആവശ്യപ്പെട്ടത്. കല്ലറയ്ക്കുള്ളിൽ അടക്കപ്പെടുന്നതിനെക്കുറിച്ച് അമ്മയ്ക്ക് വലിയ ഭയമായിരുന്നു (claustrophobia). ഇതായിരുന്നു അവരെ ദഹിപ്പിക്കാൻ ഉണ്ടായ പ്രധാന കാരണം. ഞങ്ങൾ അമ്മയുടെ ആ ആഗ്രഹം സാധിച്ചു നൽകി."

അമ്മയുടെ മരണസമയത്ത് സോഷ്യൽ മീഡിയയിൽ ഉയർന്നുവന്ന അനാവശ്യ ചർച്ചകൾ കുടുംബത്തെ ഏറെ വേദനിപ്പിച്ചുവെന്ന് ഫറ പറയുന്നു.

"ഒരു വ്യക്തിയുടെ മരണത്തിൽ പോലും ആളുകൾ പരസ്പരം വിദ്വേഷം പുലർത്തുന്നത് കാണുമ്പോൾ വലിയ വിഷമം തോന്നി. 'അവർ ഒരു മുസ്ലിം ആയിരുന്നിട്ടും എങ്ങനെയാണ് ദഹിപ്പിക്കാൻ കഴിയുക?' എന്നായിരുന്നു മുസ്ലീങ്ങളുടെ ചോദ്യം. അത് തന്നെയായിരുന്നു ചില ഹിന്ദുക്കളുടെയും ചോദ്യം," ഫറ ഓർത്തെടുത്തു.

സോഷ്യൽ മീഡിയയിലെ മോശം കമന്റുകൾ തന്നെ ബാധിക്കാറില്ലെന്നും അത്തരം ട്രോളുകളെ അവഗണിക്കാൻ താൻ പഠിച്ചുവെന്നും ഫറ കൂട്ടിച്ചേർത്തു. "എല്ലാ മതങ്ങളെയും സ്നേഹിക്കാനും എല്ലാ ആഘോഷങ്ങളും ഒരുമിച്ച് ആഘോഷിക്കാനുമാണ് കുടുംബം പഠിപ്പിച്ചത്. കഴിഞ്ഞ 10 വർഷത്തിനിടയിലാണ് ഈ രാജ്യത്ത് മതത്തിന്റെ പേരിൽ ആളുകൾ ഇത്രയധികം പരസ്പരം പോരടിക്കാൻ തുടങ്ങിയത്. എങ്കിലും ഞാൻ ആ കമന്റുകളെല്ലാം പൂർണ്ണമായി അവഗണിച്ചു. ഞാനിപ്പോൾ 'അവഗണനയുടെ രാജ്ഞി' (ignoring queen) ആയി മാറിയിരിക്കുകയാണ്.

മതാതീതമായ ഒരു യാത്രയയപ്പായിരുന്നു സെറീൻ ഖാന് കുടുംബം നൽകിയത്. അവരുടെ അനുസ്മരണ ചടങ്ങിൽ പാർസി, ഹിന്ദു, മുസ്ലിം, ക്രിസ്ത്യൻ, സിഖ് എന്നീ അഞ്ച് വ്യത്യസ്ത മതങ്ങളിൽ നിന്നുള്ള പുരോഹിതന്മാർ പങ്കെടുത്ത് പ്രാർത്ഥനകൾ നടത്തിയിരുന്നു. രണ്ടായിരത്തോളം ആളുകൾ പങ്കെടുത്ത ഈ ചടങ്ങ്, സെറീന്റെ ജീവിതമൂല്യങ്ങളെ പ്രതിഫലിപ്പിക്കുന്നതായിരുന്നു.

വാർദ്ധക്യസഹജമായ അസുഖങ്ങളെ തുടർന്ന് 81-ാം വയസ്സിലായിരുന്നു സെറീൻ ഖാൻ അന്തരിച്ചത്. ഹൃത്വിക് റോഷന്റെ മുൻ ഭാര്യ സുസെയ്ൻ ഖാൻ ഉൾപ്പെടെ നാല് മക്കളാണ് സഞ്ജയ് ഖാൻ - സെറീൻ ഖാൻ ദമ്പതികൾക്കുള്ളത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Zarine Khan was cremated per her own request due to claustrophobia., Farah Khan Ali addresses the social media backlash regarding interfaith funeral rites., The funeral ceremony included prayers from five different religious leaders., Farah advocates for ignoring online hate and promoting religious harmony.