വെള്ളക്കുപ്പിയേക്കാൾ കുറഞ്ഞ വില! ലോകത്തിലെ ഏറ്റവും വിലകുറഞ്ഞ ബിയർ ലഭിക്കുന്ന രാജ്യം

ഒരു ഗ്ലാസ് ബിയറിന് വെള്ളക്കുപ്പിയേക്കാൾ വില കുറവാണെന്ന് പറഞ്ഞാൽ വിശ്വസിക്കാൻ കഴിയുമോ? യാത്രകളിൽ വലിയ തുക മുടക്കി ഡ്രിങ്ക്‌സ് വാങ്ങി ശീലിച്ചവർക്ക് ഇതൊരു അത്ഭുതമായിരിക്കും. എന്നാൽ ലോകത്തിന്റെ ചില ഭാഗങ്ങളിൽ, സാധാരണക്കാരന്റെ നിത്യജീവിതത്തിലെയും ഭക്ഷണശീലങ്ങളിലെയും ഒരു പ്രധാന ഭാഗമാണ് വിലകുറഞ്ഞ ഈ ബിയർ.

വലിയ ബാറുകളുടെയും റിസോർട്ടുകളുടെയും ആഡംബരമല്ല, മറിച്ച് വഴിയോരങ്ങളിലെ ചെറിയ കടകളും നിരത്തുകളുമാണ് ഈ രാജ്യത്തെ സവിശേഷമാക്കുന്നത്. വലിയ ചെലവുകൾ ഇല്ലാതെ ആർക്കും ഇവിടെയെത്തി ഫ്രെഷായി തയാറാക്കിയ ബിയർ ആസ്വദിക്കാം.

ബിയർ സംസ്കാരത്തിന് പിന്നിൽ

ലോകത്തെ ഏറ്റവും വിലകുറഞ്ഞ ബിയർ സംസ്കാരത്തിന് പേരുകേട്ട രാജ്യം വിയറ്റ്നാമാണ്. ഇവിടുത്തെ തെരുവുകളിൽ ഏറെ പ്രശസ്തമായ ഫ്രെഷ് ഡ്രാഫ്റ്റ് ബിയറാണ് 'ബിയ ഹോയ്' (Bia Hơi). ചെറിയ കടകളിൽ ഒരു ഗ്ലാസ് ബിയറിന് വെറും 5,000 മുതൽ 15,000 വിയറ്റ്നാമീസ് ഡോങ് മാത്രമാണ് വില. ഇന്ത്യൻ രൂപയിൽ ഇത് ഏകദേശം 16 രൂപ മുതൽ 48 രൂപ വരെ. ചിലയിടങ്ങളിൽ ഒരു കുപ്പി വെള്ളത്തേക്കാൾ കുറഞ്ഞ നിരക്കിലാണ് ഇത് ലഭിക്കുന്നത്.

സാധാരണ ബോട്ടിൽ ബിയറുകളിൽ നിന്ന് തികച്ചും വ്യത്യസ്തമാണ് ബിയ ഹോയ്. യാതൊരുവിധ പ്രിസർവേറ്റീവുകളും ചേർക്കാതെ ദിവസേന പുതുതായി ബ്രൂ ചെയ്ത്, വീപ്പകളിൽ (keg) നിന്നാണ് ഇത് നേരിട്ട് വിളമ്പുന്നത്. ആൽകോഹോളിന്റെ അളവ് വളരെ കുറവായതിനാൽ വിയറ്റ്നാമിന്റെ തെരുവ് ഭക്ഷണ സംസ്കാരത്തിന് ഏറെ ഇണങ്ങുന്ന ഒന്നാണിത്.

ബിയർ ബ്രാൻഡുകളും വിപണിയും

ബിയ ഹോയ്ക്ക് പുറമെ നിരവധി ഡൊമസ്റ്റിക് ബ്രാൻഡുകളും വിയറ്റ്നാമിലുണ്ട്. ബിയ സൈഗോൺ (Bia Saigon), 333, ഹാനോയ് ബിയർ തുടങ്ങിയവ അതിൽ പ്രമുഖമാണ്. രാജ്യത്ത് വളർന്നുവരുന്ന ക്രാഫ്റ്റ് ബിയർ രംഗം കൂടുതൽ പ്രീമിയം ഓപ്ഷനുകളും നൽകുന്നുണ്ട്. എങ്കിലും ഇവക്കെല്ലാം ബിയ ഹോയിയേക്കാൾ വില കൂടുതലാണ്.

തലസ്ഥാനമായ ഹാനോയിൽ ബിയ ഹോയ് എന്നത് വെറുമൊരു പാനീയമല്ല; അതൊരു സംസ്കാരമാണ്. സന്ദർശകരും നാട്ടുകാരും ഒരുപോലെ ചെറിയ ബിയർ സ്റ്റാളുകളിൽ ഒത്തുകൂടുകയും, തദ്ദേശീയമായ പലഹാരങ്ങൾക്കൊൊപ്പം ആസ്വദിക്കുകയും ചെയ്യുന്നു.

വിലക്കുറവ് മാത്രമല്ല, രുചിയും ഭക്ഷണവും ഒത്തുകൂടലിന്റെ ആരവവും ചേരുന്ന തനത് സാമൂഹിക അനുഭവമാണ് വിയറ്റ്നാമിന്റെ ബിയർ സംസ്കാരത്തെ ലോകശ്രദ്ധയിൽ എത്തിക്കുന്നത്.

(മദ്യപാനം ആരോഗ്യത്തിന് ഹാനികരം)

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Vietnam is home to the world's cheapest beer, known as Bia Hoi., A glass of Bia Hoi costs between 5,000 and 15,000 Vietnamese Dong (approx. ₹16 to ₹48)., It is freshly brewed daily without preservatives and served directly from kegs., Bia Hoi is an integral part of Hanoi's vibrant street food and social culture.