ഒഡീസി നർത്തകിയും മുൻ ഇന്ത്യൻ ക്രിക്കറ്റ് ക്യാപ്റ്റൻ സൗരവ് ഗാംഗുലിയുടെ ഭാര്യയുമായ ഡോണ ഗാംഗുലി ഒരു കൂട്ടം സോഷ്യൽ മീഡിയാ ഹാൻഡിലുകൾക്കെതിരേ പരാതി നൽകിയിരിക്കുകയാണ്. കൊൽക്കത്ത ഫിലിം ഫെസ്റ്റിവലിൽ അടുത്തിടെ അവർ നൃത്തം ചെയ്തിരുന്നു. ഇതിനുപിന്നാലെ ഒരുകൂട്ടമാളുകൾ അവരെ ബോഡിഷെയ്മിങ് ചെയ്യുകയും അപമാനിക്കുകയും ചെയ്യുന്ന തരത്തിൽ പോസ്റ്റുകളിട്ടു. സോഷ്യൽ മീഡിയ പേജിലൂടെ അവർ തന്നെ ബോഡി ഷെയിം ചെയ്യുക മാത്രമല്ല, അപമാനിക്കുകയും പ്രശസ്തിക്ക് കോട്ടം വരുത്തിയെന്നും പരാതിയിൽ ഡോണ ആരോപിക്കുന്നുണ്ട്.

സൗരവ് ഗാംഗുലിയുടെ ഭാര്യ എന്ന നിലയിലാണ് ഡോണ ഗാംഗുലി ലോകമെമ്പാടും അറിയപ്പെടുന്നതെങ്കിലും അതിനും വളരെ മുമ്പുതന്നെ, ഒഡീസിയിൽ അവരൊരു ജീവിതം കെട്ടിപ്പടുത്തിരുന്നു.

കൊൽക്കത്തയിലെ പ്രശസ്തമായ ബിസിനസ്സ് കുടുംബത്തിലാണ് ഡോണ ജനിച്ചത്. നൃത്തം കരിയറായി തിരഞ്ഞെടുക്കുമ്പോൾ കുടുംബത്തിൽ നിന്ന് ചെറിയ അസ്വസ്ഥതകളുണ്ടായിരുന്നെങ്കിലും, നൃത്തത്തോടുള്ള അവരുടെ ഇഷ്ടം വിട്ടുവീഴ്ചയില്ലാത്ത ഒന്നായിരുന്നു.

ചെറുപ്പത്തിൽത്തന്നെ അവർ പരിശീലനം തുടങ്ങി. ഇന്ത്യൻ ചരിത്രത്തിലെ ഒഡീസിയുടെ ഏറ്റവും വലിയ ആചാര്യന്മാരിൽ ഒരാളായ ഗുരു കേളുചരൺ മഹാപത്രയെ കണ്ടുമുട്ടിയതോടെയാണ് അവരുടെ ജീവിതത്തിൽ ഒരു വഴിത്തിരിവുണ്ടായത്. അദ്ദേഹത്തിന്റെ ശിക്ഷണത്തിൽ അവർ വളർന്നു. തന്റെ നൃത്ത വൈദഗ്ധ്യം മാത്രമല്ല, മുഴുവൻ കലാപരമായ തത്വശാസ്ത്രവും രൂപപ്പെടുത്തിയത് മഹാപത്രയാണെന്ന് ഡോണ വിശ്വസിക്കുന്നു.

ഇന്ത്യയിലും വിദേശത്തും സജീവമായി പരിപാടികൾ അവതരിപ്പിക്കാറുണ്ട് ഡോണ. യൂറോപ്പ്, യുഎസ്, ഏഷ്യൻ രാജ്യങ്ങളിലും ഇന്ത്യയിലെ പ്രമുഖ ക്ലാസിക്കൽ വേദികളിലും അവർ നൃത്തമവതരിപ്പിച്ചിട്ടുണ്ട്. 1997-ൽ, തന്റെ ഗുരുവിനൊപ്പം ചേർന്ന് അവർ കൊൽക്കത്തയിൽ ദീക്ഷാ മഞ്ജരി എന്ന പേരിൽ ഒരു സാംസ്കാരിക വിദ്യാലയം സ്ഥാപിച്ചു. ഇന്ന്, ഈ സ്ഥാപനം നൂറുകണക്കിന് വിദ്യാർഥികളെ പരിശീലിപ്പിക്കുകയും പതിവായി സാംസ്കാരിക പരിപാടികൾ സംഘടിപ്പിക്കുകയും ചെയ്യുന്നു.‌

അയൽപക്കത്ത് തുടങ്ങിയ പ്രണയകഥ
ഡോണയുടെ ജീവിതത്തിലെ ഏറ്റവും മനോഹരമായ ഭാഗങ്ങളിലൊന്ന് സൗരവ് ഗാംഗുലിയുമായുള്ള അവരുടെ പ്രണയമാണ്. ഇരുവരും അയൽക്കാരായിരുന്നു. കുടുംബങ്ങൾക്ക് പരസ്പരം അറിയാമായിരുന്നെങ്കിലും എല്ലായ്പ്പോഴും നല്ല ബന്ധമായിരുന്നില്ല. കൗമാരപ്രായത്തിലാണ് ഇരുവരും കണ്ടുമുട്ടിയത്. വൈകാതെ സൗഹൃദത്തിലായി, പിന്നീടതൊരു രഹസ്യ പ്രണയബന്ധമായും മാറി. ഇരു കുടുംബങ്ങളുടെയും എതിർപ്പിനെ ഭയന്നാണ് അവർ ബന്ധം രഹസ്യമാക്കി വെച്ചത്.

തുടക്കത്തിൽ ഇരു കുടുംബങ്ങളും ബന്ധം എതിർത്തു. ഡോണയുടെ കുടുംബത്തിന്, സൗരവിന്റെ അനിശ്ചിതമായ ക്രിക്കറ്റ് ജീവിതം അപകടസാധ്യതയായി തോന്നിയിരിക്കാം. സൗരവിന്റെ കുടുംബത്തിന്, ഡോണയുടെ പ്രൊഫഷണൽ നൃത്തവും ഉയർന്ന മധ്യവർഗ പശ്ചാത്തലവും അസ്വസ്ഥതകളുണ്ടാക്കി. 1997-ൽ, കൗണ്ടി ക്രിക്കറ്റിന് ശേഷം സൗരവ് ഇംഗ്ലണ്ടിൽ നിന്ന് മടങ്ങിയെത്തിയപ്പോൾ, ആർഭാടങ്ങളോ ആഭരണങ്ങളോ ഇല്ലാതെ അവർ രഹസ്യമായി വിവാഹിതരായി. ലോർഡ്‌സിലെ തന്റെ അരങ്ങേറ്റ ടെസ്റ്റ് സെഞ്ച്വറിക്ക് ശേഷം സൗരവ് ഒരു താരമായി മാറിയപ്പോൾ മാത്രമാണ് ഇരു കുടുംബങ്ങളും ഒടുവിൽ വിവാഹം അംഗീകരിച്ചത്. അതിനുശേഷം ഒരു ഔദ്യോഗിക ചടങ്ങ് നടന്നു.

സൗരവിന്റെ പ്രശസ്തിയുടെ കൊടുമുടിയിൽ, പൊതുശ്രദ്ധയിലെത്തിയപ്പോഴും, അവർ കരിയർ ശ്രദ്ധയോടെ മുന്നോട്ടു കൊണ്ടുപോയി.

സൗരവ് എപ്പോഴും തന്റെ കലയെ പിന്തുണച്ചിട്ടുണ്ടെന്നും, പ്രൊഫഷണൽ ജീവിതത്തിൽ ഒരിക്കലും ഇടപെട്ടിട്ടില്ലെന്നും, അന്താരാഷ്ട്ര തലത്തിൽ പ്രകടനം നടത്താൻ ആത്മവിശ്വാസം പകർന്നിട്ടുണ്ടെന്നും ഡോണ പലപ്പോഴും തുറന്നുപറഞ്ഞിട്ടുണ്ട്. ദമ്പതികൾക്ക് സന എന്നൊരു മകളുണ്ട്.

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbi.page.link/grihalakshmi