ഇനി ഈന്തപ്പഴത്തിന്റെ കുരു വെറുതെ കളയല്ലേ, ആന്റിഓക്സിഡന്റുകളാൽ സമ്പന്നമായ മികച്ച കോഫിയാക്കി മാറ്റാം...

ഈന്തപ്പഴം കഴിച്ച ഉടൻ കുരു വലിച്ചെറിയുന്നവരാണ് നമ്മളെല്ലാവരും. എന്നാൽ  ആ വലിച്ചെറിയുന്ന കുരു ഉപയോഗിച്ച് കാപ്പി ഉണ്ടാക്കി നോക്കിയിട്ടുണ്ടോ? എന്നാല്‍ വേഗം ഉണ്ടാക്കിനോക്കിക്കോളൂ...ഈന്തപ്പഴക്കുരു കാപ്പി ഒരു മികച്ച ഫിറ്റ്നസ് ഡ്രിങ്ക് കൂടിയാണ്. ആന്റിഓക്‌സിഡന്റുകൾ, നാരുകൾ എന്നിവയാൽ സമ്പുഷ്ടമായ ഈന്തപ്പഴക്കുരു കൊണ്ടുണ്ടാക്കിയ കാപ്പി  ദഹനം, ഹൃദയാരോഗ്യം, രോഗപ്രതിരോധശേഷി എന്നിവ മെച്ചപ്പെടുത്താൻ സഹായിക്കുന്നു. ഇതിൽ കഫീൻ ഇല്ലാത്തതിനാൽ, കഫീനുമായി ബന്ധപ്പെട്ട പാർശ്വഫലങ്ങൾ ഒഴിവാക്കാനും ഇതൊരു മികച്ച തിരഞ്ഞെടുപ്പാണ്.
ഈന്തപ്പഴക്കുരു കാപ്പി എങ്ങനെ തയ്യാറാക്കാം
ഈന്തപ്പഴത്തിന്റെ കുരുക്കൾ നന്നായി കഴുകി ഉണക്കി എടുക്കുക. ശേഷം കുരുക്കൾ ഒരു പാനിലോ ഓവനിലോ 200 ഡിഗ്രി സെൽഷ്യസ് താപനിലയിൽ ഏകദേശം 30മുതൽ 40 മിനിറ്റ് നേരം നല്ല ബ്രൗൺ നിറമാകുന്നതുവരെ വറുത്തെടുക്കുക. തണുത്തശേഷം നിങ്ങളുടെ ഇഷ്ടാനുസരണം തരിതരിയായോ പൊടിയായോ പൊടിച്ചെടുക്കുക. ശേഷം കാപ്പിപ്പൊടിയ്ക്ക് പകരം ഇട്ട്  സാധാരണ കാപ്പി പോലെ തയ്യാറാക്കാം. പാലുചേർത്തോ ചേർക്കാതെയോ കുടിക്കാം. നട്സിന്റെയും കാരമലിന്റെ രുചിയുള്ള ചൂടൻ കോഫിയിൽ സുഗന്ധവ്യഞ്ജനങ്ങൾ ചേർത്ത് ആസ്വദിക്കാം.
ഈന്തപ്പഴക്കുരു കാപ്പിയുടെ ആരോഗ്യഗുണങ്ങൾ
1. കഫീൻ രഹിതം
കഫീൻ ഉപഭോഗം കുറയ്ക്കാൻ ആഗ്രഹിക്കുന്നവർക്ക് ഈന്തപ്പഴക്കുരു കാപ്പി ഒരു മികച്ച ഓപ്ഷനാണ്. സാധാരണ കാപ്പി കുടിക്കുമ്പോൾ ഉണ്ടാകാനിടയുള്ള വിറയൽ, ഉത്കണ്ഠ, ഉറക്കക്കുറവ് എന്നിവയിൽ നിന്ന് രക്ഷനേടാൻ ആഗ്രഹിക്കുന്ന കാപ്പിപ്രേമികൾക്ക് ഈന്തപ്പഴക്കുരു മികച്ച ഓപ്ഷനാണ്.

2. ആന്റിഓക്‌സിഡന്റുകളാൽ സമ്പുഷ്ടം
പോളിഫിനോൾസ്, ഫ്ലേവനോയിഡുകൾ തുടങ്ങിയ ശക്തമായ ആന്റിഓക്‌സിഡന്റുകളാൽ സമ്പന്നമാണ് ഈന്തപ്പഴക്കുരു. ഇത് ശരീരത്തിലെ ഓക്സിഡേറ്റീവ് സ്ട്രെസ്സിനെ ചെറുക്കാൻ സഹായിക്കുന്നു. ആന്റിഓക്‌സിഡന്റുകൾ ഹാനികരമായ ഫ്രീ റാഡിക്കലുകളെ നിർവീര്യമാക്കുകയും ചെയ്യുന്നു.

3. ദഹനം മെച്ചപ്പെടുത്തുന്നു
ഈന്തപ്പഴക്കുരു കാപ്പിയിൽ നാരുകൾ അടങ്ങിയിട്ടുണ്ട്, ഇത് ദഹനത്തിന് ഒരു പ്രധാന പങ്ക് വഹിക്കുന്നു. നാരുകൾ മലബന്ധം തടയുകയും ആരോഗ്യകരമായ ഗട്ട് മൈക്രോബയോമിനെ പിന്തുണയ്ക്കുകയും ചെയ്യുന്നു.

4. രോഗപ്രതിരോധ ശേഷി വർധിപ്പിക്കുന്നു
ഈന്തപ്പഴക്കുരുവിലടങ്ങിയിരിക്കുന്ന  ആന്റിഓക്‌സിഡന്റുകൾ,സിങ്ക്, ഇരുമ്പ്, മഗ്നീഷ്യം തുടങ്ങിയ ധാതുക്കളിൽ എന്നിവ രോഗപ്രതിരോധ ശേഷി വർധിപ്പിക്കുന്നു. കൂടാതെ, അണുബാധയെ തടയാനും വീക്കം കുറയ്ക്കാനും, ആരോഗ്യം മെച്ചപ്പെടുത്താനും ഇത് ശരീരത്തെ സഹായിക്കുന്നു. 

5. രക്തത്തിലെ പഞ്ചസാരയുടെ അളവ് നിയന്ത്രിക്കുന്നു

ഈന്തപ്പഴക്കുരു കാപ്പിക്ക് കുറഞ്ഞ ഗ്ലൈസെമിക് സൂചികയാണുള്ളത്. ഇത് രക്തത്തിലെ പഞ്ചസാരയെ നിയന്ത്രിക്കാൻ സഹായിക്കുന്നു. ഈന്തപ്പഴക്കുരുവിലെ നാരുകളും പോളിഫിനോളുകളും ഇൻസുലിൻ സംവേദനക്ഷമത മെച്ചപ്പെടുത്തുന്നതിനും സഹായിക്കുന്നു.
6. ഹൃദയാരോഗ്യം മെച്ചപ്പെടുത്തുന്നു
ഉയർന്ന അളവിലുള്ള പൊട്ടാസ്യവും ആന്റിഓക്‌സിഡന്റുകളും മൂലം ഈന്തപ്പഴക്കുരു കാപ്പി കുടിക്കുന്നത് ഹൃദയാരോഗ്യത്തിന് ഗുണം ചെയ്യും. പൊട്ടാസ്യം രക്തസമ്മർദ്ദം നിയന്ത്രിക്കാൻ സഹായിക്കുന്നു. മാത്രമല്ല ആന്റിഓക്‌സിഡന്റുകൾ കൊളസ്ട്രോളിന്റെ ഓക്സീകരണം തടയുകയും ധമനികളിൽ കൊഴുപ്പടിഞ്ഞു കൂടാനുള്ള സാധ്യത കുറയ്ക്കുകയും ചെയ്യുന്നു.

7. ശരീരത്തിലെ വിഷാംശം നീക്കം ചെയ്യുന്നു
ശരീരത്തിൽ നിന്ന് വിഷവസ്തുക്കളെ പുറന്തള്ളാൻ സഹായിക്കുന്നതിലൂടെ ഈന്തപ്പഴക്കുരു കാപ്പി ഒരു സ്വാഭാവിക ഡിറ്റോക്സിഫയറായി പ്രവർത്തിക്കുന്നു. ഇതിലെ  ആന്റിഓക്‌സിഡന്റുകൾ കരളും വൃക്കകളും ശുദ്ധീകരിക്കാനും സഹായിക്കുന്നു.

8. വൃക്കകളുടെ ആരോഗ്യം സംരക്ഷിക്കുന്നു
ഈന്തപ്പഴക്കുരുവിന് ഡൈയൂററ്റിക് ഗുണങ്ങളുണ്ടെന്നും പഠനങ്ങൾ സൂചിപ്പിക്കുന്നു. ശരീരത്തിലെ അധിക ദ്രാവകങ്ങളും വിഷവസ്തുക്കളും മൂത്രത്തിലൂടെ പുറന്തള്ളാൻ ഇത് സഹായിക്കും. വൃക്കയിലെ കല്ലുകൾ ഉണ്ടാകുന്നത് തടയുന്നതിനും വൃക്കകളുടെ മൊത്തത്തിലുള്ള പ്രവർത്തനം മെച്ചപ്പെടുത്തുന്നതിനും ഇത് സഹായിക്കുന്നു.
രുചികരവും കഫീൻ രഹിതവുമായ പാനീയത്തിനായി ഇന്നുതന്നെ ഈന്തപ്പഴക്കുരു കാപ്പി ട്രെെ ചെയ്ത് നോക്കൂ…

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbiurl.in/grihalakshmi

Content Highlights: Discover the caffeine-free goodness of date seed coffee and its health benefits.