അസാധാരണമായ ചൂടും അടിക്കടി മൂത്രശങ്കയും അനുഭവപ്പെടുന്നുണ്ടോ? നേരത്തേയുള്ള ആർത്തവവിരാമത്തിന്റെ ലക്ഷണങ്ങളാവാം

ആർത്തവം പോലെ തന്നെ സ്ത്രീകളുടെ ജീവിതകാലഘട്ടത്തിലെ പ്രധാനപ്പെട്ട ഒന്നാണ് ആർത്തവവിരാമവും. സാധാരണയായി 50 വയസ്സിനുശേഷമാണ് ആർത്തവവിരാമം ഉണ്ടാവുക. എന്നാൽ ഇന്ന് പലവിധകാരണങ്ങളാൽ ഇതിലും വ്യതിചലനങ്ങൾ ഉണ്ടാവുന്നു. നേരത്തെയുള്ള ആർത്തവവിരാമം, അകാല ആർത്തവവിരാമം എന്നിവ ഇതിൽ ഉൾപ്പെടുന്നു.

45 വയസ്സിനുമുൻപ് സംഭവിക്കുന്നതാണ് നേരത്തെയുള്ള ആർത്തവവിരാമം. 40 വയസ്സിനുമുൻപ് സംഭവിക്കുന്നത് അകാല ആർത്തവവിരാമവും. ഇത് ഒരു സ്ത്രീയുടെ ആരോഗ്യത്തെയും ജീവിതനിലവാരത്തെയും കാര്യമായി സ്വാധീനിക്കും. അണ്ഡാശയത്തിന്റെ പ്രവർത്തനം നിലയ്ക്കുകയും ഈസ്ട്രജന്റെ അളവ് കുറയുകയും ചെയ്യുന്നതാണ് ഇതിന്റെ പ്രധാനലക്ഷണം.

സാധാരണ ആർത്തവവിരാമത്തിന് സമാനമായ ലക്ഷണങ്ങളായിരിക്കും ഈ പ്രശ്‌നങ്ങൾക്കുമുണ്ടാവുക. എന്നാൽ പലപ്പോഴും ഇത് കൂടുതൽ കഠിനമായിരിക്കും. ശരീരത്തിൽ ചൂട് അനുഭവപ്പെടുന്നത് (ഹോട്ട് ഫ്‌ളാഷുകൾ), രാത്രിയിലെ വിയർപ്പ്, യോനിയിലെ വരൾച്ച, ലൈംഗിക ബന്ധത്തിൽ ഏർപ്പെടുമ്പോൾ വേദന (ഡിസ്പാരൂനിയ), അടിക്കടിയുള്ള മൂത്രശങ്കയും മൂത്രം നിയന്ത്രിക്കാൻ കഴിയാത്ത അവസ്ഥയും പോലുള്ള മൂത്രാശയ സംബന്ധമായ ലക്ഷണങ്ങൾ, ലൈംഗിക താൽപര്യക്കുറവ്, ഉറക്കക്കുറവ്, പെട്ടെന്നുള്ള സ്വഭാവമാറ്റങ്ങൾ, ഉത്കണ്ഠ, വിഷാദം, ബൗദ്ധികമായ ബുദ്ധിമുട്ടുകൾ എന്നിവ ഇതിൽ ഉൾപ്പെടുന്നു.

അകാല ആർത്തവവിരാമം സംഭവിച്ച സ്ത്രീകളിൽ ഏകദേശം 75% പേർക്കും ഹോട്ട് ഫ്‌ളാഷുകൾ ഉണ്ടാകാറുണ്ട്. ഇത് അവരുടെ ദൈനംദിന പ്രവർത്തനങ്ങളെയും ജീവിതനിലവാരത്തെയും സാരമായി ബാധിച്ചേക്കാം. ഈസ്ട്രജന്റെ കുറവുമൂലം യോനിയിലും മൂത്രാശയ ഭാഗങ്ങളിലും ഉണ്ടാകുന്ന ശോഷണം, ലൂബ്രിക്കേഷനും ഇലാസ്തികതയും കുറയ്ക്കുകയും, ഇത് അസ്വസ്ഥതകൾക്കും മൂത്രാശയ പ്രശ്‌നങ്ങൾക്കും കാരണമാകുകയും ചെയ്യുന്നു.

ജനിതകപരമായ കാരണങ്ങൾ, ജീവിതശൈലി, ആരോഗ്യപരമായ അവസ്ഥകൾ, വൈദ്യശാസ്ത്രപരമായ ഇടപെടലുകൾ എന്നിവയുൾപ്പെടെ പല ഘടകങ്ങൾ നേരത്തെയുള്ള ആർത്തവവിരാമത്തിന് കാരണമാകാം. പാരമ്പര്യ ഘടകങ്ങൾ ആർത്തവവിരാമത്തിന്റെ പ്രായത്തെ സ്വാധീനിക്കുന്നതിനാൽ ജനിതകശാസ്ത്രം ഒരു പ്രധാന പങ്ക് വഹിക്കുന്നു. അമ്മമാർക്ക് നേരത്തെ ആർത്തവവിരാമം സംഭവിച്ച സ്ത്രീകൾക്ക് അതിനുള്ള സാധ്യത കൂടുതലാണ്. ടേണർ സിൻഡ്രോം, പ്യുവർ ഗൊണാഡൽ ഡിസ്‌ജെനിസിസ് പോലുള്ള ക്രോമസോം തകരാറുകൾ പ്രധാന ജനിതക കാരണങ്ങളാണ്. ഓട്ടോഇമ്മ്യൂൺ രോഗങ്ങളും കാരണമായേക്കാം.

പുകവലി, കുറഞ്ഞ ബോഡി മാസ് ഇൻഡക്‌സ് (ബിഎംഐ) തുടങ്ങിയ ജീവിതശൈലി ഘടകങ്ങൾ ആർത്തവവിരാമം വേഗത്തിലാക്കിയേക്കാം. അണ്ഡാശയങ്ങൾ ശസ്ത്രക്രിയയിലൂടെ നീക്കം ചെയ്യൽ, അണ്ഡാശയത്തിന്റെ പ്രവർത്തനത്തെ തകരാറിലാക്കുന്ന കീമോതെറാപ്പി, റേഡിയേഷൻ തെറാപ്പി എന്നിവയും ഇതിന്റെ മെഡിക്കൽ കാരണങ്ങളിൽ ഉൾപ്പെടുന്നു. ചില കേസുകളിൽ വ്യക്തമായ കാരണം കണ്ടെത്താനാവില്ല. 40 വയസ്സിനു താഴെയുള്ള സ്ത്രീകളിൽ ഏകദേശം 1% പേരെ അകാല ആർത്തവവിരാമം ബാധിക്കുന്നു. 45 വയസ്സിനുമുൻപുള്ള ആർത്തവവിരാമം ഇതിലും സാധാരണമാണ്.

ജനിതകശാസ്ത്രം, ഓട്ടോഇമ്മ്യൂൺ രോഗങ്ങൾ, ജീവിതശൈലി ഘടകങ്ങൾ, വൈദ്യശാസ്ത്രപരമായ ഇടപെടലുകൾ എന്നിവയുൾപ്പെടെ ഒന്നിലധികം കാരണങ്ങളുള്ള സങ്കീർണ്ണമായ ഒരു അവസ്ഥയാണ് നേരത്തെയുള്ള ആർത്തവവിരാമം. ഇതിന്റെ ലക്ഷണങ്ങൾ പലപ്പോഴും സാധാരണ ആർത്തവവിരാമത്തിന് സമാനമാണെങ്കിലും, കൂടുതൽ കഠിനവും ഗുരുതരമായ ആരോഗ്യ പ്രത്യാഘാതങ്ങൾ ഉണ്ടാക്കുന്നതുമാകാം.

തെറാപ്പി, ജീവിതശൈലിയിലെ മാറ്റങ്ങൾ എന്നിവയാണ് പ്രധാന ചികിത്സകൾ. 45 വയസ്സിനുമുൻപ് ക്രമം തെറ്റിയ ആർത്തവം, ഹോട്ട് ഫ്‌ളാഷുകൾ, യോനിയിലെ വരൾച്ച തുടങ്ങിയ ലക്ഷണങ്ങൾ അനുഭവിക്കുന്ന സ്ത്രീകൾ രോഗനിർണയത്തിനും ചികിത്സയ്ക്കുമായി ഒരു ആരോഗ്യ വിദഗ്ദ്ധനെ സമീപിക്കേണ്ടത് അത്യാവശ്യമാണ്.

(പൊതുവായ വിവരങ്ങൾ മാത്രമാണിവ. ആരോഗ്യവിധഗ്ദന്റെ നിർദേശപ്രകാരം മാത്രം മുന്നോട്ടുപോവുക)

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbi.page.link/grihalakshmi