ഹോളിവുഡിൽ ഇന്ത്യക്കാരുടെ പ്രാതിനിധ്യത്തിന് മാറ്റം വന്നിട്ടുണ്ട് – ‘ഹെയിൽ മേരി’ താരം പ്രിയ കൻസാര
ഈ വർഷത്തെ ഹോളിവുഡിലെ ഏറ്റവും വലിയ വിജയചിത്രങ്ങളിൽ ഒന്നാണ് 'പ്രോജക്റ്റ് ഹെയിൽ മേരി' (Project Hail Mary). റയാൻ ഗോസ്ലിംഗ് പ്രധാന വേഷത്തിൽ എത്തിയ ഈ ചിത്രം ബോക്സ് ഓഫീസിൽ 500 മില്യൺ ഡോളറിലധികം നേടുകയും കഥ, പ്രകടനം, ദൃശ്യഭംഗി എന്നിവയിൽ പ്രേക്ഷക പ്രശംസ പിടിച്ചുപറ്റുകയും ചെയ്തിരുന്നു. റയാന്റെ ബഹിരാകാശ വാഹനത്തിലെ AI-ക്ക് ശബ്ദം നൽകിയ ഇന്ത്യൻ വംശജയായ നടി പ്രിയ കൻസാരയും ചിത്രത്തിലെ പ്രധാന താരനിരയിലുണ്ട്. ഇംഗ്ലീഷ് സിനിമകളിൽ ഇന്ത്യക്കാരുടെ മാറിക്കൊണ്ടിരിക്കുന്ന പ്രാതിനിധ്യത്തെക്കുറിച്ച് പ്രിയ അടുത്തിടെ ഒരു അഭിമുഖത്തിൽ സംസാരിച്ചിരുന്നു.
ഇന്ത്യൻ പ്രാതിനിധ്യം
'പ്രോജക്റ്റ് ഹെയിൽ മേരി'യിൽ 'മേരി' എന്ന കമ്പ്യൂട്ടറിനാണ് പ്രിയ ശബ്ദം നൽകിയത്. 2022-ൽ പുറത്തിറങ്ങിയ ബ്രിട്ടിഷ് പീരിയഡ് ഡ്രാമയായ 'ബ്രിഡ്ജർട്ടണിലെ' ചെറിയ വേഷത്തിലൂടെയാണ് പ്രിയ തന്റെ കരിയർ ആരംഭിച്ചത്. ANI-ക്ക് നൽകിയ അഭിമുഖത്തിൽ, തന്റെ കുട്ടിക്കാലത്തെ അപേക്ഷിച്ച് ഹോളിവുഡിൽ ഇന്ത്യൻ, ദക്ഷിണേഷ്യൻ പ്രാതിനിധ്യത്തിൽ വലിയ പുരോഗതി ഉണ്ടായതായി പ്രിയ ചൂണ്ടിക്കാട്ടി.
"ഹോളിവുഡിലെ അവസരങ്ങളിലും ഉള്ളടക്കത്തിലും വലിയ മാറ്റങ്ങളുണ്ട്. കുട്ടിക്കാലത്ത് ഞാൻ സിനിമകളും ടിവിയും കാണുമ്പോൾ എന്നെപ്പോലെയുള്ള ഒരാളെ കാണുന്നത് വളരെ അപൂർവമായിരുന്നു. ഇനി കണ്ടാൽ തന്നെ അവർ വളരെ സ്റ്റീരിയോടൈപ്പ് (stereotype) കഥാപാത്രങ്ങളായിരിക്കും. പക്ഷേ, വളർന്നുവരുമ്പോൾ കാര്യങ്ങൾ മാറി. കൂടുതൽ ആഴമുള്ള കഥാപാത്രങ്ങളും രസകരമായ കഥകളും ഇപ്പോൾ ഉണ്ടാകുന്നുണ്ട്," പ്രിയ പറഞ്ഞു.
എങ്കിലും ചിലപ്പോഴൊക്കെ പഴയ രീതിയിലുള്ള വേർതിരിവുകൾ ഇപ്പോഴും തുടരുന്നുണ്ടെന്നും അവർ കൂട്ടിച്ചേർത്തു. 'ബ്രിഡ്ജർട്ടൺ' പോലുള്ള ഷോകളിൽ പ്രധാന വേഷങ്ങളിൽ ദക്ഷിണേഷ്യൻ താരങ്ങളെ കാണുന്നത് വലിയ മാറ്റമാണെന്ന് അവർ നിരീക്ഷിച്ചു.
മേരി എന്ന കഥാപാത്രത്തിലൂടെ പ്രശംസ നേടുന്ന പ്രിയ, സഞ്ജയ് ലീല ബൻസാലിക്കൊപ്പം പ്രവർത്തിക്കാൻ ആഗ്രഹമുണ്ടെന്നും, അദ്ദേഹത്തിന്റെ സിനിമകൾ മനോഹരമാണെന്നും വെളിപ്പെടുത്തി.
പ്രോജക്റ്റ് ഹെയിൽ മേരി
ഭൂമിയിലെ ജീവൻ നിലനിർത്താനായി 11.9 പ്രകാശവർഷം അകലെയുള്ള നക്ഷത്രങ്ങളെക്കുറിച്ച് പഠിക്കാൻ പോകുന്ന റൈലൻഡ് ഗ്രേസ് എന്ന സയൻസ് അധ്യാപകനായാണ് റയാൻ ഗോസ്ലിംഗ് അഭിനയിക്കുന്നത്. ഫിൽ ലോർഡ്, ക്രിസ്റ്റഫർ മില്ലർ എന്നിവർ ചേർന്നാണ് ചിത്രം സംവിധാനം ചെയ്തത്. മാർച്ച് 26-നാണ് ചിത്രം റിലീസ് ചെയ്തത്.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi
Content Highlights: Priya Kansara reflects on the shift from stereotypical to complex roles for South Asians in Hollywood., The success of Project Hail Mary marks a significant milestone for Indian representation., Kansara highlights the positive impact of diverse casting in shows like Bridgerton., The actress expresses a keen interest in collaborating with filmmaker Sanjay Leela Bhansali.