ഒരു ദിവസത്തേക്ക് 16 കോടി രൂപ പ്രതിഫലം; ‘ഇന്ത്യയിൽ ഏറ്റവും കൂടുതൽ പ്രതിഫലം വാങ്ങുന്ന നടനാണ് അദ്ദേഹം’

നാഗ് അശ്വിൻ സംവിധാനം ചെയ്ത സൂപ്പർഹിറ്റ് ചിത്രമായിരുന്നു'കൽക്കി 2898 എഡി.' ഈ ചിത്രത്തിൽ അഭിനയിച്ചതിന് കമൽ ഹാസന് ഒരു ദിവസം 2 മില്യൺ ഡോളർ (ഏകദേശം 16.5 കോടി രൂപയിലധികം) പ്രതിഫലം ലഭിച്ചതായി നടനും സംവിധായകനുമായ യുഗി സേതു പറഞ്ഞിരുന്നു. ചിത്രത്തിന്റെ നിർമ്മാതാവ് അശ്വിനി ദത്തുമായി നടത്തിയ കൂടിക്കാഴ്ചയ്ക്ക് ശേഷമാണ് യുഗി സേതു ഈ വെളിപ്പെടുത്തൽ നടത്തിയത്.

ഇന്ത്യഗ്ലിറ്റ്‌സിന് (Indiaglitz) നൽകിയ അഭിമുഖത്തിൽ യുഗി സേതു പറഞ്ഞത് ഇങ്ങനെ: "കമൽ സാറിന്റെ പദവി അത്തരത്തിലുള്ളതാണ്. കൽക്കിക്ക് വേണ്ടി 20 ദിവസത്തെ കോൾഷീറ്റിന്, 150 കോടി രൂപയാണ് അദ്ദേഹത്തിന് ലഭിക്കുന്നത്. ഒരു ദിവസം ഒരു മില്യൺ ഡോളർ വാങ്ങുന്ന, ഇന്ത്യയിൽ ഏറ്റവും കൂടുതൽ പ്രതിഫലം ലഭിക്കുന്ന നടനാണ് അദ്ദേഹമെന്ന് ഞാൻ അദ്ദേഹത്തോട് പറഞ്ഞു."

എന്നാൽ പിന്നീട് നിർമ്മാതാവ് അശ്വിനി ദത്തിനെ കണ്ടപ്പോൾ അദ്ദേഹം ഇത് തിരുത്തിയതായും യുഗി പറഞ്ഞു. "150 കോടി രൂപ 20 ദിവസത്തേക്കാണെന്ന് ഞാൻ പറഞ്ഞപ്പോൾ, 'അല്ല സർ, അദ്ദേഹം 10 ദിവസം മാത്രമേ നൽകിയിട്ടുള്ളൂ' എന്ന് നിർമ്മാതാവ് മറുപടി നൽകി. അങ്ങനെയെങ്കിൽ അത് ഒരു ദിവസം 2 മില്യൺ ഡോളറാണ്," യുഗി സേതു വ്യക്തമാക്കി. മുൻപ് പുറത്തുവന്ന റിപ്പോർട്ടുകൾ പ്രകാരം കമൽ ഹാസന്റെ പ്രതിഫലം 100 കോടിക്ക് മുകളിലാണെന്ന് സൂചനകളുണ്ടായിരുന്നു.

2024-ൽ പുറത്തിറങ്ങിയ കൽക്കി' എന്ന ചിത്രത്തിൽ സുപ്രീം യാസ്കിൻ എന്ന വില്ലൻ കഥാപാത്രത്തെയാണ് കമൽ ഹാസൻ അവതരിപ്പിച്ചത്. ചിത്രത്തിന്റെ ആദ്യ ഭാഗത്തിൽ കുറഞ്ഞ സമയം മാത്രമേ അദ്ദേഹം സ്ക്രീനിൽ ഉണ്ടായിരുന്നുള്ളൂ എങ്കിലും, രണ്ടാം ഭാഗത്തിൽ (Kalki 2) അദ്ദേഹത്തിന് വളരെ പ്രധാന്യവും ദൈർഘ്യവുമുള്ള വേഷമായിരിക്കും ഉണ്ടാവുക.

ഏകദേശം 40 വർഷങ്ങൾക്ക് ശേഷം അമിതാഭ് ബച്ചനും കമൽ ഹാസനും ഒന്നിക്കുന്ന ചിത്രം കൂടിയാണിത്. ഹൈദരാബാദിൽ നടക്കുന്ന രണ്ടാം ഭാഗത്തിന്റെ ചിത്രീകരണത്തിനിടെ ഇരുവരും ഒന്നിച്ചുള്ള ചിത്രങ്ങൾ ബിഗ് ബി സോഷ്യൽ മീഡിയയിൽ പങ്കുവെച്ചിരുന്നു. ചിത്രത്തിന്റെ ആദ്യ ഭാഗം ഇന്ത്യയിൽ നിന്ന് മാത്രം 1000 കോടി രൂപയിലധികം കളക്ഷൻ നേടിയിരുന്നു. ജോലി സമയത്തെക്കുറിച്ചുള്ള തർക്കങ്ങളും പ്രതിഫലം വർദ്ധിപ്പിക്കണമെന്ന ആവശ്യവും ഉന്നയിച്ച് ദീപിക പദുകോൺ രണ്ടാം ഭാഗത്തിൽ നിന്ന് പിന്മാറിയിരുന്നു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Kamal Haasan reportedly earned 150 crore for 10 days of work in Kalki 2898 AD., Calculated daily earnings estimated at $2 million (approx. 16.5 crore)., Clarification provided by producer Ashwini Dutt regarding shoot duration., Kamal Haasan plays the villain Supreme Yaskin in the Kalki franchise., Reunion with Amitabh Bachchan after 40 years.