എന്തിന് നടക്കണം? എങ്ങനെ നടക്കണം?

ഒരായുസ്സില്‍ ഒരാള്‍ ആകെയെത്ര ദൂരം നടക്കുന്നുണ്ടാകും? ചെറുതും വലുതുമായ ആ ദൂരങ്ങളൊക്കെ കൂട്ടിവെച്ചാല്‍ ആകെയെത്ര ദൂരമാകും? ആയുസ്സിന്റെ പരിധിയെത്തുന്ന നടത്തത്തിന്റെ ദൂരം എടുക്കുക അത്ര എളുപ്പമല്ല. പക്ഷേ, നടത്തത്തിന്റെ കാര്യത്തില്‍ മനസ്സിലാക്കേണ്ടതും മനസ്സിലാക്കാന്‍ എളുപ്പമുള്ളതുമായൊരു സംഗതിയുണ്ട്. നടത്തം ആരോഗ്യത്തിന് ഗുണകരമാണെന്ന സംഗതി. നടത്തത്തിന്റെ മേന്മകളില്‍ ചിലത് അറിഞ്ഞിരിക്കാം.

• ദിവസം കുറഞ്ഞത് അരമണിക്കൂര്‍ നേരം നടക്കുന്നത് ശരീരത്തിന്റെ മൊത്തത്തിലുള്ള ആരോഗ്യത്തിന് ഗുണംചെയ്യും.
• സമയക്കുറവോ മറ്റ് കാരണങ്ങളോ കൊണ്ട് അര മണിക്കൂര്‍ നടത്തം പതിവാക്കാനാവില്ലെങ്കിലും വിഷമിക്കേണ്ട. ഇടവേളയിട്ടുള്ള ചെറുനടത്തവും ഗുണകരമാണ്.
• പതിവുനടത്തത്തിന് ചങ്ങാതിമാരെ ഒപ്പം കൂട്ടുന്നത് വിരസതയകറ്റും.
• ഹൃദയത്തിന്റെയും ശ്വാസകോശത്തിന്റെയും ആരോഗ്യത്തെ നടത്തം മെച്ചപ്പെടുത്തുമെന്ന് പഠനങ്ങള്‍ പറയുന്നു.
• ഹൃദ്രോഗം, പക്ഷാഘാതം തുടങ്ങിയവയുടെ സാധ്യത കുറയ്ക്കുന്നു.
• രക്തസമ്മര്‍ദ്ദം, പ്രമേഹം തുടങ്ങിയവ നിയന്ത്രിക്കാന്‍ സഹായിക്കുന്നു.
• ഭാരം ആരോഗ്യകരമായി നിലനിര്‍ത്താനും ശരീരത്തിലെ കൊഴുപ്പ് കുറയ്ക്കാനും നടത്തം സഹായിക്കും.
• രക്തചംക്രമണം വര്‍ധിപ്പിച്ച് ചര്‍മത്തിന് തിളക്കം വര്‍ധിപ്പിക്കും.
• നടക്കുമ്പോള്‍ വിയര്‍പ്പിലൂടെ ശരീരത്തിലെ വിഷവസ്തുക്കള്‍ പുറന്തള്ളപ്പെടും.
• മാനസിക സമ്മര്‍ദ്ദം ലഘൂകരിച്ച് ഉറക്കമില്ലായ്മയ്ക്ക് പരിഹാരമാകുന്നു.
• എന്‍ഡോര്‍ഫിനുകള്‍ ഉത്പാദിപ്പിക്കുകവഴി വിഷാദത്തെ അകറ്റും.
• ഓക്‌സിജന്‍ വിതരണവും രക്ത ചംക്രമണവും വര്‍ധിപ്പിച്ച് തലച്ചോറിന്റെ പ്രവര്‍ത്തനശേഷി മെച്ചപ്പെടുത്തുന്നു.
• അസ്ഥികളെയും മസിലുകളെയും ബലപ്പെടുത്തുന്നു.
• നടത്തത്തിലൂടെ ശരീരത്തിലും മനസ്സിലും ഊര്‍ജം നിലനിര്‍ത്താനാകും.
• രോഗപ്രതിരോധശേഷി മെച്ചപ്പെടുത്തുന്നു.

നടക്കുമ്പോള്‍ ശ്രദ്ധിക്കേണ്ട കാര്യങ്ങള്‍

• മൃദുവായ സോളോടുകൂടിയ ഷൂസ് ധരിച്ച് നടക്കുക.
• തലയുയര്‍ത്തി നേരേ നോക്കി നടക്കാന്‍ ശ്രദ്ധിക്കുക.
• കാലാവസ്ഥയ്ക്കനുയോജ്യമായ അയഞ്ഞ വസ്ത്രങ്ങള്‍ ധരിക്കുന്നതാണ് നല്ലത്.
• നടക്കുമ്പോള്‍ കഴുത്തിനും തോളെല്ലുകള്‍ക്കും നട്ടെല്ലിനും സമ്മര്‍ദം ഉണ്ടാകാതിരിക്കാന്‍ ശ്രദ്ധിക്കുക.
• കൈമുട്ടുകള്‍ ചെറുതായി മടക്കി കൈകള്‍ ചലിപ്പിച്ച് നടക്കുക.
• നടക്കുമ്പോള്‍ പാദങ്ങള്‍ പൂര്‍ണമായും നിലത്ത്‌ പതിയുന്നുണ്ടെന്ന് ഉറപ്പാക്കുക.
• കുണ്ടും കുഴിയുമില്ലാത്ത നിരപ്പായ പാതകള്‍ നടത്തത്തിന് തിരഞ്ഞെടുക്കുക.
• ആദ്യത്തെയും അവസാനത്തെയും പത്ത് മിനിറ്റ് നേരം നടത്തത്തിന് വേഗത കുറയ്ക്കുക.