റിലീസിന് മുൻപേ ഗിന്നസ് വേൾഡ് റെക്കോർഡ് നേടി അല്ലു അർജുൻ ചിത്രം

റിലീസിന് മുൻപേ ഗിന്നസ് വേൾഡ് റെക്കോർഡ് എന്ന ചരിത്ര നേട്ടം സ്വന്തമാക്കിയിരിക്കുകയാണ് അല്ലു അർജുൻ ചിത്രം 'രാക'. അറ്റ്ലി സംവിധാനം ചെയ്യുന്ന ഈ ബിഗ് ബജറ്റ് ചിത്രം സിനിമാ ലോകത്തെ ഒന്നാകെ അമ്പരപ്പിച്ചിരിക്കുകയാണ്. വിഎഫ്എക്സ് സാങ്കേതികവിദ്യയുടെ ലോകത്ത് പുതിയൊരു അധ്യായം കുറിച്ചുകൊണ്ട് ഗിന്നസ് വേൾഡ് റെക്കോർഡിലാണ് ചിത്രം ഇടംപിടിച്ചിരിക്കുന്നത്.

ഒരു രംഗത്തിൽ തത്സമയം ഏറ്റവും കൂടുതൽ ആളുകളുടെ ചലനങ്ങൾ പകർത്തുന്ന സാങ്കേതികവിദ്യയായ 'മോഷൻ ക്യാപ്ചർ' (Most People Motion-Captured in Real-Time) വിഭാഗത്തിലാണ് 'രാക' റെക്കോർഡ് കരസ്ഥമാക്കിയത്. സിനിമയിലെ ഒരു പ്രധാന രംഗത്തിനായി ഒരേസമയം 37 കലാകാരന്മാരുടെ മോഷൻ ക്യാപ്ചർ തത്സമയം വിജയകരമായി ചിത്രീകരിക്കാൻ അണിയറപ്രവർത്തകർക്ക് സാധിച്ചു.

സംവിധായകൻ അറ്റ്ലിയുടെ 40-ാം ജന്മദിനത്തോടനുബന്ധിച്ച് നിർമാതാക്കളായ സൺ പിക്ചേഴ്സ് ആണ് ഈ സന്തോഷവാർത്ത പുറത്തുവിട്ടത്. ചടങ്ങിൽ അല്ലു അർജുനും അറ്റ്ലിയും ചേർന്ന് ഗിന്നസ് വേൾഡ് റെക്കോർഡ്സ് പ്രതിനിധികളിൽ നിന്ന് ഔദ്യോഗിക സർട്ടിഫിക്കറ്റ് ഏറ്റുവാങ്ങി.

"ഇത് ഞങ്ങളുടെ മുഴുവൻ ടീമിനും അഭിമാന നിമിഷമാണ്. ഞങ്ങളുടെ അധ്വാനത്തെയും ശ്രമങ്ങളെയും ലോകതലത്തിൽ അംഗീകരിച്ച ഗിന്നസ് വേൾഡ് റെക്കോർഡ്സിന് നന്ദി അറിയിക്കുന്നു," സർട്ടിഫിക്കറ്റ് സ്വീകരിച്ച ശേഷം അല്ലു അർജുൻ പ്രതികരിച്ചു. ഈ റെക്കോർഡ് നേട്ടത്തിന് പിന്നിലെ കഠിനാധ്വാനം വ്യക്തമാക്കുന്ന 'ബിഹൈൻഡ് ദ സീൻസ്' (BTS) വീഡിയോയും സൺ പിക്ചേഴ്സ് സമൂഹമാധ്യമങ്ങളിലൂടെ പങ്കുവെച്ചിട്ടുണ്ട്. 37 പേരെ ഒരേ സമയം മോഷൻ ക്യാപ്ചർ സ്യൂട്ടുകൾ അണിയിച്ച് സാങ്കേതികമായി എങ്ങനെ പകർത്തി എന്ന് ഈ വീഡിയോയിൽ വ്യക്തമായി കാണാം. ഇന്ത്യൻ സിനിമയെ ആഗോള വേദിയിലേക്ക് ഉയർത്തുന്ന വലിയ മുന്നേറ്റമായാണ് സിനിമാ ലോകം ഇതിനെ കാണുന്നത്.

അല്ലു അർജുനും അറ്റ്ലിയും ആദ്യമായി ഒന്നിക്കുന്ന ഈ സയൻസ് ഫിക്ഷൻ ആക്ഷൻ ഡ്രാമയിൽ വൻ താരനിരയാണ് അണിനിരക്കുന്നത്. ദീപിക പദുകോൺ, രശ്മിക മന്ദാന, ജാൻവി കപൂർ, മൃണാൾ താക്കൂർ എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.

ചിത്രത്തിൽ അല്ലു അർജുൻ നാല് വ്യത്യസ്ത ഗെറ്റപ്പുകളിൽ എത്തുമെന്നും, ഒരേസമയം രണ്ട് സമാന്തര പ്രപഞ്ചങ്ങളുടെ (Parallel Universes) കഥയാണ് ചിത്രം പറയുന്നതെന്നുമുള്ള റിപ്പോർട്ടുകൾ പുറത്തുവരുന്നുണ്ടെങ്കിലും നിർമാതാക്കൾ ഇത് ഔദ്യോഗികമായി സ്ഥിരീകരിച്ചിട്ടില്ല. എന്തായാലും റിലീസിന് മുൻപേ തന്നെ ഇന്ത്യയിലുടനീളം വലിയ പ്രതീക്ഷകളാണ് 'രാക' സൃഷ്ടിച്ചിരിക്കുന്നത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Allu Arjun and Atlee's film Raka earned a Guinness World Record prior to its release., Achieved the record in the 'Most People Motion-Captured in Real-Time' category with 37 artists., Sun Pictures released the official certificate and a behind-the-scenes (BTS) video on Atlee's birthday., The sci-fi action drama features a star-studded cast including Deepika Padukone, Rashmika Mandanna, Janhvi Kapoor, and Mrunal Thakur.